烏洞吸積盤 ê 視覺化影片

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Visualization: A Black Hole Accretion Disk
• 視覺化來源：NASA’s Goddard Space Flight Center, Jeremy Schnittman
• 予人印象足深 ê 奇異點：It's Black Hole Week at NASA!
• 台文翻譯：An-Li Tsai (NSYSU)

[漢羅] 烏洞吸積盤 ê 視覺化影片

踅烏洞咧行 ê 物件看起來會是啥款 ？ 吸積盤若是一个踅 烏洞 ê 發光吸積氣體，烏洞 ê 強大引力 會 kā 吸積盤 發出 ê 光拗彎，予伊看起來足特別--ê。 這支動畫影片 提供咱視覺化 ê 效果。 影片是 觀測者，抑就是你，ùi 吸積盤頂懸看 烏洞 ê 角度開始。 踅 tī 中心 烏洞 外口彼輾薄薄 ê 圓箍仔，是 光子球 ê 所在，內底是烏洞 ê 事件視界。 這支影片上主要 ê 部份就是吸積盤。 吸積盤 tī 倒爿是踅 tùi 你 ê 方向來，這部份會 變較光。 咱繼續看 影片，這馬你 tī 烏洞 頂懸，ùi 頂懸 看 tùi 下底去。 紲落來你迵過吸積盤，來到較遠彼爿。 落尾閣轉來 你本來看烏洞 ê 角度。 其中一段影像是真趣味，吸積盤顛倒反，毋過看起來毋是平--ê。 像這款視覺化影片是足重要--ê，因為 事件視界望遠鏡 這馬當咧用 世界第一厲害 ê 解析度 替烏洞 翕相。

[POJ] O͘-tōng Khip-chek-pôaⁿ ê Sī-kak-hòa Iáⁿ-phìⁿ

Se̍h o͘-tōng leh kiâⁿ ê mi̍h-kiāⁿ khòaⁿ--khí-lâi ē sī siáⁿ-khoán? Khip-chek-pôaⁿ nā-sī chi̍t-ê se̍h o͘-tōng leh kiâⁿ ê hoat-kng khip-chek khì-thé, o͘-tōng ê kiông-tāi ín la̍t ē kā khip-chek-pôaⁿ hoat--chhut ê kng áu-oan, hō͘ i khòaⁿ--khí-lâi chiok te̍k-pia̍t--ê. Chit-ki tōng-ōe iáⁿ-phìⁿ thê-kiong lán sī-kak-hòa ê hāu-kó. Iáⁿ-phìⁿ sī koan-chhek-chiá, iah to̍h sī lí, ùi khip-chek-pôaⁿ téng-koân khòaⁿ o͘-tōng ê kak-tō͘ khai-sí. Se̍h tī tiong-sim o͘-tōng gōa-kháu hit liàn po̍h-po̍h ê îⁿ-kho͘-á, sī kng-chú-kiû ê só͘-chāi, lāi-té sī o͘-tōng ê sū-kiāⁿ sī-kài. Chit-ki iáⁿ-phìⁿ siōng chú-iàu ê pō͘-hūn to̍h-sī khip-chek-pôaⁿ. Khip-chek-pôaⁿ tī tò-pêng sī se̍h tùi lí ê hong-hiòng lâi, chit pō͘-hūn ē piàn khah kng. Lán kè-sio̍k khòaⁿ iáⁿ-phìⁿ, chit-má lí tī o͘-tōng téng-koân, ùi téng-koân khòaⁿ tùi ē-té khì. Sòa-lo̍h-lâi lí thàng-kòe khip-chek-pôaⁿ, lâi-kàu khah hn̄g hit-pêng. Lo̍h-bóe koh tńg-lâi lí pún-lâi khòaⁿ o͘-tōng ê kak-tō͘. Kî-tiong chi̍t-tōaⁿ iáⁿ-siōng sī chin chhù-bī, khip-chek-pôaⁿ tian-tò-péng, m̄-koh khòaⁿ--khí-lâi m̄-sī pêⁿ--ê. Siōng chit-khoán sī-kak-hòa iáⁿ-phìⁿ sī chiok tiōng-iàu--ê, in-ūi Sū-kiāⁿ Sī-kài Bōng-oán-kiàⁿ chit-má tng-teh iōng sè-kài tē-it lī-hāi ê kái-sek-tō͘ thè o͘-tōng hip-siòng.

[KIP] Oo-tōng Khip-tsik-puânn ê Sī-kak-huà Iánn-phìnn

Se̍h oo-tōng leh kiânn ê mi̍h-kiānn khuànn--khí-lâi ē sī siánn-khuán? Khip-tsik-puânn nā-sī tsi̍t-ê se̍h oo-tōng leh kiânn ê huat-kng khip-tsik khì-thé, oo-tōng ê kiông-tāi ín la̍t ē kā khip-tsik-puânn huat--tshut ê kng áu-uan, hōo i khuànn--khí-lâi tsiok ti̍k-pia̍t--ê. Tsit-ki tōng-uē iánn-phìnn thê-kiong lán sī-kak-huà ê hāu-kó. Iánn-phìnn sī kuan-tshik-tsiá, iah to̍h sī lí, uì khip-tsik-puânn tíng-kuân khuànn oo-tōng ê kak-tōo khai-sí. Se̍h tī tiong-sim oo-tōng guā-kháu hit liàn po̍h-po̍h ê înn-khoo-á, sī kng-tsú-kiû ê sóo-tsāi, lāi-té sī oo-tōng ê sū-kiānn sī-kài. Tsit-ki iánn-phìnn siōng tsú-iàu ê pōo-hūn to̍h-sī khip-tsik-puânn. Khip-tsik-puânn tī tò-pîng sī se̍h tuì lí ê hong-hiòng lâi, tsit pōo-hūn ē piàn khah kng. Lán kè-sio̍k khuànn iánn-phìnn, tsit-má lí tī oo-tōng tíng-kuân, uì tíng-kuân khuànn tuì ē-té khì. Suà-lo̍h-lâi lí thàng-kuè khip-tsik-puânn, lâi-kàu khah hn̄g hit-pîng. Lo̍h-bué koh tńg-lâi lí pún-lâi khuànn oo-tōng ê kak-tōo. Kî-tiong tsi̍t-tuānn iánn-siōng sī tsin tshù-bī, khip-tsik-puânn tian-tò-píng, m̄-koh khuànn--khí-lâi m̄-sī pênn--ê. Siōng tsit-khuán sī-kak-huà iánn-phìnn sī tsiok tiōng-iàu--ê, in-uī Sū-kiānn Sī-kài Bōng-uán-kiànn tsit-má tng-teh iōng sè-kài tē-it lī-hāi ê kái-sik-tōo thè oo-tōng hip-siòng.

[English] Visualization: A Black Hole Accretion Disk

What would it look like to circle a black hole? If the black hole was surrounded by a swirling disk of glowing and accreting gas, then the great gravity of the black hole would deflect light emitted by the disk to make it look very unusual. The featured animated video gives a visualization. The video starts with you, the observer, looking toward the black hole from just above the plane of the accretion disk. Surrounding the central black hole is a thin circular image of the orbiting disk that marks the position of the photon sphere -- inside of which lies the black hole's event horizon. Toward the left, parts of the large main image of the disk appear brighter as they move toward you. As the video continues, you loop over the black hole, soon looking down from the top, then passing through the disk plane on the far side, then returning to your original vantage point. The accretion disk does some interesting image inversions -- but never appears flat. Visualizations such as this are particularly relevant today as black holes are being imaged in unprecedented detail by the Event Horizon Telescope.

詞彙學習