烏洞 ê 吸積盤 kah 噴射流

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Black Hole Accreting with Jet
• 插圖來源：NASA, Swift, Aurore Simonnet (Sonoma State U.)
• 落對永遠去：It's Black Hole Week at NASA!
• 台文翻譯：An-Li Tsai (NSYSU)

[漢羅] 烏洞 ê 吸積盤 kah 噴射流

烏洞若是 kā 一粒恆星吞落去，會發生啥物代誌？ 細節 ê 部份咱毋知，毋過觀測 ê 結果有提供一寡新 ê 線索。 2014 年，有一个 強力爆炸 去予 超新星自動巡天觀測計畫（ASAS-SN 計畫）ê 地面機器人望遠鏡 紀錄落來。 隨後 NASA 踅地球 ê 雨燕衛星 kah 其他儀器，繼續做追蹤觀測。 Tùi 發射線 做電腦模擬 ê 結果表示講，這應該是有一粒星去予遙遠 ê 超大質量烏洞 搝甲散去。 這个相挵 ê 結果就畫 tī 這張藝術插圖 內底。 烏洞 tī 中央，是一粒細細粒 ê 烏點。 物質若是落 tùi 烏洞去，伊會 kah 其他物質相挵，造成溫度變懸。 烏洞周圍有一个 吸積盤，過去是恆星 ê 熱物質，另外閣有一條 tī 烏洞自轉軸 方向 ê 噴射流。

[POJ] O͘-tōng ê khip chek pôaⁿ kah phùn-siā-liû

O͘-tōng nā-sī kā chi̍t-lia̍p hêng-chheⁿ thun lo̍h-khì, ē hoat-seng siáⁿ-mih tāi-chì? Sè-chiat ê pō͘-hūn lán m̄-chai, m̄-koh koan-chhek ê kiat-kó ū thê-kiong chi̍t-kóa sin ê sòaⁿ-soh. 2014 nî, ū chi̍t-ê kiông-le̍k po̍k-chà khì hō͘ Chhiau-sin-seng Chū-tōng Sûn-thian Koan-chhek kè-ōe (ASAS-SN kè-ōe) ê tē-bīn ki-khì-lâng bōng-oán-kiàⁿ kì-lio̍k lo̍h-lâi. Sûi-āu NASA se̍h Tē-kiû ê Ú-iàn ōe-chheⁿ kah kî-thaⁿ gî-khì, kè-sio̍k chò tui-chong koan-chhek. Tùi hoat-siā-sòaⁿ chò tiān-náu bô͘-gí ê kiat-kó piáu-sī kóng, che èng-kai sī ū chi̍t-lia̍p chheⁿ khì hō͘ iâu-oán ê chhiau-tōa chit-liōng o͘-tōng giú kah sòaⁿ--khì. Chit-ê sio-lòng ê kiat-kó to̍h ōe tī chit-tiuⁿ gē-su̍t chhah-tô͘ lāi-té. O͘-tōng tī tiong-ng, sī chi̍t-lia̍p sè-sè-lia̍p ê o͘-tiám. Bu̍t-chit nā-sī lak tùi o͘-tōng khì, i ē kah kî-thaⁿ bu̍t-chit sio-lòng, chō-sêng un-tō͘ piàn koân. O͘-tōng chiu-ûi ū chi̍t-ê khip-chek-pôaⁿ, kòe-khì sī hêng-chheⁿ ê jia̍t-bu̍t-chit, lēng-gōa koh-ū chi̍t tiâu tī o͘-tōng chū-choán-tek hong-hiòng ê phùn-siā-liû.

[KIP] Oo-tōng ê khip tsik puânn kah phùn-siā-liû

Oo-tōng nā-sī kā tsi̍t-lia̍p hîng-tshenn thun lo̍h-khì, ē huat-sing siánn-mih tāi-tsì? Sè-tsiat ê pōo-hūn lán m̄-tsai, m̄-koh kuan-tshik ê kiat-kó ū thê-kiong tsi̍t-kuá sin ê suànn-soh. 2014 nî, ū tsi̍t-ê kiông-li̍k po̍k-tsà khì hōo Tshiau-sin-sing Tsū-tōng Sûn-thian Kuan-tshik kè-uē (ASAS-SN kè-uē) ê tē-bīn ki-khì-lâng bōng-uán-kiànn kì-lio̍k lo̍h-lâi. Suî-āu NASA se̍h Tē-kiû ê Ú-iàn uē-tshenn kah kî-thann gî-khì, kè-sio̍k tsò tui-tsong kuan-tshik. Tuì huat-siā-suànn tsò tiān-náu bôo-gí ê kiat-kó piáu-sī kóng, tse ìng-kai sī ū tsi̍t-lia̍p tshenn khì hōo iâu-uán ê tshiau-tuā tsit-liōng oo-tōng giú kah suànn--khì. Tsit-ê sio-lòng ê kiat-kó to̍h uē tī tsit-tiunn gē-su̍t tshah-tôo lāi-té. Oo-tōng tī tiong-ng, sī tsi̍t-lia̍p sè-sè-lia̍p ê oo-tiám. Bu̍t-tsit nā-sī lak tuì oo-tōng khì, i ē kah kî-thann bu̍t-tsit sio-lòng, tsō-sîng un-tōo piàn kuân. Oo-tōng tsiu-uî ū tsi̍t-ê khip-tsik-puânn, kuè-khì sī hîng-tshenn ê jia̍t-bu̍t-tsit, līng-guā koh-ū tsi̍t tiâu tī oo-tōng tsū-tsuán-tik hong-hiòng ê phùn-siā-liû.

[English] Black Hole Accreting with Jet

What happens when a black hole devours a star? Many details remain unknown, but observations are providing new clues. In 2014, a powerful explosion was recorded by the ground-based robotic telescopes of the All Sky Automated Survey for SuperNovae (Project ASAS-SN), with followed-up observations by instruments including NASA's Earth-orbiting Swift satellite. Computer modeling of these emissions fit a star being ripped apart by a distant supermassive black hole. The results of such a collision are portrayed in the featured artistic illustration. The black hole itself is a depicted as a tiny black dot in the center. As matter falls toward the hole, it collides with other matter and heats up. Surrounding the black hole is an accretion disk of hot matter that used to be the star, with a jet emanating from the black hole's spin axis.

詞彙學習