日全食影片： Ùi 銀盤 到 手指

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：A Total Solar Eclipse from Sliver to Ring
• 影片來源 kah 版權：Reinhold Wittich; 音樂：Sunrise from Also sprach Zarathusra (R. Strauss) by Sascha Ende
• 慶祝烏洞：It’s Black Hole Week at NASA!
• 台文翻譯：An-Li Tsai (NSYSU)

[漢羅] 日全食影片： Ùi 銀盤 到 手指

這支影片紀錄著日頭 tī 日時 是按怎消失去–ê。 這支縮時攝影影片 是 2024 年 4 月 8 號 tī 美國 Arkansas 州 山景城 翕–ê。 影片開始 ê 時陣，有看著日頭有 太陽烏子，紲落來一部份太陽銀盤開始變暗去。 才幾若分鐘，規粒 日頭 就去予前景 ê 月球 閘去矣。 免一點鐘，日頭就完全去予 月球閘去 矣，干焦賰 ùi 後壁射出來 ê 日光，成做一跤 璇石手指。 食甚 ê 時陣，規个天頂是暗–ê，予踅 tī 日頭外口彼輾 粉紅仔色日珥 煞變甲足出眾，壯觀 ê 日冕 tī 天頂嘛湠到規四界。 中央 ê 日冕 是 kā 食甚階段翕 ê 相片疊出來 ê 結果。 免幾若分鐘，影片欲煞進前，閣出現一擺璇石手指，這擺 ê 璇石是 出現 tī 月球另外一爿。 紲落來 ê 一點鐘，天頂就 恢復正常 矣。

[POJ] Ji̍t-choân-si̍t iáⁿ-phìⁿ: Ùi Gîn-pôaⁿ kàu Chhiú-chí

Chit-ki iáⁿ-phìⁿ kí-lio̍k-tio̍h ji̍t-thâu tī ji̍t–sî sī án-chóaⁿ siau-sit khì–ê. Chit-ki sok-sî-liap-iáⁿ iáⁿ-phìⁿ sī 2024 nî 4 goe̍h 8 hō tī Bí-kok Arkansas chiu soaⁿ-kéng siâⁿ hip–ê. Iáⁿ-phìⁿ khai-sí ê sî-chūn, ū khòaⁿ-tio̍h ji̍t-thâu ū thài-iông o͘-chú, sòa-lo̍h-lâi chi̍t-pō͘-hūn thài-iông gîn-pôaⁿ khai-sí piàn àm khì. Chiah kúi-nā hun-cheng, kui-lia̍p ji̍t-thâu to̍h khì hō͘ chiân-kéng ê Goe̍h-kiû cha̍h khì–ah. Bián chi̍t tiám-cheng, ji̍t-thâu to̍h oân-choân khì hō͘ Goe̍h-kiû cha̍h khì, kan-na chhun ùi āu-piah siā chhut-lâi ê ji̍t-kng, chiâⁿ-chòe chi̍t kha soān-chio̍h chhiú-chí. Si̍t-sīm ê sî-chūn, kui-ê thiⁿ-téng sī àm–ê, hō͘ se̍h tī ji̍t-thâu gōa-kháu hit liàn hún-âng-á-sek ji̍t-ní soah piàn-kah chiok chhut-chiòng, chòng-koan ê ji̍t-bián tī thiⁿ-téng mā thòaⁿ kàu kui-sì-kè. Tiong-ng ê ji̍t-bián sī kā ji̍t-sīm kai-tōaⁿ hip–ê siòng-phìⁿ tha̍h chhut-lâi ê kiat-kó. Bián kúi-nā hun-cheng, iáⁿ-phìⁿ beh soah chìn-chêng, to̍h koh chhut-hiān chi̍t-pái soān-chio̍h chhiú-chí, chit pái ê soān-chio̍h sī chhut-hiān tī Goe̍h-kiû lēng-gōa chi̍t-pêng. Sòa–lo̍h-lâi ê chi̍t tiám-cheng, thiⁿ-téng to̍h khoe-ho̍k chèng-siông–ah.

[KIP] Ji̍t-tsuân-si̍t iánn-phìnn: Uì Gîn-puânn kàu Tshiú-tsí

Tsit-ki iánn-phìnn kí-lio̍k-tio̍h ji̍t-thâu tī ji̍t–sî sī án-tsuánn siau-sit khì–ê. Tsit-ki sok-sî-liap-iánn iánn-phìnn sī 2024 nî 4 gue̍h 8 hō tī Bí-kok Arkansas tsiu suann-kíng siânn hip–ê. Iánn-phìnn khai-sí ê sî-tsūn, ū khuànn-tio̍h ji̍t-thâu ū thài-iông oo-tsú, suà-lo̍h-lâi tsi̍t-pōo-hūn thài-iông gîn-puânn khai-sí piàn àm khì. Tsiah kuí-nā hun-tsing, kui-lia̍p ji̍t-thâu to̍h khì hōo tsiân-kíng ê Gue̍h-kiû tsa̍h khì–ah. Bián tsi̍t tiám-tsing, ji̍t-thâu to̍h uân-tsuân khì hōo Gue̍h-kiû tsa̍h khì, kan-na tshun uì āu-piah siā tshut-lâi ê ji̍t-kng, tsiânn-chuè tsi̍t kha suān-tsio̍h tshiú-tsí. Si̍t-sīm ê sî-tsūn, kui-ê thinn-tíng sī àm–ê, hōo se̍h tī ji̍t-thâu guā-kháu hit liàn hún-âng-á-sik ji̍t-ní suah piàn-kah tsiok tshut-tsìong, tsòng-kuan ê ji̍t-bián tī thinn-tíng mā thuànn kàu kui-sì-kè. Tiong-ng ê ji̍t-bián sī kā ji̍t-sīm kai-tuānn hip–ê siòng-phìnn tha̍h tshut-lâi ê kiat-kó. Bián kuí-nā hun-tsing, iánn-phìnn beh suah tsìn-tsîng, to̍h koh tshut-hiān tsi̍t-pái suān-tsio̍h tshiú-tsí, tsit pái ê suān-tsio̍h sī tshut-hiān tī Gue̍h-kiû līng-guā tsi̍t-pîng. Suà–lo̍h-lâi ê tsi̍t tiám-tsing, thinn-tíng to̍h khue-ho̍k tsìng-siông–ah.

[English] A Total Solar Eclipse from Sliver to Ring

This is how the Sun disappeared from the daytime sky last month. The featured time-lapse video was created from stills taken from Mountain View, Arkansas, USA on 2024 April 8. First, a small sliver of a normally spotted Sun went strangely dark. Within a few minutes, much of the background Sun was hidden behind the advancing foreground Moon. Within an hour, the only rays from the Sun passing the Moon appeared like a diamond ring. During totality, most of the surrounding sky went dark, making the bright pink prominences around the Sun’s edge stand out, and making the amazing corona appear to spread into the surrounding sky. The central view of the corona shows an accumulation of frames taken during complete totality. As the video ends, just a few minutes later, another diamond ring appeared – this time on the other side of the Moon. Within the next hour, the sky returned to normal.

詞彙學習（漢羅/POJ/KIP/華語/English）

• 【日全食】ji̍t-choân-si̍t/ji̍t-choân-si̍t/日全食/total solar eclipse
• 【太陽烏子】thài-iông o͘-chú/thài-iông oo-tsú/太陽黑子/sun spot
• 【璇石手指】soān-chio̍h chhiú-chí/suān-tsio̍h tshiú-tsí/鑽石戒指/diamond ring
• 【日冕】ji̍t-bián/ji̍t-bián/日冕/corona
• 【日珥】ji̍t-ní/ji̍t-ní/日珥/prominences
• 【食甚】si̍t-sīm/si̍t-sīm/食甚/totality
• 【縮時攝影】sok-sî-liap-iáⁿ/sok-sî-liap-iánn/縮時攝影/time-lapse