彗星、行星 kah 月娘

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Comet, Planet, Moon
• 影像來源 kah 版權：Juan Carlos Casado (Starry Earth, TWAN)
• 超空間：APOD 亂數產生器
• 台文翻譯：An-Li Tsai (NSYSU)

[漢羅] 彗星、行星 kah 月娘

這個月初，日頭拄落去 ê 時陣，西爿天頂出現 3 粒足光 ê 天體，予經驗豐富 ê 觀星者有滿意。 咱上熟 ê 是 月娘，就 tī 相片頂懸，這馬是月眉 相。 月球其他 ê 部份雖然較暗，毋過因為去予 地球 反射太陽 ê 光照著，嘛猶看會著。 光爍爍 ê 木星 是 太陽系 內底上大粒 ê 行星，就 tī 倒爿頂懸。 上特別 ê 是 彗星 12P/Pons-Brooks，就 tī 月娘下底。 伊有一條較粗 ê 塗粉尾溜 tī 正爿，毋過予人 印象較深 是 湠 tùi 頂懸去 ê 離子尾溜。 這張相片是 kā 幾若張 tī 仝一个所在、用仝一台 kha-mé-lah 連紲翕 ê 相片疊做伙 ê 合成影像，是 tī 西班牙 ê Girona 省 Llers 庄頭附近翕--ê。 頂禮拜 彗星 Pons-Brooks 離 太陽 上倚，伊這馬 行到南天，嘛愈來愈暗，欲轉去到外太陽系矣。

[POJ] Hūi-chheⁿ, Kiâⁿ-chheⁿ kah Goe̍h-niû

Chit kò goe̍h-chhe, ji̍t-thâu tú lo̍h-khì ê sî-chūn, sai-pêng thiⁿ-téng chhut-hiān 3 lia̍p chiok kng ê thian-thé, hō͘ keng-giām hong-hù ê koan-seng-chiá ū móa-ì. Lán siōng se̍k--ê sī goe̍h-niû, tō tī siòng-phìⁿ téng-koân, chit-má sī goe̍h-bâi-siòng. Goe̍h-kiû kî-thaⁿ ê pō͘-hūn sui-jiân khah àm, m̄-koh in-ūi khì hō͘ Tē-kiû hoán-siā Thài-iông ê kng chiò-tio̍h, mā iáu khòaⁿ-ē-tio̍h. Kng-sih-sih ê Bo̍k-chheⁿ sī Thài-iông-hē lāi-té siōng tōa-lia̍p ê kiâⁿ-chheⁿ, tō tī tò-pêng téng-koân. Siōng te̍k-pa̍t ê sī hūi-chheⁿ 12P/Pons Brooks, tō tī goe̍h-niû ē-té. I ū chi̍t tiâu khah chho͘ ê thô͘-hún bóe-liu tī chiàⁿ-pêng, m̄-koh hō͘ lâng ìn-sióng khah chhim ê sī thòaⁿ tùi téng-koân khì ê lî-chú bóe-liu. Chit-tiuⁿ siòng-phìⁿ sī kā kúi-nā tiuⁿ tī kāng chi̍t-ê só͘-chāi, iōng kāng chi̍t tâi kha-mé-lah liân-sòa hip--ê siòng-phìⁿ tha̍h chò-hóe ê ha̍p-sêng iáⁿ-siōng, sī tī Se-pan-gâ ê Girona séng Llers chng-thâu hù-kīn hip--ê. Téng-lé-pài hūi-chheⁿ Pons-Brooks lî Thài-iông siōng óa, i chit-má kiâⁿ kàu lâm-thian, mā lú-lâi-lú àm, beh tńg khì-kàu Gōa Thài-iông-hē--ah.

[KIP] Huī-tshenn, Kiânn-tshenn kah Gue̍h-niû

Tsit kò gue̍h-tshe, ji̍t-thâu tú lo̍h-khì ê sî-tsūn, sai-pîng thinn-tíng tshut-hiān 3 lia̍p tsiok kng ê thian-thé, hōo king-giām hong-hù ê kuan-sing-tsiá ū muá-ì. Lán siōng si̍k--ê sī gue̍h-niû, tō tī siòng-phìnn tíng-kuân, tsit-má sī gue̍h-bâi-siòng. Gue̍h-kiû kî-thann ê pōo-hūn sui-jiân khah àm, m̄-koh in-uī khì hōo Tē-kiû huán-siā Thài-iông ê kng tsiò-tio̍h, mā iáu khuànn-ē-tio̍h. Kng-sih-sih ê Bo̍k-tshenn sī Thài-iông-hē lāi-té siōng tuā-lia̍p ê kiânn-tshenn, tō tī tò-pîng tíng-kuân. Siōng ti̍k-pa̍t ê sī huī-tshenn 12P/Pons Brooks, tō tī gue̍h-niû ē-té. I ū tsi̍t tiâu khah tshoo ê thôo-hún bué-liu tī tsiànn-pîng, m̄-koh hōo lâng ìn-sióng khah tshim ê sī thuànn tuì tíng-kuân khì ê lî-tsú bué-liu. Tsit-tiunn siòng-phìnn sī kā kuí-nā tiunn tī kāng tsi̍t-ê sóo-tsāi, iōng kāng tsi̍t tâi kha-mé-lah liân-suà hip--ê siòng-phìnn tha̍h tsò-hué ê ha̍p-sîng iánn-siōng, sī tī Se-pan-gâ ê Girona síng Llers tsng-thâu hù-kīn hip--ê. Tíng-lé-pài huī-tshenn Pons-Brooks lî Thài-iông siōng uá, i tsit-má kiânn kàu lâm-thian, mā lú-lâi-lú àm, beh tńg khì-kàu Guā Thài-iông-hē--ah.

[English] Comet, Planet, Moon

Three bright objects satisfied seasoned stargazers of the western sky just after sunset earlier this month. The most familiar was the Moon, seen on the upper left in a crescent phase. The rest of the Moon was faintly visible by sunlight first reflected by the Earth. The bright planet Jupiter, the largest planet in the Solar System, is seen to the upper left. Most unusual was Comet 12P/Pons-Brooks, below the Moon and showing a stubby dust tail on the right but an impressive ion tail extending upwards. The featured image, a composite of several images taken consecutively at the same location and with the same camera, was taken near the village of Llers, in Spain's Girona province. Comet Pons-Brooks passed its closest to the Sun last week and is now dimming as it moves into southern skies and returns to the outer Solar System.

詞彙學習