通天的月球烏影

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：All Sky Moon Shadow
• 影像來源 kah 版權：Tunc Tezel (TWAN)
• 台文翻譯：An-Li Tsai (NSYSU)

[漢羅] 通天的月球烏影

日頭若 tī 天頂，毋過天色是暗–ê、四面 ê 地平線是光–ê，按呢你可能是徛 tī 月娘 ê 烏影下底，拄著日全食矣！ 實際上，這張 通天的月娘烏影 全景組合影像 是 tī 地球美國 Arkansas 州 Shirley 附近 ê 農場翕–ê。 這張相片是 tī 4 月 8 號 日全食 彼工，好天 ê 時陣翕–ê。 你若是徛 tī 月球烏影帶 ê 中心線附近，食甚階段 就會超過 4 分鐘。 Tī 食甚階段，除了會當看著 踅 tī 月盤外口 彼輾日冕，嘛會當看著幾若粒行星 kah 恆星。 其中 這內底上好揣–ê，是金星 kah 木星，in 就 tī 食日 ê 正爿下底 kah 倒爿頂懸。

[POJ] Thong-thiⁿ–ê Goe̍h-kiû O͘-iáⁿ

Ji̍t-thâu nā tī thiⁿ-téng, m̄-koh thiⁿ-sek sī àm–ê, sì-bīn ê tē-pêng-sòaⁿ sī kng–ê, án-ne lí khó-lêng sī khiā tī goe̍h-niû ê o͘-iáⁿ ē-té, tú-tio̍h ji̍t-choân-si̍t–ah! Si̍t-chè-siōng, chit-tiuⁿ thong-thiⁿ–ê goe̍h-niû o͘-iáⁿ choân-kéng cho͘-ha̍p iáⁿ-siōng sī tī Tē-kiû Bí-kok Arkansas chiu Shirley hù-kīn ê lông-tiûⁿ hip–ê. Chit-tiuⁿ siòng-phìⁿ sī tī 4 goe̍h 8 hō ji̍t-choân-si̍t hit-kang, hó-thiⁿ ê sî-chūn hip–ê. Lí nā-sī khiā tī Goe̍h-kiû o͘-iáⁿ-tòa ê tiong-sim-sòaⁿ hù-kīn, si̍t-sīm kai-tōaⁿ tō ē chhiau-kòe 4 hun-cheng. Tī si̍t-sīm kai-tōaⁿ, tû-liáu ē-tàng khòaⁿ-tio̍h se̍h tī goe̍h-pôaⁿ gōa-kháu hit-liàn ji̍t-bián, mā ē-tàng khòaⁿ-tio̍h kúi-nā lia̍p kiâⁿ-chheⁿ kah hêng-chheⁿ. Kî-tiong che lāi-té siōng hó chhōe–ê, sī Kim-chheⁿ kah Bo̍k-chheⁿ, in tō tī si̍t-ji̍t ê chiàⁿ-pêng ē-té kah tò-pêng téng-koân.

[KIP] Thong-thinn–ê Gue̍h-kiû Oo-iánn

Ji̍t-thâu nā tī thinn-tíng, m̄-koh thinn-sik sī àm–ê, sì-bīn ê tē-pîng-suànn sī kng–ê, án-ne lí khó-lîng sī khiā tī gue̍h-niû ê oo-iánn ē-té, tú-tio̍h ji̍t-tsuân-si̍t–ah! Si̍t-tsè-siōng, tsit-tiunn thong-thinn–ê gue̍h-niû oo-iánn tsuân-kíng tsoo-ha̍p iánn-siōng sī tī Tē-kiû Bí-kok Arkansas tsiu Shirley hù-kīn ê lông-tiûnn hip–ê. Tsit-tiunn siòng-phìnn sī tī 4 gue̍h 8 hō ji̍t-tsuân-si̍t hit-kang, hó-thinn ê sî-tsūn hip–ê. Lí nā-sī khiā tī Gue̍h-kiû oo-iánn-tuà ê tiong-sim-suànn hù-kīn, si̍t-sīm kai-tuānn tō ē tshiau-kuè 4 hun-tsing. Tī si̍t-sīm kai-tuānn, tû-liáu ē-tàng khuànn-tio̍h se̍h tī gue̍h-puânn guā-kháu hit-liàn ji̍t-bián, mā ē-tàng khuànn-tio̍h kuí-nā lia̍p kiânn-tshenn kah hîng-tshenn. Kî-tiong tse lāi-té siōng hó tshuē–ê, sī Kim-tshenn kah Bo̍k-tshenn, in tō tī si̍t-ji̍t ê tsiànn-pîng ē-té kah tò-pîng tíng-kuân.

[English] All Sky Moon Shadow

If the Sun is up but the sky is dark and the horizon is bright all around, you might be standing in the Moon’s shadow during a total eclipse of the Sun. In fact, the all-sky Moon shadow shown in this composited panoramic view was captured from a farm near Shirley, Arkansas, planet Earth. The exposures were made under clear skies during the April 8 total solar eclipse. For that location near the center line of the Moon’s shadow track, totality lasted over 4 minutes. Along with the solar corona surrounding the silhouette of the Moon planets and stars were visible during the total eclipse phase. Easiest to see here are bright planets Venus and Jupiter, to the lower right and upper left of the eclipsed Sun.

詞彙學習（漢羅/POJ/KIP/華語/English）

• 【日全食】ji̍t-choân-si̍t/ji̍t-tsuân-si̍t/日全食/total solar eclipse
• 【食甚】si̍t-sīm/si̍t-sīm/食甚/totality
• 【月球烏影帶】Goe̍h-kiû o͘-iáⁿ-tòa/Gue̍h-kiû oo-iánn-tuà/月球陰影帶/Moon’s shadow track
• 【日冕】ji̍t-bián/ji̍t-bián/日冕/solar corona
• 【金星】kim-chheⁿ/kim-tshenn/金星/Venus
• 【木星】Bo̍k-chheⁿ/Bo̍k-tshenn/木星/Jupiter
• 【通天的】thong-thiⁿ–ê/thong-thinn–ê/全天的/all skay
• 【食日】si̍t-ji̍t/si̍t-ji̍t/食日/eclipsed Sun