近木軌道 16：飛過木星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Perijove 16: Passing Jupiter
• 影像來源 kah 許可：NASA, Juno, SwRI, MSSS, [Gerald Eichstadt](http://www.planetary.org/connect/our-experts/profiles/ gerald-eichstdt.html); 音樂：The Planets, IV. Jupiter (Gustav Holst); USAF Heritage of America Band (via Wikipedia)
• 台文翻譯：An-Li Tsai (NSYSU)

[漢羅] 近木軌道 16：飛過木星

咱來看 Juno 太空船飛過木星 ê 特寫。 NASA ê 機器人太空船 Juno 這馬當咧踅太陽系內底上大粒 ê 行星，伊會用一個月 ê 時間踅一个 搝長 ê 長株圓軌道 行。 這支影片是 近木軌道 16，這是 Juno 太空船 自 2016 年中飛到木星系統了後 ê 第 16 擺近距離飛過木星 ê 任務。 逐擺 ê 近距離飛過 木星雲頂懸 ê 任務攏 有小可仔無仝。 這支 加強色彩 ê 影片 是 kā 21 張 JunoCam 翕 ê 靜態影像，用數位技術合成，產生 125 倍 ê 縮時攝影影片。 影片 ùi 木星出現開始，這是 Juno 太空船 ùi 北方 飛倚 到木星 ê 影像。 等 Juno 飛倚到 木星雲頂 3500 公里懸 ê 時陣，太空船就會當翕著這粒大粒行星 足濟細節矣。 Juno 飛過踅木星一輾 ê 光區 kah 暗帶，閣有一大堆 tī 木星表面 捲踅 ê 圓形風暴，in 大部份攏比 地球 ê 風颱 較大。 Juno 離開 ê 時陣，咱會當看著顯目 ê 海豬仔形雲。 經過 近木點 了後，木星 會退到較遠 ê 所在，這馬看著 ê 是出現 tī 木星南方無四常 ê 雲。 為著欲提著需要 ê 科學資料，Juno 會飛到 木星 表面，近甲伊 ê 儀器會直接坦 tī 足強 ê 輻射 下底。

[POJ] Kīn Bo̍k kúi-tō 16: Poe-kòe Bo̍k-chheⁿ

Lán lâi-khòaⁿ Juno thài-khong-chûn poe-kòe Bo̍k-chheⁿ ê te̍k-siá. NASA ê ke-khì-lâng thài-khong-chûn Juno chit-má tng-teh se̍h Thài-iông-hē lāi-té siōng tōa-lia̍p ê kiâⁿ-chheⁿ, i ē-ēng chi̍t kò goe̍h ê sî-kan se̍h chi̍t-ê giú-tn̂g ê tn̂g-tu-îⁿ kúi-tō kiâⁿ. Chit-ki iáⁿ-phìⁿ sī kīn-bo̍k kúi-tō 16, che-sī Juno thài-khong-chûn chū 2016 nî-tiong poe-kàu Bo̍k-chheⁿ hē-thóng liáu-āu ê tē 16 pái kīn kū-lī poe-kòe Bo̍k-chheⁿ ê jīm-bū. Ta̍k-pái ê kīn kū-lī poe-kòe Bo̍k-chheⁿ hûn téng-koân ê jīm-bū lóng-ū sió-khóa-á bô-kâng. Chit-ki ka-kiông sek-chhái ê iáⁿ-phìⁿ sī kā 21 tiuⁿ JunoCam hip ê chēng-thài iáⁿ-siōng, iōng sò͘-ūi ki-su̍t ha̍p-sêng, sán-seng 125 pōe ê sok-sî-liap-iáⁿ iáⁿ-phìⁿ. Iáⁿ-phìⁿ ùi Bo̍k-chheⁿ chhut-hiān khai-sí, che-sī Juno thài-khong-chûn ùi pak-hong poe óa kàu Bo̍k-chheⁿ ê iáⁿ-siōng. Tán Juno poe óa kàu Bo̍k-chheⁿ hûn-téng 3500 kong-lí koân ê sî-chūn, thài-khong-chûn to̍h ē-tàng hip-tio̍h chit lia̍p tōa-lia̍p kiâⁿ-chheⁿ chiok chē sè-chiat--ah. Juno poe-kòe se̍h Bo̍k-chheⁿ chi̍t liàn ê kng-khu kah àm-tòa, koh-ū chi̍t-tōa-tui tī Bo̍k-chheⁿ piáu-bīn kńg-se̍h ê îⁿ-hêng hong-pō, in tōa-pō͘-hūn lóng pí Tē-kiû ê hong-thai khah tōa. Juno lī-khui ê sî-chūn, lán ē-tàng khòaⁿ-tio̍h hiáⁿ-ba̍k ê hái-ti-á-hêng hûn. Keng-kòe kīn-bo̍k-tiám liáu-āu, Bo̍k-chheⁿ ē thè kàu khah hn̄g ê só͘-chāi, chit-má khòaⁿ--tio̍h ê sī chhut-hiān tī Bo̍k-chheⁿ lâm-hong bô sù-siông ê hûn. Ūi tio̍h beh the̍h-tio̍h su-iàu ê kho-ha̍k chu-liāu, Juno ē poe-kàu Bo̍k-chheⁿ piáu-bīn, kīn kah i ê gî-khì ē ti̍t-chiap thán tī chiok kiông ê hok-siā ē-té.

[KIP] Kīn Bo̍k kuí-tō 16: Pue-kuè Bo̍k-tshenn

Lán lâi-khuànn Juno thài-khong-tsûn pue-kuè Bo̍k-tshenn ê ti̍k-siá. NASA ê ke-khì-lâng thài-khong-tsûn Juno tsit-má tng-teh se̍h Thài-iông-hē lāi-té siōng tuā-lia̍p ê kiânn-tshenn, i ē-īng tsi̍t kò gue̍h ê sî-kan se̍h tsi̍t-ê giú-tn̂g ê tn̂g-tu-înn kuí-tō kiânn. Tsit-ki iánn-phìnn sī kīn-bo̍k kuí-tō 16, tse-sī Juno thài-khong-tsûn tsū 2016 nî-tiong pue-kàu Bo̍k-tshenn hē-thóng liáu-āu ê tē 16 pái kīn kū-lī pue-kuè Bo̍k-tshenn ê jīm-bū. Ta̍k-pái ê kīn kū-lī pue-kuè Bo̍k-tshenn hûn tíng-kuân ê jīm-bū lóng-ū sió-khuá-á bô-kâng. Tsit-ki ka-kiông sik-tshái ê iánn-phìnn sī kā 21 tiunn JunoCam hip ê tsīng-thài iánn-siōng, iōng sòo-uī ki-su̍t ha̍p-sîng, sán-sing 125 puē ê sok-sî-liap-iánn iánn-phìnn. Iánn-phìnn uì Bo̍k-tshenn tshut-hiān khai-sí, tse-sī Juno thài-khong-tsûn uì pak-hong pue uá kàu Bo̍k-tshenn ê iánn-siōng. Tán Juno pue uá kàu Bo̍k-tshenn hûn-tíng 3500 kong-lí kuân ê sî-tsūn, thài-khong-tsûn to̍h ē-tàng hip-tio̍h tsit lia̍p tuā-lia̍p kiânn-tshenn tsiok tsē sè-tsiat--ah. Juno pue-kuè se̍h Bo̍k-tshenn tsi̍t liàn ê kng-khu kah àm-tuà, koh-ū tsi̍t-tuā-tui tī Bo̍k-tshenn piáu-bīn kńg-se̍h ê înn-hîng hong-pō, in tuā-pōo-hūn lóng pí Tē-kiû ê hong-thai khah tuā. Juno lī-khui ê sî-tsūn, lán ē-tàng khuànn-tio̍h hiánn-ba̍k ê hái-ti-á-hîng hûn. King-kuè kīn-bo̍k-tiám liáu-āu, Bo̍k-tshenn ē thè kàu khah hn̄g ê sóo-tsāi, tsit-má khuànn--tio̍h ê sī tshut-hiān tī Bo̍k-tshenn lâm-hong bô sù-siông ê hûn. Uī tio̍h beh the̍h-tio̍h su-iàu ê kho-ha̍k tsu-liāu, Juno ē pue-kàu Bo̍k-tshenn piáu-bīn, kīn kah i ê gî-khì ē ti̍t-tsiap thán tī tsiok kiông ê hok-siā ē-té.

[English] Perijove 16: Passing Jupiter

Watch Juno zoom past Jupiter. NASA's robotic spacecraft Juno is continuing on its now month-long, highly-elongated orbits around our Solar System's largest planet. The featured video is from perijove 16, the sixteenth time that Juno passed near Jupiter since it arrived in mid-2016. Each perijove passes near a slightly different part of Jupiter's cloud tops. This color-enhanced video has been digitally composed from 21 JunoCam still images, resulting in a 125-fold time-lapse. The video begins with Jupiter rising as Juno approaches from the north. As Juno reaches its closest view -- from about 3,500 kilometers over Jupiter's cloud tops -- the spacecraft captures the great planet in tremendous detail. Juno passes light zones and dark belts of clouds that circle the planet, as well as numerous swirling circular storms, many of which are larger than hurricanes on Earth. As Juno moves away, the remarkable dolphin-shaped cloud is visible. After the perijove, Jupiter recedes into the distance, now displaying the unusual clouds that appear over Jupiter's south. To get desired science data, Juno swoops so close to Jupiter that its instruments are exposed to very high levels of radiation.

詞彙學習