正向星系 NGC 1232

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Facing NGC 1232
• 影像來源 kah 版權：Neil Corke
• 台文翻譯：An-Li Tsai (NSYSU)

[漢羅] 正向星系 NGC 1232

Úi 咱 銀河系 內底看，NGC 1232 是面對咱 ê 正向星系。 這个大閣媠 ê 捲螺仔星系 差不多有 20 萬光年闊，就 tī 南天 ê 流水星座 波江座遐，kah 咱 ê 距離是 4700 萬光年遠。 這張清楚、多彩 ê 望遠鏡影像 NGC 1232，有包括 這个遙遠 ê 島宇宙 足濟重要 ê 細節。 這个星系 ê 色水 ùi 核心到外口 ê 變化是按呢：星系中心是發黃光 ê 老歲仔恆星，外圍 ê 大支捲螺仔手骨 是少年藍色星團 kah 發紅光 ê 恆星形成區。 NGC 1232 邊仔有一个較細毋過誠顯目 ê 星系伴，是 棍螺仔星系 NGC 1232A。 毋過伊 ê 距離應該是閣較遠，差不多是 3 億光年遐爾遠，按呢伊就無啥可能會 kah NGC 1232 產生交互作用。 是講，彼个顯目、有光尖 ê 恆星是比 NGC 1232 閣較倚咱，伊其實是咱銀河內底 ê 天體。

[POJ] Chiàⁿ-hiòng Seng-hē NGC 1232

Úi lán Gîn-hô-hē lāi-té khòaⁿ, NGC 1232 sī bīn-tùi lán ê chiàⁿ-hiòng seng-hē. Chit-ê tōa koh súi ê kńg-lê-á seng-hē chha-put-to ū 20 bān kng-nî khoah, to̍h tī Lâm-thian ê lâu-chúi seng-chō Pho-kang-chō hiah, kah lán ê kū-lî sī 4700 bān kng-nî hn̄g. Chit-tiuⁿ chheng-chhó, to-chhái ê bōng-oán-kiàⁿ iáⁿ-siōng NGC 1232, ū pau-koat chit-ê iâu-oán ê tó-ú-tiū chiok chē tiōng-iàu ê sè-chiat. Chit-ê seng-hē ê sek-chúi ùi he̍k-sim kàu gōa-kháu ê piàn-hòa sī án-ne: Seng-hē tiong-sim sī hoat n̂g-kng ê lāu-hòe-á hêng-chheⁿ, gōa-ûi ê tōa-ki kńg-lê-á chhiú-kut sī siàu-liân nâ-sek seng-thoân kah hoat âng-kng ê hêng-chheⁿ hêng-sêng-khu. NGC 1232 piⁿ-á ū chi̍t-ê khah sè m̄-koh chiâⁿ hiáⁿ-ba̍k ê seng-hē phōaⁿ, sī kùn-lê-á seng-hē NGC 1232A. M̄-koh i ê kū-lî èng-kai sī koh-khah hn̄g, chha-put-to sī 3 ek kng-nî hiah-nī hn̄g, án-ne i to̍h bô-siáⁿ khó-lêng ē kah NGC 1232 sán-seng kau-hō͘ chok-iōng. Sī-kóng, hit-ê hiáⁿ-ba̍k, ū kng-chiam ê hêng-chheⁿ sī pí NGC 1232 koh-khah óa lán, i kî-si̍t sī lán Gîn-hô lāi-té ê thian-thé.

[KIP] Tsiànn-hiòng Sing-hē NGC 1232

Uí lán Gîn-hô-hē lāi-té khuànn, NGC 1232 sī bīn-tuì lán ê tsiànn-hiòng sing-hē. Tsit-ê tuā koh suí ê kńg-lê-á sing-hē tsha-put-to ū 20 bān kng-nî khuah, to̍h tī Lâm-thian ê lâu-tsuí sing-tsō Pho-kang-tsō hiah, kah lán ê kū-lî sī 4700 bān kng-nî hn̄g. Tsit-tiunn tshing-tshó, to-tshái ê bōng-uán-kiànn iánn-siōng NGC 1232, ū pau-kuat tsit-ê iâu-uán ê tó-ú-tiū tsiok tsē tiōng-iàu ê sè-tsiat. Tsit-ê sing-hē ê sik-tsuí uì hi̍k-sim kàu guā-kháu ê piàn-huà sī án-ne: Sing-hē tiong-sim sī huat n̂g-kng ê lāu-huè-á hîng-tshenn, guā-uî ê tuā-ki kńg-lê-á tshiú-kut sī siàu-liân nâ-sik sing-thuân kah huat âng-kng ê hîng-tshenn hîng-sîng-khu. NGC 1232 pinn-á ū tsi̍t-ê khah sè m̄-koh tsiânn hiánn-ba̍k ê sing-hē phuānn, sī kùn-lê-á sing-hē NGC 1232A. M̄-koh i ê kū-lî ìng-kai sī koh-khah hn̄g, tsha-put-to sī 3 ik kng-nî hiah-nī hn̄g, án-ne i to̍h bô-siánn khó-lîng ē kah NGC 1232 sán-sing kau-hōo tsok-iōng. Sī-kóng, hit-ê hiánn-ba̍k, ū kng-tsiam ê hîng-tshenn sī pí NGC 1232 koh-khah uá lán, i kî-si̍t sī lán Gîn-hô lāi-té ê thian-thé.

[English] Facing NGC 1232

From our vantage point in the Milky Way Galaxy, we see NGC 1232 face-on. Nearly 200,000 light-years across, the big, beautiful spiral galaxy is located some 47 million light-years away in the flowing southern constellation of Eridanus. This sharp, multi-color, telescopic image of NGC 1232 includes remarkable details of the distant island universe. From the core outward, the galaxy’s colors change from the yellowish light of old stars in the center to young blue star clusters and reddish star forming regions along the grand, sweeping spiral arms. NGC 1232’s apparent, small, barred-spiral companion galaxy is cataloged as NGC 1232A. Distance estimates place it much farther though, around 300 million light-years away, and unlikely to be interacting with NGC 1232. Of course, the prominent bright star with the spiky appearance is much closer than NGC 1232 and lies well within our own Milky Way.

詞彙學習（漢羅/POJ/KIP/華語/English）

• 【正向星系】chiàⁿ-hiòng seng-hē/tsiànn-hiòng sing-hē/正向星系/face-on galaxy
• 【NGC 1232】NGC it-jī-sam-jī/NGC it-jī-sam-jī/NGC 1232/NGC 1232
• 【NGC 1232A】NGC it-jī-sam-jī A/NGC it-jī-sam-jī A/NGC 1232A/NGC 1232A
• 【捲螺仔星系】kńg-lê-á seng-hē/kńg-lê-á sing-hē/螺旋星系/spiral galaxy
• 【捲螺仔手骨】kńg-lê-á chhiú-kut/kńg-lê-á tshiú-kut/螺旋手臂、旋臂/spiral arm
• 【棍螺仔星系】kún-lê-á seng-hē/kún-lê-á sing-hē/棒旋星系/barred-spiral galaxy
• 【波江座】Pho-kang-chō/Pho-kang-tsō/波江座/Eridanus
• 【島宇宙】tó-ú-tiū/tó-ú-tiū/島宇宙/island universe
• 【星系伴】seng-hē-phōaⁿ/sing-hē-phuānn/伴星系/companion galaxy
• 【星團】seng-thoân/seng-thoân/星團/star cluster
• 【恆星形成區】hêng-chheⁿ hêng-sêng-khu/hîng-tshenn hîng-sîng-khu/恆星形成區/star forming region
• 【交互作用】kāu-hō͘ chok-iōng/kāu-hōo tsok-iōng/交互作用/interacting
• 【光尖】kng-chiam/kng-chiam/星芒/spike
• 【銀河系】Gîn-hô-hē/Gîn-hô-hē/銀河系/Milky Way Galaxy
• 【老歲仔恆星】lāu-hòe-á hêng-chheⁿ/lāu-huè-á hîng-tshenn/年老恆星/old star