棕樹葉仔投影出來 ê 日偏食

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Palm Tree Partial Eclipse
• 影像來源 kah 版權：Lori Haffelt
• 日食相簿：Notable Submissions to APOD
• 台文翻譯：An-Li Tsai (NSYSU)

[漢羅] 棕樹葉仔投影出來 ê 日偏食

Tī 4 月 8 號這工欲看著日全食，愛 tī 月球烏影行過 ê 狹狹 ê 路線 內底，才看會著。 毋過北美洲大部份 ê 所在，是攏看會著日偏食。 這張 tī 美國 Florida 州 清水市翕–ê 速翕相片，雖罔講無直接翕著日頭，毋過猶是有翕著足濟 tī 北美大部份所在看著 ê 日食現象。 Tī 棕樹 烏影下底 看會著相疊 ê 葉仔，利用 針孔相機 ê 原理，kā 日偏食 ê 半月形 投影 tī 塗跤。 Tī 清水市看著 ê 日食行到 食甚階段 ê 時陣，閘著 ê 日頭差不多閘 53 葩。

[POJ] Chang-chhiū-hio̍h-á tâu-iáⁿ–chhut-lâi ê Ji̍t-phian-si̍t

Tī 4 goe̍h 8 hō chit kang beh khòaⁿ-tio̍h ji̍t-choân-si̍t, ài tī Goe̍h-kiû o͘-iáⁿ kiâⁿ–kòe ê e̍h-e̍h ê lō͘-sòaⁿ lāi-té, chiah khòaⁿ-ē-tio̍h. M̄-koh Pak-bí-chiu tōa-pō͘-hūn ê só͘-chāi, sī lóng khòaⁿ-ē-tio̍h ji̍t-phian-si̍t. Chit-tiuⁿ tī Bí-kok Florida chiu Chheng-chúi-chhī hip–ê sok-hip siòng-phìⁿ, sui-bóng kóng bô ti̍t-chiap hip-tio̍h ji̍t-thâu, m̄-koh iáu-sī ū hip-tio̍h chiok chē tī Pak-bí tōa-pō͘-hūn só͘-chāi khòaⁿ–tio̍h ê ji̍t-si̍t hiān-siōng. Tī chang-chhiū o͘-iáⁿ ē-té khòaⁿ–ē-tio̍h sio-tha̍h ê hio̍h-á, lī-iōng chiam-kháng siòng-ki ê goân-lí, kā ji̍t-phian-si̍t ê pòaⁿ-goe̍h-hêng tâu-iáⁿ tī thô͘-kha. Tī Chheng-chúi-chhī khòaⁿ–tio̍h ê ji̍t-si̍t kiâⁿ kàu si̍t-sīm kai-tōaⁿ ê sî-chūn, cha̍h-tio̍h ê ji̍t-thâu chha-put-to cha̍h 53 pha.

[KIP] Tsang-tshiū-hio̍h-á tâu-iánn–tshut-lâi ê Ji̍t-phian-si̍t

Tī 4 gue̍h 8 hō tsit kang beh khuànn-tio̍h ji̍t-tsuân-si̍t, ài tī Gue̍h-kiû oo-iánn kiânn–kuè ê e̍h-e̍h ê lōo-suànn lāi-té, tsiah khuànn-ē-tio̍h. M̄-koh Pak-bí-tsiu tuā-pōo-hūn ê sóo-tsāi, sī lóng khuànn-ē-tio̍h ji̍t-phian-si̍t. Tsit-tiunn tī Bí-kok Florida tsiu Tshing-tsuí-tshī hip–ê sok-hip siòng-phìnn, sui-bóng kóng bô ti̍t-tsiap hip-tio̍h ji̍t-thâu, m̄-koh iáu-sī ū hip-tio̍h tsiok tsē tī Pak-bí tuā-pōo-hūn sóo-tsāi khuànn–tio̍h ê ji̍t-si̍t hiān-siōng. Tī tsang-tshiū oo-iánn ē-té khuànn–ē-tio̍h sio-tha̍h ê hio̍h-á, lī-iōng tsiam-kháng siòng-ki ê guân-lí, kā ji̍t-phian-si̍t ê puànn-gue̍h-hîng tâu-iánn tī thôo-kha. Tī Tshing-tsuí-tshī khuànn–tio̍h ê ji̍t-si̍t kiânn kàu si̍t-sīm kai-tuānn ê sî-tsūn, tsa̍h-tio̍h ê ji̍t-thâu tsha-put-to tsa̍h 53 pha.

[English] Palm Tree Partial Eclipse

Only those along the narrow track of the Moon’s shadow on April 8 saw a total solar eclipse. But most of North America still saw a partial eclipse of the Sun. From Clearwater, Florida, USA this single snapshot captured multiple images of that more widely viewed celestial event without observing the Sun directly. In the shade of a palm tree, criss-crossing fronds are projecting recognizable eclipse images on the ground, pinhole camera style. In Clearwater the maximum eclipse phase was about 53 percent.

詞彙學習（漢羅/POJ/KIP/華語/English）

• 【日全食】ji̍t-choân-si̍t/ji̍t-tsuân-si̍t/日全食/total solar eclipse
• 【日偏食】ji̍t-phian-si̍t/ji̍t-phian-si̍t/日偏食/partial solar eclipse
• 【棕樹】chang-chhiū/tsang-tshiū/棕櫚樹/Palm Tree
• 【速翕】sok-hip/sok-hip/快照/snapshot
• 【針孔相機】chiam-kháng siòng-ki/tsiam-kháng siòng-ki/針孔相機/pinhole camera
• 【食甚】si̍t-sīm/si̍t-sīm/食甚/maximum eclipse