日食 ê 七張連紲相片

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Eclipse in Seven
• 影像來源 kah 版權：Xiaofeng Tan
• 拜一 ê 日食相簿：Notable Submissions to APOD
• 台文翻譯：An-Li Tsai (NSYSU)

[漢羅] 日食 ê 七張連紲相片

遮是 4 月 8 號 日全食 ê 7 張清楚相片。 7 張是分開翕–ê，ùi 倒爿頂懸開始，你會當看著日全食 ê 規个過程。 這个系列影像是 kā kha-mé-lah 鬥 tī 望遠鏡 頂懸翕–ê。 翕相 ê 地點是 tī 日全食狹狹 ê 日食帶內底，月娘 ê 烏影 就 ùi 美國 Vermont 州 ê Newport 市行過。 中央彼張是壯觀 ê 太陽日冕。 日頭薄薄 ê 外層大氣，干焦會當 tī 日全食，而且愛好天 ê 時陣，才有法度用目睭直接看著。 Ùi Newport 市看–出去，日食 ê 食甚階段 擋差不多 3 分 26 秒 遐爾久。

[POJ] Ji̍t-si̍t ê chhit tiuⁿ liân-sòa siòng-phìⁿ

Chiah sī 4 goe̍h 8 hō ji̍t-choân-si̍t ê 7 tiuⁿ chheng-chhó siòng-phìⁿ. 7 tiuⁿ sī hun-khui hip–ê, ùi tò-pêng téng-koân khai-sí, lí ē-tàng khòaⁿ-tio̍h ji̍t-choân-si̍t ê kui-ê kòe-têng. Chit-ê hē-lia̍t iáⁿ-siōng sī kā kha-mé-lah tàu tī bōng-oán-kiàⁿ téng-koân hip–ê. Hip-siòng ê tē-tiám sī tī ji̍t-choân-si̍t e̍h-e̍h ê ji̍t-si̍t-tòa lāi-té, goe̍h-niû ê o͘-iáⁿ to̍h ùi Bí-kok Vermont chiu ê Newport chhī kiâⁿ-kòe. Tiong-ng hit tiuⁿ sī chòng-koan ê Thài-iông ji̍t-bián. Ji̍t-thâu po̍h-po̍h ê gōa-chân tāi-khì, kan-na ē-tàng tī ji̍t-choân-si̍t, jî-chhiáⁿ ài hó-thiⁿ ê sî-chūn, chiah ū-hoat-tō͘ iōng ba̍k-chiu ti̍t-chiap khòaⁿ-tio̍h. Ùi Newport chhī khòaⁿ–chhut-khì, ji̍t-si̍t ê si̍t-sīm kai-tōaⁿ tòng chha-put-to 3 hun 26 bió hiah-nī kú.

[KIP] Ji̍t-si̍t ê tshit tiunn liân-suà siòng-phìnn

Tsiah sī 4 gue̍h 8 hō ji̍t-tsuân-si̍t ê 7 tiunn tshing-tshó siòng-phìnn. 7 tiunn sī hun-khui hip–ê, uì tò-pîng tíng-kuân khai-sí, lí ē-tàng khuànn-tio̍h ji̍t-tsuân-si̍t ê kui-ê kuè-tîng. Tsit-ê hē-lia̍t iánn-siōng sī kā kha-mé-lah tàu tī bōng-uán-kiànn tíng-kuân hip–ê. Hip-siòng ê tē-tiám sī tī ji̍t-tsuân-si̍t e̍h-e̍h ê ji̍t-si̍t-tuà lāi-té, gue̍h-niû ê oo-iánn to̍h uì Bí-kok Vermont tsiu ê Newport tshī kiânn-kuè. Tiong-ng hit tiunn sī tsòng-kuan ê Thài-iông ji̍t-bián. Ji̍t-thâu po̍h-po̍h ê guā-tsân tāi-khì, kan-na ē-tàng tī ji̍t-tsuân-si̍t, jî-tshiánn ài hó-thinn ê sî-tsūn, tsiah ū-huat-tōo iōng ba̍k-tsiu ti̍t-tsiap khuànn-tio̍h. Uì Newport tshī khuànn–tshut-khì, ji̍t-si̍t ê si̍t-sīm kai-tuānn tòng tsha-put-to 3 hun 26 bió hiah-nī kú.

[English] Eclipse in Seven

Start at the upper left above and you can follow the progress of April 8’s total eclipse of the Sun in seven sharp, separate exposures. The image sequence was recorded with a telescope and camera located within the narrow path of totality as the Moon’s shadow swept across Newport, Vermont, USA. At center is a spectacular view of the solar corona. The tenuous outer atmosphere of the Sun is only easily visible to the eye in clear dark skies during the total eclipse phase. Seen from Newport, the total phase for this solar eclipse lasted about 3 minutes and 26 seconds.

詞彙學習（漢羅/POJ/KIP/華語/English）

• 【日全食】ji̍t-choân-si̍t/ji̍t-tsuân-si̍t/日全食/total solar eclipse
• 【日冕】ji̍t-bián/ji̍t-bián/日冕/corona
• 【日食帶】ji̍t-si̍t-tòa/ji̍t-si̍t-tuà/日食帶/path of totality
• 【大氣】tāi-khì/tāi-khì/大氣/atmosphere
• 【食甚】si̍t-sīm/si̍t-sīm/食甚/total phase