美國 Wyoming 州天頂 ê 日全食

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：A Total Solar Eclipse over Wyoming
• 影像來源 kah 版權：Ben Cooper
• NASA ê 直播：明仔載 ê 日全食
• 台文翻譯：An-Li Tsai (NSYSU)

[漢羅] 美國 Wyoming 州天頂 ê 日全食

明仔載 ê 日全食 敢會拄著好天？ 這个問題已經 tī 足濟想欲看日全食 ê 北美洲人 心內想過幾若擺矣。 這个問題嘛仝款 tī 2017 年 8 月 日全食經過北美 ê 時陣出現。 彼陣 ê 日全食，全食帶 ùi 美國 西岸 ê Oregon 州 到 美國東岸 ê 南 Carolina 州。 毋過，日偏食 kah 明仔載仝款，會經過規个 北美。 是講真不幸，2017年 ê 時陣，足濟所在 ê 日頭攏去予雲閘去矣。 毋過有一个所在有看著，就 tī Wyoming 州 ê Green River 湖 ê 湖邊。 一搭一搭 ê 雲 tī 天頂出現 ê 距離有夠遠，所以才有法度翕出這組 kā 日全食 囥 tī 相片中央 ê 連紲影像。 食甚 ê 時陣，日頭 去予烏暗 ê 月娘 規个閘牢，日冕 ùi 月娘後壁湠出來。 日冕以外 ê 其他部份，是 食甚 進前 kah 了後 ê 日偏食階段。

[POJ] Bí-kok Wyoming chiu thiⁿ-téng ê Ji̍t-choân-si̍t

Bîn-á-chài ê ji̍t-choân-si̍t kám-ē tú-tio̍h hó-thiⁿ? Chit-ê būn-tê í-keng tī chiok chē siūⁿ-beh khòaⁿ ji̍t-choân-si̍t ê Pak-bí-chiu lâng sim-lāi siūⁿ-kòe kúi-nā pái--ah. Chit-ê būn-tê mah kāng-khoán tī 2017 nî ji̍t-choân-si̍t keng-kòe Pak-bí ê sî-chūn chhut-hiān. Hit-chūn ê ji̍t-choân-si̍t, choân-si̍t-tòa ùi Bí-kok se-hōaⁿ ê Oregon chiu kàu Bí-kok tang-hōaⁿ ê Lâm Carolina chiu. M̄-koh, ji̍t-phian-si̍t kah miâ-á-chài kāng-khoán, ē keng-kòe kui-ê Pak-bí. Sī-kóng chin put-hēng, 2017 nî ê sî-chūn, chiok chē só͘-chāi ê ji̍t-thâu lóng khì hô͘ hûn cha̍h--khì--ah. M̄-koh ū chi̍t-ê só͘-chāi ū khòaⁿ--tio̍h, tō tī Wyoming chiu ê Green River ô͘ ê ô͘-piⁿ. Chi̍t tah chi̍t tah ê hûn tī thiⁿ-téng chhut-hiān ê kū-lî ū-kàu hn̄g, só͘-í chiah ū-hoat-tō͘ hip chhut chit cho͘ kā ji̍t-choân-si̍t khǹg tī siòng-phìⁿ tiong-ng ê liân-sòa iáⁿ-siōng. Si̍t-sīm ê sî-chūn, ji̍t-thâu khì hō͘ o͘-àm ê goe̍h-niû kui-ê cha̍h-tiâu, ji̍t-bián ùi goe̍h-niû āu-piah thòaⁿ--chhut-lâi. Ji̍t-bián í-gōa ê kî-thaⁿ pō͘-hūn, sī si̍t-sīm chìn-chêng kah liáu-āu ê ji̍t-phian-si̍t kai-tōaⁿ.

[KIP] Bí-kok Wyoming tsiu thinn-tíng ê Ji̍t-tsuân-si̍t

Bîn-á-tsài ê ji̍t-tsuân-si̍t kám-ē tú-tio̍h hó-thinn? Tsit-ê būn-tê í-king tī tsiok tsē siūnn-beh khuànn ji̍t-tsuân-si̍t ê Pak-bí-tsiu lâng sim-lāi siūnn-kuè kuí-nā pái--ah. Tsit-ê būn-tê mah kāng-khuán tī 2017 nî ji̍t-tsuân-si̍t king-kuè Pak-bí ê sî-tsūn tshut-hiān. Hit-tsūn ê ji̍t-tsuân-si̍t, tsuân-si̍t-tuà uì Bí-kok se-huānn ê Oregon tsiu kàu Bí-kok tang-huānn ê Lâm Carolina tsiu. M̄-koh, ji̍t-phian-si̍t kah miâ-á-tsài kāng-khuán, ē king-kuè kui-ê Pak-bí. Sī-kóng tsin put-hīng, 2017 nî ê sî-tsūn, tsiok tsē sóo-tsāi ê ji̍t-thâu lóng khì hôo hûn tsa̍h--khì--ah. M̄-koh ū tsi̍t-ê sóo-tsāi ū khuànn--tio̍h, tō tī Wyoming tsiu ê Green River ôo ê ôo-pinn. Tsi̍t tah tsi̍t tah ê hûn tī thinn-tíng tshut-hiān ê kū-lî ū-kàu hn̄g, sóo-í tsiah ū-huat-tōo hip tshut tsit tsoo kā ji̍t-tsuân-si̍t khǹg tī siòng-phìnn tiong-ng ê liân-suà iánn-siōng. Si̍t-sīm ê sî-tsūn, ji̍t-thâu khì hōo oo-àm ê gue̍h-niû kui-ê tsa̍h-tiâu, ji̍t-bián uì gue̍h-niû āu-piah thuànn--tshut-lâi. Ji̍t-bián í-guā ê kî-thann pōo-hūn, sī si̍t-sīm tsìn-tsîng kah liáu-āu ê ji̍t-phian-si̍t kai-tuānn.

[English] A Total Solar Eclipse over Wyoming

Will the sky be clear enough to see the eclipse? This question is already on the minds of many North Americans hoping to see tomorrow's solar eclipse. This question was also on the mind of many people attempting to see the total solar eclipse that crossed North America in August 2017. Then, the path of total darkness shot across the mainland of the USA from coast to coast, from Oregon to South Carolina -- but, like tomorrow's event, a partial eclipse occurred above most of North America. Unfortunately, in 2017, many locations saw predominantly clouds. One location that did not was a bank of the Green River Lakes, Wyoming. Intermittent clouds were far enough away to allow the center image of the featured composite sequence to be taken, an image that shows the corona of the Sun extending out past the central dark Moon that blocks our familiar Sun. The surrounding images show the partial phases of the solar eclipse both before and after totality.

詞彙學習