北半球春天 ê Pons-Brooks 彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Comet Pons-Brooks in Northern Spring
• 影像來源 kah 版權：Petr Horálek / Institute of Physics in Opava
• 台文翻譯：An-Li Tsai (NSYSU)

[漢羅] 北半球春天 ê Pons-Brooks 彗星

Tùi 北半球 ê 觀星者來講，春天愈倚，彗星 12P，嘛叫做 Pons-Brooks 彗星，就會愈來愈光。 目前咱會當用細台望遠鏡 kah 雙筒千里鏡 看著 這粒 哈雷型彗星。 Tī 未來幾若禮拜，伊 ê 光度會光甲咱會當直接用目睭看著。 這張 取景袂䆀 ê 夜空相片，是 3 月 5 號深夜 tī Slovakia 共和國 Revuca 鎮 翕--ê。 雖罔講天頂有薄薄 ê 霧，毋過咱抑是會當看著這粒彗星 青色 ê 彗鬚 kah 伊長長 ê 彗尾，出現 tī 地平線附近。 仙女座星系 M31，kah 光爍爍 ê 黃色恆星 奎宿九，嘛叫做 仙女座 beta，就出現 tī 這粒彗星 ê 頂懸。 仙女座星系 kah 咱銀河 ê 距離差不多是 250 萬光年。 Pons-Brooks 彗星是一个週期性彗星，伊會行到內太陽系，離咱袂超過 14 光分遠 ê 所在。 這粒彗星 ê 近日點會發生 tī 4 月 21，而且 tī 4 月 8 號 日全食 ê 時陣，嘛會當 tī 天頂看著伊。

[POJ] Pak-pòaⁿ-kiû chhun-thiⁿ ê Pons-Brooks hūi-chheⁿ

Tùi pak-pòaⁿ-kiû ê koan-seng-chiá lâi-kóng, chhun-thiⁿ jú óa, hūi-chheⁿ 12P, mā kiò-chò Pons-Brooks hūi-chheⁿ, to̍h ē lú-lâi-lú kng. Bo̍k-chêng lán ē-tàng iōng sè-tâi bōng-oán-kiàⁿ kah siang-tâng chhian-lí-kiàⁿ khòaⁿ-tio̍h chit lia̍p Ha-lûi-hêng hūi-chheⁿ. Tī bī-lâi kúi-nā lé-pài, i ê kng-tō͘ ē kng kah lán ē-tàng ti̍t-chiap iōng ba̍k-chiu khòaⁿ-tio̍h. Chit-tiuⁿ chhú-kéng bē-bái ê iā-khong siòng-phìⁿ, sī 3 goe̍h 5 hō chhim-iā tī Slovakia kiōng-hô-kok Revuca tìn hip--ê. Sui-bóng kóng thiⁿ-téng ū po̍h-po̍h ê bū, m̄-koh lán ia̍h-sī ē-tàng khòaⁿ-tio̍h chit lia̍p hūi-chheⁿ chheⁿ-sek ê hūi-chhiu kah i tn̂g-tn̂g ê hūi-bóe, chhut-hiān tī tē-pêng-sòaⁿ hù-kīn. Sian-lú-chō Seng-hē M̀1, kah kng-sih-sih ê n̂g-sek hêng-chheⁿ Ke-siù-kiú, mā kiò-chò Sian-lú-chō beta, to̍h chhut-hiān tī chit lia̍p hūi-chheⁿ ê téng-koân. Sian-lú-chō Seng-hē kah lán Gîn-hô ê kū-lî chha-put-to sī 250 bān kng-nî. Pons-Brooks hūi-chheⁿ sī chi̍t-ê chiu-kî-sèng hūi-chheⁿ, i ē kiâⁿ kàu Lāi Thài-iông-hē, lī lán bē chhiau-kòe 14 kng-hun hn̄g ê só͘-chāi. Chit lia̍p hūi-chheⁿ ê kīn-ji̍t-tiám ē hoat-seng tī 4 goe̍h 21, jî-chhiáⁿ tī 4 goe̍h 8 hō ji̍t-choân-si̍t ê sî-chūn, mā ē-tàng tī thiⁿ-téng khòaⁿ-tio̍h i.

[KIP] Pak-puànn-kiû tshun-thinn ê Pons-Brooks huī-tshenn

Tuì pak-puànn-kiû ê kuan-sing-tsiá lâi-kóng, tshun-thinn jú uá, huī-tshenn 12P, mā kiò-tsò Pons-Brooks huī-tshenn, to̍h ē lú-lâi-lú kng. Bo̍k-tsîng lán ē-tàng iōng sè-tâi bōng-uán-kiànn kah siang-tâng tshian-lí-kiànn khuànn-tio̍h tsit lia̍p Ha-luî-hîng huī-tshenn. Tī bī-lâi kuí-nā lé-pài, i ê kng-tōo ē kng kah lán ē-tàng ti̍t-tsiap iōng ba̍k-tsiu khuànn-tio̍h. Tsit-tiunn tshú-kíng bē-bái ê iā-khong siòng-phìnn, sī 3 gue̍h 5 hō tshim-iā tī Slovakia kiōng-hô-kok Revuca tìn hip--ê. Sui-bóng kóng thinn-tíng ū po̍h-po̍h ê bū, m̄-koh lán ia̍h-sī ē-tàng khuànn-tio̍h tsit lia̍p huī-tshenn tshenn-sik ê huī-tshiu kah i tn̂g-tn̂g ê huī-bué, tshut-hiān tī tē-pîng-suànn hù-kīn. Sian-lú-tsō Sing-hē M31, kah kng-sih-sih ê n̂g-sik hîng-tshenn Ke-siù-kiú, mā kiò-tsò Sian-lú-tsō beta, to̍h tshut-hiān tī tsit lia̍p huī-tshenn ê tíng-kuân. Sian-lú-tsō Sing-hē kah lán Gîn-hô ê kū-lî tsha-put-to sī 250 bān kng-nî. Pons-Brooks huī-tshenn sī tsi̍t-ê tsiu-kî-sìng huī-tshenn, i ē kiânn kàu Lāi Thài-iông-hē, lī lán bē tshiau-kuè 14 kng-hun hn̄g ê sóo-tsāi. Tsit lia̍p huī-tshenn ê kīn-ji̍t-tiám ē huat-sing tī 4 gue̍h 21, jî-tshiánn tī 4 gue̍h 8 hō ji̍t-tsuân-si̍t ê sî-tsūn, mā ē-tàng tī thinn-tíng khuànn-tio̍h i.

[English] Comet Pons-Brooks in Northern Spring

As spring approaches for northern skygazers, Comet 12P/Pons-Brooks is growing brighter. Currently visible with small telescopes and binoculars, the Halley-type comet could reach naked eye visibility in the coming weeks. Seen despite a foggy atmosphere, the comet's green coma and long tail hover near the horizon in this well-composed deep night skyscape from Revuca, Slovakia recorded on March 5. M31, also known as the Andromeda galaxy, and bright yellowish star Mirach, beta star of the constellation Andromeda, hang in the sky above the comet. The Andromeda galaxy is some 2.5 million light-years beyond the Milky Way. Comet Pons-Brooks is a periodic visitor to the inner Solar System and less than 14 light-minutes away. Reaching its perihelion on April 21, this comet should be visible in the sky during the April 8 total solar eclipse.

詞彙學習