日全食 ê 即時特寫

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：A Total Solar Eclipse Close-Up in Real Time
• 影像來源 kah 版權：Jun Ho Oh (KAIST, HuboLab);音樂：Flowing Air by Mattia Vlad Morleo
• 台文翻譯：An-Li Tsai (NSYSU)

[漢羅] 日全食 ê 即時特寫

日頭若是消失去，你會有啥物感覺？ 2017 年 tī 美國各地 有足濟日食觀測者，看著日頭暫時消失 tī 月娘後壁 ê 時陣，tùi in 家己 ê 反應感覺掣一趒，因為 in tùi 這个景色感覺著 ê 是敬畏。 可能本底 in 是想講，天色變暗只是一个短短 ê 時間爾爾，毋過出現 ê 景色煞 予人 無法度放袂記。 這寡景色包括一目𥍉就變做暗暝 ê 天色、月盤邊緣媠甲予人袂喘氣 ê Baily 珠、粉紅仔色 ê 日珥、kah tī 規个天頂湠–開 ê 日冕。 這寡細節，攏 tī 這个 2017 年 ê 日全食 3 分鐘即時影片 內底 出現。 這支影片 是 tī 美國 Oregon 州 溫泉鎮 翕–ê，是用 Jun Ho Oh 特別設計 ê 設備，tī 日全食過程中，觀察日頭邊緣 ê 細節。 影片欲煞 ê 時陣，日頭 會 ùi 月娘 後壁 ê 另外一爿出現、離開。 後閣月 ê 4 月 8 號，tī 北美洲 狹狹 ê 日食帶內，會閣看著 另外一个日全食。

[POJ] Ji̍t-choân-si̍t ê chek-sî te̍k-siá

Ji̍t-thâu nā-sī siau-sit khì, lí ē ū siáⁿ-mih kám-kak? 2017 nî tī Bí-kok kok-tē ū chiok chē ji̍t-si̍t koan-chhek chiá, khòaⁿ-tio̍h ji̍t-thâu chiām-sî siau-sit tī goe̍h-niû āu-piah ê sî-chūn, tùi in ka-kī ê hoán-èng kám-kak chhoah-chi̍t-tiô, in-ūi in tùi chit-ê kéng-sek kám-kak-tio̍h ê sī kèng-ùi. Khó-lêng pún-té in sī siūⁿ-kóng, thiⁿ-sek piàn àm chí-sī chi̍t-ê té-té ê sî-kan niā-niā, m̄-koh chhut-hiān ê kéng-sek soah hō͘ lâng bô-hoat-tō͘ pàng bē-kì. Chit-kóa kéng-sek pau-koat chi̍t-ba̍k-nih to̍h piàn-chò àm-mê ê thiⁿ-sek, goe̍h-pôaⁿ pian-iân súi kah hō͘ lâng bōe chhoán-khùi ê Baily chu, hún-âng-á-sek ê ji̍t-ní, kah tī kui-ê thiⁿ-téng thòaⁿ–khui ê ji̍t-bián. Chit kóa sè-chiat, lóng tī chit-ê 2017 nî ê ji̍t-choân-si̍t 3 hun-cheng chek-sî iáⁿ-phìⁿ lāi-té chhut-hiān. Chit-ki iáⁿ-phìⁿ sī tī Bí-kok Oregon chiu un-chôaⁿ tìn hip–ê, sī iōng Jun Ho Oh te̍k-pia̍t siat-kè ê siat-pī, tī ji̍t-choân-si̍t kòe-têng-tiong, koan-chhat ji̍t-thâu pian-iân ê sè-chiat. Iáⁿ-phìⁿ beh soah ê sî-chūn, ji̍t-thâu ē ùi goe̍h-niû āu-piah ê lēng-gōa chi̍t-pêng chhut-hiān, lī-khui. Āu koh goe̍h ê 4 goe̍h 8 hō, tī Pak-bí-chiu e̍h-e̍h ê ji̍t-si̍t-tòa lāi, ē koh khòaⁿ-tio̍h lēng-gōa chi̍t-ê ji̍t-choân-si̍t.

[KIP] Ji̍t-tsuân-si̍t ê tsik-sî ti̍k-siá

Ji̍t-thâu nā-sī siau-sit khì, lí ē ū siánn-mih kám-kak? 2017 nî tī Bí-kok kok-tē ū tsiok tsē ji̍t-si̍t kuan-tshik tsiá, khuànn-tio̍h ji̍t-thâu tsiām-sî siau-sit tī gue̍h-niû āu-piah ê sî-tsūn, tuì in ka-kī ê huán-ìng kám-kak tshuah-tsi̍t-tiô, in-uī in tuì tsit-ê kíng-sik kám-kak-tio̍h ê sī kìng-uì. Khó-lîng pún-té in sī siūnn-kóng, thinn-sik piàn àm tsí-sī tsi̍t-ê té-té ê sî-kan niā-niā, m̄-koh tshut-hiān ê kíng-sik suah hōo lâng bô-huat-tōo pàng bē-kì. Tsit-kuá kíng-sik pau-kuat tsi̍t-ba̍k-nih to̍h piàn-tsò àm-mê ê thinn-sik, gue̍h-puânn pian-iân suí kah hōo lâng buē tshuán-khuì ê Baily tsu, hún-âng-á-sik ê ji̍t-ní, kah tī kui-ê thinn-tíng thuànn–khui ê ji̍t-bián. Tsit kuá sè-tsiat, lóng tī tsit-ê 2017 nî ê ji̍t-tsuân-si̍t 3 hun-tsing tsik-sî iánn-phìnn lāi-té tshut-hiān. Tsit-ki iánn-phìnn sī tī Bí-kok Oregon tsiu un-tsuânn tìn hip–ê, sī iōng Jun Ho Oh ti̍k-pia̍t siat-kè ê siat-pī, tī ji̍t-tsuân-si̍t kuè-tîng-tiong, kuan-tshat ji̍t-thâu pian-iân ê sè-tsiat. Iánn-phìnn beh suah ê sî-tsūn, ji̍t-thâu ē uì gue̍h-niû āu-piah ê līng-guā tsi̍t-pîng tshut-hiān, lī-khui. Āu koh gue̍h ê 4 gue̍h 8 hō, tī Pak-bí-tsiu e̍h-e̍h ê ji̍t-si̍t-tuà lāi, ē koh khuànn-tio̍h līng-guā tsi̍t-ê ji̍t-tsuân-si̍t.

[English] A Total Solar Eclipse Close-Up in Real Time

How would you feel if the Sun disappeared? Many eclipse watchers across the USA surprised themselves in 2017 with the awe that they felt and the exclamations that they made as the Sun momentarily disappeared behind the Moon. Perhaps expecting just a brief moment of dusk, the spectacle of unusually rapid darkness, breathtakingly bright glowing beads around the Moon’s edge, shockingly pink solar prominences, and a strangely detailed corona stretching across the sky caught many a curmudgeon by surprise. Many of these attributes were captured in the featured real-time, three-minute video of 2017’s total solar eclipse. The video frames were acquired in Warm Springs, Oregon with equipment specifically designed by Jun Ho Oh to track a close-up of the Sun’s periphery during eclipse. As the video ends, the Sun is seen being reborn on the other side of the Moon from where it departed. Next month, on April 8th, a new total solar eclipse will be visible in a thin band across North America.

詞彙學習（漢羅/POJ/KIP/華語/English）

• 【日全食】ji̍t-choân-si̍t/ji̍t-tsuân-si̍t/日全食/total solar eclipse
• 【即時】chek-sî/tsik-sî/即時/real-time
• 【特寫】te̍k-siá/ti̍k-siá/特寫/close-up
• 【日食】ji̍t-si̍t/ji̍t-si̍t/日食/solar eclipse
• 【月盤】goe̍h-pôaⁿ/gue̍h-puânn/月盤/lunar disk
• 【Baily 珠】Baily chu/Baily tsu/貝里珠/Baily’s beads
• 【日珥】ji̍t-ní/ji̍t-ní/日珥/solar prominences
• 【日冕】ji̍t-bián/ji̍t-bián/日冕/solar corona