火星 衛星 kah 衛星之間 ê 互食

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Martian Moon Eclipses Martian Moon
• 影片來源：ESA, DLR, FU Berlin, Mars Express; 資料處理 & CC BY 2.0 License: Andrea Luck
• 台文翻譯：An-Li Tsai (NSYSU)

[漢羅] 火星 衛星 kah 衛星之間 ê 互食

天頂若是有兩粒月娘，而且 in 互相 kā 另外一粒閘去，會是啥物狀況？ 這款狀況就發生 tī 火星。 這支影片 就紀錄著太空中這款無四常 ê 現象。 相片內底 是火星 ê 兩粒衛星。 較大粒 ê 是 火衛一 Phobos，伊踅這粒紅色行星 ê 軌道較近。 較細粒 ê 是 火衛二 Deimos，伊踅 ê 軌道較遠。 這个系列影像 是舊年 歐洲太空總署 ESA 一台踅 火星 ê 機器人太空船 火星快車號 翕–ê。 火星表面嘛 會當看著互食景色，毋過較罕得看著。 Ùi 火星表面看，較倚 ê 衛星 Phobos 會 ùi 較遠 ê 衛星 Deimos 面頭前行過。 較趣味 ê 是，Phobos 踅火星是遮爾倚，所以伊 ê 公轉週期煞比火星 ê 自轉週期閣較緊。 Kah 地球 ê 月娘 相比，變做是西爿 peh 起來，東爿沉落去，就親像是 Phobos tī 天頂咧 倒退攄。 Phobos 是上倚火星 ê 衛星，伊踅火星 ê 速度是遮爾緊，緊甲逐工會 ùi 火星天頂經過 3 擺。

[POJ] Hóe-chheⁿ ōe-chheⁿ kah ōe-chheⁿ chi-kan ê hō͘-si̍t

Thiⁿ-téng nā-sī ū nn̄g lia̍p goe̍h-niû, jî-chhiáⁿ in hō͘-siōng kā lēng-gōa chi̍t-lia̍p cha̍h khì, ē sī siáⁿ-mih chōng-hóng? Chit-khoán chōng-hóng to̍h hoat-seng tī Hóe-chheⁿ. Chit-ki iáⁿ-phìⁿ to̍h kí-lio̍k tio̍h thài-khong tiong chit-khoán bô sù-siông ê hiān-siōng. Siòng-phìⁿ lāi-té sī Hóe-chheⁿ ê nn̄g lia̍p ōe-chheⁿ. Khah tōa-lia̍p ê sī Hóe-ōe-it Phobos, i se̍h chit lia̍p âng-sek kiâⁿ-chheⁿ ê kúi-tō khah kīn. Khah sè-lia̍p ê sī Hóe-ōe-jī Deimos, i se̍h ê kúi-tō khah hn̄g. Chit-ê hē-lia̍t iáⁿ-siōng sī kū-nî Au-chiu thài-khong chóng sú ESA chi̍t tâi se̍h Hóe-chheⁿ ê ke-khì-lâng thài-khong-chûn Hóe-chheⁿ Khoài-chhia-hō hip–ê. Hóe-chheⁿ piáu-bīn mā ē-tàng khòaⁿ-tio̍h lūi-sū ê hō͘-si̍t kéng-sek, m̄-koh khah hán-tit khòaⁿ–tio̍h. Ùi Hóe-chheⁿ Piáu-bīn khòaⁿ, khah óa ê ōe-chheⁿ Phobos ē ùi khah hn̄g ê ōe-chheⁿ Deimos bīn-thâu-chêng kiâⁿ–kòe. Khah chhù-bī ê sī, Phobos se̍h Hóe-chheⁿ sī chiah-nī óa, só͘-í i ê kong-choán chiu-kî soah pí Hóe-chheⁿ ê chū-choán chiu-kî koh khah kín. Kah Tē-kiû ê goe̍h-niû sio-pí, piàn-chò sī sai-pêng peh–khí-lâi, tang-pêng tîm–lo̍h-khì, to̍h chhin-chhiūⁿ sī Phobos tī thiⁿ-téng teh tò-thè-lu. Phobos sī siōng óa Hóe-chheⁿ ê ōe-chheⁿ, i se̍h Hóe-chheⁿ ê sok-tō͘ sī chiah-nī kín, kín kah ta̍k-kang ē ùi Hóe-chheⁿ thiⁿ-téng keng-kòe 3 pái.

[KIP] Hué-tshenn uē-tshenn kah uē-tshenn tsi-kan ê hōo-si̍t

Thinn-tíng nā-sī ū nn̄g lia̍p gue̍h-niû, jî-tshiánn in hōo-siōng kā līng-guā tsi̍t-lia̍p tsa̍h khì, ē sī siánn-mih tsōng-hóng? Tsit-khuán tsōng-hóng to̍h huat-sing tī Hué-tshenn. Tsit-ki iánn-phìnn to̍h kí-lio̍k tio̍h thài-khong tiong tsit-khuán bô sù-siông ê hiān-siōng. Siòng-phìnn lāi-té sī Hué-tshenn ê nn̄g lia̍p uē-tshenn. Khah tuā-lia̍p ê sī Hué-uē-it Phobos, i se̍h tsit lia̍p âng-sik kiânn-tshenn ê kuí-tō khah kīn. Khah sè-lia̍p ê sī Hué-uē-jī Deimos, i se̍h ê kuí-tō khah hn̄g. Tsit-ê hē-lia̍t iánn-siōng sī kū-nî Au-tsiu thài-khong tsóng sú ESA tsi̍t tâi se̍h Hué-tshenn ê ke-khì-lâng thài-khong-tsûn Hué-tshenn Khuài-tshia-hō hip–ê. Hué-tshenn piáu-bīn mā ē-tàng khuànn-tio̍h luī-sū ê hōo-si̍t kíng-sik, m̄-koh khah hán-tit khuànn–tio̍h. Uì Hué-tshenn Piáu-bīn khuànn, khah uá ê uē-tshenn Phobos ē uì khah hn̄g ê uē-tshenn Deimos bīn-thâu-tsîng kiânn–kuè. Khah tshù-bī ê sī, Phobos se̍h Hué-tshenn sī tsiah-nī uá, sóo-í i ê kong-tsuán tsiu-kî suah pí Hué-tshenn ê tsū-tsuán tsiu-kî koh khah kín. Kah Tē-kiû ê gue̍h-niû sio-pí, piàn-tsò sī sai-pîng peh–khí-lâi, tang-pîng tîm–lo̍h-khì, to̍h tshin-tshiūnn sī Phobos tī thinn-tíng teh tò-thè-lu. Phobos sī siōng uá Hué-tshenn ê uē-tshenn, i se̍h Hué-tshenn ê sok-tōo sī tsiah-nī kín, kín kah ta̍k-kang ē uì Hué-tshenn thinn-tíng king-kuè 3 pái.

[English] Martian Moon Eclipses Martian Moon

What if there were two moons in the sky – and they eclipsed each other? This happens on Mars. The featured video shows a version of this unusual eclipse from space. Pictured are the two moons of Mars: the larger Phobos, which orbits closer to the red planet, and the smaller Deimos, which orbits further out. The sequence was captured last year by the ESA’s Mars Express, a robotic spacecraft that itself orbits Mars. A similar eclipse is visible from the Martian surface, although very rarely. From the surface, though, the closer moon Phobos would appear to pass in front of farther moon Deimos. Most oddly, Phobos orbits Mars so close that it appears to move backwards when compared to Earth’s Moon from Earth, rising in west and setting in the east. Phobos, the closer moon, orbits so close and so fast that it passes nearly overhead about three times a day.

詞彙學習（漢羅/POJ/KIP/華語/English）

• 【火星】Hóe-chheⁿ/Hué-tshenn/火星/Mars
• 【互食】hō͘-si̍t/hōo-si̍t/互食/eclipsed each other
• 【火衛一 Phobos】Hòe-ōe-it/Huè-uē-it/火衛一/Phobos
• 【火衛二 Deimos】Hòe-ōe-jī/Huè-uē-jī/火衛二/Deimos
• 【火星快車號】Hóe-chheⁿ Khoài-chhia-hō/Hué-tshenn Khuài-tshia-hō/火星快車號/Mars Express