獨創號直升機 歹去 ê 車葉仔 ê 烏影

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Shadow of Ingenuity's Damaged Rotor Blade
• 影像來源：NASA, JPL-Caltech, Ingenuity
• 台文翻譯：An-Li Tsai (NSYSU)

[漢羅] 獨創號直升機 歹去 ê 車葉仔 ê 烏影

2024 年 1 月 18，是自動控制 ê 火星獨創號直升機 第 72 擺 tī 火星薄薄 ê 大氣層內底飛。 伊飛到這粒 紅色行星頂懸 12 公尺懸 ê 所在，停 4.5 秒鐘 ê 時間。 獨創號 ê 第 72 擺降落並無順利。 降落 ê 過程，伊 kah 毅力號探測車 tī 火星表面 1 公尺懸 ê 所在失去聯絡。 等有通重新聯絡了後，獨創號才會使送這寡影像轉來。 相片是其中一片車葉仔 ê 烏影，可能是 tī 降落過程創歹去矣。 所以，這个歷史上有名 ê 獨創號，就 tī 這 1000 外工探索火星了後，結束伊 ê 飛行任務，超過本底按算 欲飛 ê 時間閣較久。 火星獨創號直升機 ê 小名叫做 Ginny。 2021 年 4 月 19 開始，伊就是地球以外行星，頭一台會當控制 ê 飛行器。 發射進前，獨創號 ê 太陽能枋 下底，閣黏一塊 人類歷史上頭一台動力控制 ê 飛龍機，Wright 兄弟 1 號，倒爿下底機翼 ê 材料。

[POJ] To̍k-chhòng-hō Ti̍t-seng-ki pháiⁿ-khì ê chhia-hio̍h-á ê o͘-iáⁿ

2024 nî 1 goe̍h 18, sī chū-tōng khòng-chè ê Hóe-chheⁿ To̍k-chhòng-hō Ti̍t-seng-ki tē 72 pái tī Hóe-chheⁿ po̍h-po̍h ê tāi-khì-chân lāi-té poe. I poe-kàu chit lia̍p âng-sek hêng-chheⁿ téng-koân 12 kong-chhioh koân ê só͘-chāi, thêng 4.5 bió-cheng ê sî-kan. To̍k-chhòng-hō ê tē 72 pái kàng-lo̍h pēng bô sūn-lī. Kàng-loh ê kòe-têng, i kah Gē-le̍k-hō thàm-chhek-chhia tī Hóe-chheⁿ piáu-bīn 1 kong-chhioh koân ê só͘-chāi sit-khì liân-lo̍k. Tán ū-thang tiông-sin liân-lo̍k liáu-āu, To̍k-chhòng-hō chiah ē-sái sàng chit kóa iáⁿ-siōng tńg-lâi. Siòng-phìⁿ sī kî-tiong chi̍t phìⁿ chhia-hio̍h-á ê o͘-iáⁿ, khó-lêng sī tī kàng-lo̍h kòe-têng chhòng pháiⁿ--khì-ah. Só͘-í, chit-ê le̍k-sú-siōng ū-miâ ê To̍k-chhòng-hō, tō tī che 1000 gōa kang thàm-soh Hóe-chheⁿ liáu-āu, kiat-sok i ê hui-hêng jīm-bū, chhiau-kòe pún-té àn-sǹg beh poe ê sî-kan koh-khah kú. Hóe-chheⁿ To̍k-chhòng-hō Ti̍t-seng-ki ê sió-miâ kiò-chò Ginny. 2021 nî 4 goe̍h 19 khai-sí, i to̍h-sī Tē-kiû í-gōa hêng-chheⁿ, thâu chi̍t tâi ē-tàng khòng-chè ê hui-hêng-khì. Hoat-siā chìn-chêng, To̍k-chhòng-hō ê thài-iông-lêng-pang ē-té, koh liâm chi̍t-tè jîn-lūi le̍k-sú-siōng thâu chi̍t tâi tāng-le̍k khòng-chè ê poe-lêng-ki, Wright hiaⁿ-tī 1 hō, tò-pêng ē-té ki-e̍k ê châi-liāu.

[KIP] To̍k-tshòng-hō Ti̍t-sing-ki pháinn-khì ê tshia-hio̍h-á ê oo-iánn

2024 nî 1 gue̍h 18, sī tsū-tōng khòng-tsè ê Hué-tshenn To̍k-tshòng-hō Ti̍t-sing-ki tē 72 pái tī Hué-tshenn po̍h-po̍h ê tāi-khì-tsân lāi-té pue. I pue-kàu tsit lia̍p âng-sik hîng-tshenn tíng-kuân 12 kong-tshioh kuân ê sóo-tsāi, thîng 4.5 bió-tsing ê sî-kan. To̍k-tshòng-hō ê tē 72 pái kàng-lo̍h pīng bô sūn-lī. Kàng-loh ê kuè-tîng, i kah Gē-li̍k-hō thàm-tshik-tshia tī Hué-tshenn piáu-bīn 1 kong-tshioh kuân ê sóo-tsāi sit-khì liân-lo̍k. Tán ū-thang tiông-sin liân-lo̍k liáu-āu, To̍k-tshòng-hō tsiah ē-sái sàng tsit kuá iánn-siōng tńg-lâi. Siòng-phìnn sī kî-tiong tsi̍t phìnn tshia-hio̍h-á ê oo-iánn, khó-lîng sī tī kàng-lo̍h kuè-tîng tshòng pháinn--khì-ah. Sóo-í, tsit-ê li̍k-sú-siōng ū-miâ ê To̍k-tshòng-hō, tō tī tse 1000 guā kang thàm-soh Hué-tshenn liáu-āu, kiat-sok i ê hui-hîng jīm-bū, tshiau-kuè pún-té àn-sǹg beh pue ê sî-kan koh-khah kú. Hué-tshenn To̍k-tshòng-hō Ti̍t-sing-ki ê sió-miâ kiò-tsò Ginny. 2021 nî 4 gue̍h 19 khai-sí, i to̍h-sī Tē-kiû í-guā hîng-tshenn, thâu tsi̍t tâi ē-tàng khòng-tsè ê hui-hîng-khì. Huat-siā tsìn-tsîng, To̍k-tshòng-hō ê thài-iông-lîng-pang ē-té, koh liâm tsi̍t-tè jîn-luī li̍k-sú-siōng thâu tsi̍t tâi tāng-li̍k khòng-tsè ê pue-lîng-ki, Wright hiann-tī 1 hō, tò-pîng ē-té ki-i̍k ê tsâi-liāu.

[English] The Shadow of Ingenuity's Damaged Rotor Blade

On January 18, 2024, during its 72nd flight in the thin Martian atmosphere, autonomous Mars Helicopter Ingenuity rose to an altitude of 12 meters (40 feet) and hovered for 4.5 seconds above the Red Planet. Ingenuity's 72nd landing was a rough one though. During descent it lost contact with the Perseverance rover about 1 meter above the Martian surface. Ingenuity was able to transmit this image after contact was re-established, showing the shadow of one of its rotor blades likely damaged during landing. And so, after wildly exceeding expectations during over 1,000 days of exploring Mars, the history-making Ingenuity has ended its flight operations. Nicknamed Ginny, Mars Helicopter Ingenuity became the first aircraft to achieve powered, controlled flight on another planet on April 19, 2021. Before launch, a small piece of material from the lower-left wing of the Wright Brothers Flyer 1, the first aircraft to achieve powered, controlled flight on planet Earth, was fixed to the underside of Ingenuity's solar panel.

詞彙學習