心形 ê 蝶仔鬚星系

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Heart Shaped Antennae Galaxies
• 影像來源 kah 版權：Kent E. Biggs
• 開放科學：Browse 3,300+ codes in the Astrophysics Source Code Library
• 台文翻譯：An-Li Tsai (NSYSU)

[漢羅] 心形 ê 蝶仔鬚星系

這 2 个星系敢真正咧互相吸引？ 是真--ê 啦！ In 是 重力相吸，才會造成這馬你看著 ê 這个足有名 ê 大型 心形 外觀。 相片 內底是一組叫做 蝶仔鬚星系 ê 星系對，編號是 NGC 4038 kah NGC 4039。 因為 in kah 咱 才 6000 萬 光年 遠爾爾，以 星際尺度 ê 標準 來看，算是足近--ê。 In 是夜空中 科學家足愛研究 ê 交互作用星系。 In 之間產生 足強 ê 吸引作用，是差不多 ùi 10 億年前開始--ê，彼馬 in 2 个是相閃身撇過。 雖罔講這 2 个 星系 之間有交互作用，毋過 in 內底 ê 恆星 煞無啥會相挵。 內底會有新形成 ê 恆星，主要是 因為星際氣體相碰。 比論講，ùi 這對 舞伴 兩爿伸出來 ê 長長 ê 蝶仔鬚 頂懸，就有一寡新形成 ê 恆星。 這个時陣 星系合併 已經完成矣，這差不多是 10 億年前，幾若 10 億粒恆星嘛可能已經形成矣。

[POJ] Sim-hêng ê Ia̍h-á-chhiu Seng-hē

Chit 2 ê seng-hē kám chin-chiàⁿ leh hō͘-siong khip-ín? Sī chin--ê lah! In sī tiōng-le̍k sio khip, chiah-ē chō-sêng chit-má lí khòaⁿ--tio̍h ê chit-ê chiok ū-miâ ê tōa-hêng sim-hêng gōa-koan. Siòng-phìⁿ lāi-té sī chi̍t cho͘ kiò-chò Ia̍h-á-chhiu Seng-hē ê seng-hē-tùi, pian-hō sī NGC 4038 kah NGC 4039. In-ūi in kah lán chiah 6000 bān kng-nî hn̄g niā-niā, í seng-chè chhioh-tō͘ ê piau-chún lâi-khòaⁿ, sǹg-sī chiok kīn--ê. In sī iā-khong tiong kho-ha̍k-ka chiok ài gián-kiù ê kau-hō͘-chok-iōng seng-hē. In chi-kan sán-seng chiok kiông ê khip-ín chok-iōng, sī chha-put-to ùi 10 ek nî-chêng khai-sí--ê, hit-má in 2 ê sī sio-siám-sin phiat kòe. Sui-bóng kóng chit 2 ê seng-hē chi-kan ū kau-hō͘-chok-iōng, m̄-koh in lāi-té ê hêng-chheⁿ soah bô-siáⁿ ē sio-lòng. Lāi-té ē ū sin hêng-sêng ê hêng-chheⁿ, chú-iàu sī in-ūi seng-chè khì-thé sio-pōng. Pí-lūn-kóng, ùi chit tùi bú-phōaⁿ nn̄g-pêng chhun--chhut-lâi ê tn̂g-tn̂g ê Ia̍h-á-chhiu téng-koân, to̍h ū chi̍t-kóa sin hêng-sêng ê hêng-chheⁿ. Chit-ê sî-chūn seng-hē ha̍p-pèng í-keng oân-sêng--ah, che chha-put-to sī 10 ek nî-chêng, kúi-nā 10 ek lia̍p hêng-chheⁿ mā khó-lêng í-keng hêng-sêng--ah.

[KIP] Sim-hîng ê Ia̍h-á-tshiu Sing-hē

Tsit 2 ê sing-hē kám tsin-tsiànn leh hōo-siong khip-ín? Sī tsin--ê lah! In sī tiōng-li̍k sio khip, tsiah-ē tsō-sîng tsit-má lí khuànn--tio̍h ê tsit-ê tsiok ū-miâ ê tuā-hîng sim-hîng guā-kuan. Siòng-phìnn lāi-té sī tsi̍t tsoo kiò-tsò Ia̍h-á-tshiu Sing-hē ê sing-hē-tuì, pian-hō sī NGC 4038 kah NGC 4039. In-uī in kah lán tsiah 6000 bān kng-nî hn̄g niā-niā, í sing-tsè tshioh-tōo ê piau-tsún lâi-khuànn, sǹg-sī tsiok kīn--ê. In sī iā-khong tiong kho-ha̍k-ka tsiok ài gián-kiù ê kau-hōo-tsok-iōng sing-hē. In tsi-kan sán-sing tsiok kiông ê khip-ín tsok-iōng, sī tsha-put-to uì 10 ik nî-tsîng khai-sí--ê, hit-má in 2 ê sī sio-siám-sin phiat kuè. Sui-bóng kóng tsit 2 ê sing-hē tsi-kan ū kau-hōo-tsok-iōng, m̄-koh in lāi-té ê hîng-tshenn suah bô-siánn ē sio-lòng. Lāi-té ē ū sin hîng-sîng ê hîng-tshenn, tsú-iàu sī in-uī sing-tsè khì-thé sio-pōng. Pí-lūn-kóng, uì tsit tuì bú-phuānn nn̄g-pîng tshun--tshut-lâi ê tn̂g-tn̂g ê Ia̍h-á-tshiu tíng-kuân, to̍h ū tsi̍t-kuá sin hîng-sîng ê hîng-tshenn. Tsit-ê sî-tsūn sing-hē ha̍p-pìng í-king uân-sîng--ah, tse tsha-put-to sī 10 ik nî-tsîng, kuí-nā 10 ik lia̍p hîng-tshenn mā khó-lîng í-king hîng-sîng--ah.

[English] The Heart Shaped Antennae Galaxies

Are these two galaxies really attracted to each other? Yes, gravitationally, and the result appears as an enormous iconic heart -- at least for now. Pictured is the pair of galaxies cataloged as NGC 4038 and NGC 4039,known as the Antennae Galaxies. Because they are only 60 million light years away, close by intergalactic standards, the pair is one of the best studied interacting galaxies on the night sky. Their strong attraction began about a billion years ago when they passed unusually close to each other. As the two galaxies interact, their stars rarely collide, but new stars are formed when their interstellar gases crash together. Some new stars have already formed, for example, in the long antennae seen extending out from the sides of the dancing duo. By the time the galaxy merger is complete, likely over a billion years from now, billions of new stars may have formed.

詞彙學習