金牛座 Epsilon：有行星 ê 恆星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Epsilon Tauri: Star with Planet
• 影像來源 kah 版權：Reg Pratt
• 台文翻譯：An-Li Tsai (NSYSU)

[漢羅] 金牛座 Epsilon：有行星 ê 恆星

金牛座 Epsilon，嘛叫做 畢宿一，kah 咱 ê 距離有 146 光年遐爾遠。 金牛座 Epsilon 是一粒 K 型 ê 紅巨星，溫度比太陽較低，毋閣半徑是太陽 ê 13 倍大，光度差不多是太陽 ê 100 倍光。 這粒巨星 閣有一个名叫做 Ain，是 畢宿 開放星團 ê 成員之一，kah 閣較光 ê 巨星 畢宿五，成做 金牛 ê 目睭。 金牛座 Epsilon 就 tī 金牛座 厚塗粉 ê 烏暗雲內底。 咱知影講，伊嘛有一粒行星。 這粒行星叫做 金牛座 Epsilon b，是一粒氣體巨行星，是利用 徑向速度 測量法 tī 2006 年揣著–ê。 伊比木星閣較大粒，伊 ê 軌道週期是 1.6 年。 雖罔講 系外行星 無法道直接看著，毋閣 tī 深夜 欲直接用目睭揣伊 ê 母恆星 金牛座 Epsilon，是一件真簡單 ê 代誌。

[POJ] Kim-gû-chō Epsilon: Ū kiâⁿ-chheⁿ ê hêng-chheⁿ

Kim-gû-chō Epsilon, mā kiò-chò Pit-siù-it, kah lán ê kū-lî ū 146 kng-nî hiah-nī hn̄g. Kim-gû-chō Epsilon sī chi̍t-lia̍p K hêng ê âng-kū-chheⁿ, un-tō͘ pí Thài-iông khah kē, m̄-koh pòaⁿ-kèng sī Thài-iông ê 13 pōe tōa, kng-tō͘ chha-put-to sī Thài-iông ê 100 pōe kng. Chit lia̍p kū-chheⁿ koh-ū chi̍t ê miâ kiò-chò Ain, sī Pit-siù khai-hòng seng-thoân ê sêng-oân chi-it, kah koh-khah kng ê kū-chheⁿ Pit-siù-ngó͘, chiâⁿ-chò kim-gû ê ba̍k-chiu. Kim-gû-chō Epsilon to̍h tī Kim-gû-chō kāu thô͘-hún ê o͘-àm hûn lāi-té. Lán chai-iáⁿ kóng, i mā ū chi̍t-lia̍p kiâⁿ-chheⁿ. Chit lia̍p kiâⁿ-chheⁿ kiò-chò Kim-gû-chō Epsilon b, sī chi̍t-lia̍p khì-thé kū-kiâⁿ-chheⁿ, sī lī-iōng kèng-hiòng sok-tō͘ chhek-liông-hoat tī 2006 nî chhōe–tio̍h–ê. I pí Bo̍k-chheⁿ koh-khah tōa-lia̍p, i ê kúi-tō chiu-kî sī 1.6 nî. Sui-bóng kóng hē-gōa kiâⁿ-chheⁿ bô-hoat-tō ti̍t-chiap khòaⁿ–tio̍h, m̄-koh tī chhim-iā beh ti̍t-chiap iōng ba̍k-chiu chhōe i ê bú-hêng-chheⁿ Kim-gû-chō Epsilon, sī chi̍t kiāⁿ chin kán-tan ê tāi-chì.

[KIP] Kim-gû-tsō Epsilon: Ū kiânn-tshenn ê hîng-tshenn

Kim-gû-tsō Epsilon, mā kiò-tsò Pit-siù-it, kah lán ê kū-lî ū 146 kng-nî hiah-nī hn̄g. Kim-gû-tsō Epsilon sī tsi̍t-lia̍p K hîng ê âng-kū-tshenn, un-tōo pí Thài-iông khah kē, m̄-koh puànn-kìng sī Thài-iông ê 13 puē tuā, kng-tōo tsha-put-to sī Thài-iông ê 100 puē kng. Tsit lia̍p kū-tshenn koh-ū tsi̍t ê miâ kiò-tsò Ain, sī Pit-siù khai-hòng sing-thuân ê sîng-uân tsi-it, kah koh-khah kng ê kū-tshenn Pit-siù-ngóo, tsiânn-tsò kim-gû ê ba̍k-tsiu. Kim-gû-tsō Epsilon to̍h tī Kim-gû-tsō kāu thôo-hún ê oo-àm hûn lāi-té. Lán tsai-iánn kóng, i mā ū tsi̍t-lia̍p kiânn-tshenn. Tsit lia̍p kiânn-tshenn kiò-tsò Kim-gû-tsō Epsilon b, sī tsi̍t-lia̍p khì-thé kū-kiânn-tshenn, sī lī-iōng kìng-hiòng sok-tōo tshik-liông-huat tī 2006 nî tshuē–tio̍h–ê. I pí Bo̍k-tshenn koh-khah tuā-lia̍p, i ê kuí-tō tsiu-kî sī 1.6 nî. Sui-bóng kóng hē-guā kiânn-tshenn bô-huat-tō ti̍t-tsiap khuànn–tio̍h, m̄-koh tī tshim-iā beh ti̍t-tsiap iōng ba̍k-tsiu tshuē i ê bú-hîng-tshenn Kim-gû-tsō Epsilon, sī tsi̍t kiānn tsin kán-tan ê tāi-tsì.

[English] Epsilon Tauri: Star with Planet

Epsilon Tauri lies 146 light-years away. A K-type red giant star, epsilon Tau is cooler than the Sun, but with about 13 times the solar radius it shines with nearly 100 times the solar luminosity. A member of the Hyades open star cluster the giant star is known by the proper name Ain, and along with brighter giant star Aldebaran, forms the eyes of Taurus the Bull. Surrounded by dusty, dark clouds in Taurus, epsilon Tau is also known to have a planet. Discovered by radial velocity measurements in 2006, epsilon Tauri b is a gas giant planet larger than Jupiter with an orbital period of 1.6 years. And though the exoplanet can’t be seen directly, on a dark night its parent star epsilon Tauri is easily visible to the unaided eye.

詞彙學習（漢羅/POJ/KIP/華語/English）

• 【金牛座 Epsilon】Kim-gû-chō/Kim-gû-tsō/金牛座 Epsilon/Epsilon Tauri
• 【畢宿一】Pit-siù-it/Pit-siù-it/畢宿一/Epsilon Tauri
• 【畢宿五】Pit-siù-ngó͘/Pit-siù-ngóo/畢宿五/Aldebaran
• 【徑向速度】kèng-hiòng sok-tō͘/kìng-hiòng sok-tōo/徑向速度/radial velocity
• 【系外行星】hē-gōa kiâⁿ-chheⁿ/hē-guā kiânn-tshenn/系外行星/exoplanet
• 【木星】Bo̍k-chheⁿ/Bo̍k-tshenn/木星/Jupiter
• 【畢宿星團】Pit-siù Seng-thoân/Pit-siù Sing-thuân/畢宿星團/Hyades
• 【開放星團】khai-hòng seng-thoân/khai-hòng sing-thuân/開放星團/open star cluster
• 【紅巨星】âng-kū-chheⁿ/âng-kū-tshenn/紅巨星/red giant star
• 【巨星】kū-chheⁿ/kū-tshenn/巨星/giant star
• 【巨行星】kū-kiâⁿ-chheⁿ/kū-kiânn-tshenn/巨行星/giant planet