深空星雲：Ùi 海鳥星雲 到 加州星雲

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Deep Nebulas: From Seagull to California
• 影像來源 kah 版權：Alistair Symon
• 台文翻譯：An-Li Tsai (NSYSU)

[漢羅] 深空星雲：Ùi 海鳥星雲 到 加州星雲

你對這个夜空有偌了解？ 好！你敢會當 tī 這張 深空 影像內底認出幾个較有名 ê 天體？ 毋管你是佗一款，咱先來做一个測驗，看你是毋是會當 tī 這幅 有 足濟暗暗霧霧星雲 ê 深空影像內底，揣著一寡 較有名 ê 夜空天體。 這張影像內底有 昴宿星團、Barnard 環、馬頭星雲、獵戶座星雲、玫瑰星雲、圓錐星雲、參宿七、海䖳星雲、猴山仔頭星雲、火焰星星雲、肚胿仔星雲、畢宿五、Simeis 147（意大利麵星雲）、海鳥星雲、kah 加州星雲。 欲知影 in tī 佗位，會當參考這張 有 kā 名標出來 ê 影像。 欲揣 in 是有淡薄仔困難，這是因為 tī 足暗 ê 夜空 中，就算是咱熟似 ê 星座 嘛是真歹揣，因為咱 ê 夜空傷複雜矣。 這張是 kā tī 美國 Arizona 州 ê 烏暗夜空下底 開 800 點鐘 ê 感光時間翕 ê 28 張相片 組合 起來 ê 拼鬥影像。 這个夜空是有 偌爾複雜，咱會當 ùi 遮看著一部份。

[POJ] Chhim-khong Seng-hûn: Ùi Hái-chiáu Seng-hûn kàu Ka-chiu Seng-hûn

Lí tùi chit-ê iā khang ū gōa liáu-kái? Hó! Lí kám ē-tàng tī chit-tiuⁿ chhim-khong iáⁿ-siōng lāi-té jīn-chhut kúi-ê khah ū-miâ ê thian-thé? M̄-koán lí sī toh chi̍t-khoán, lán seng lâi chò chi̍t-ê chhek-giām, khòaⁿ lí sī-m̄-sī ē-tàng tī chit pak ū chiok chē àm-àm bū-bū Seng-hûn ê chhim-khong iáⁿ-siōng lāi-té, chhōe-tio̍h chi̍t-kóa khah ū-miâ ê iā-khong thian-thé. Chit-tiuⁿ iáⁿ-siōng lāi-té ū Báu-siù Seng-thoân, Barnard khoân, Bé-thâu Seng-hûn, La̍h-hō͘-chō Seng-hûn, Mûi-kùi Seng-hûn, Îⁿ-chui Seng-hûn, Chham-siù-chhit, Hái-thē Seng-hûn, Kâu-san-á-thâu Seng-hûn, Hóe-iām-chheⁿ Seng-hûn, Tō͘-koai-á Seng-hûn, Pit-siù-ngó͘, Simeis 147 (I-tá-lī-mī Seng-hûn), Hái-chiáu Seng-hûn, kah Ka-chiu Seng-hûn. Beh chai-iáⁿ in tī toh-ūi, ē-tàng chham-khó chit-tiuⁿ ū kā miâ piau–chhut-lâi ê iáⁿ-siōng. Beh chhōe in sī ū tām-po̍h-á khùn-lân, che-sī in-ūi tī chiok àm ê iā-khong tiong, tō-sǹg-sī lán se̍k-sāi ê seng-chō mā-sī chin pháiⁿ chhōe, in-ūi lán ê iā-khong siuⁿ ho̍k-cha̍p–ah. Chit-tiuⁿ sī kā tī Bí-kok Arizona chiu ê o͘-àm iā-khong ē-té khai 800 tiám-cheng ê kám-kng sî-kan hip–ê 28 tiuⁿ siòng-phìⁿ cho͘-ha̍p khí-lâi ê pheng-tàu iáⁿ-siōng. Chit-ê iā-khong sī ū gōa-nī ho̍k-cha̍p, lán ē-tàng ùi chia khòaⁿ-tio̍h chi̍t-pō͘-hūn.

[KIP] Tshim-khong Sing-hûn: Uì Hái-tsiáu Sing-hûn kàu Ka-tsiu Sing-hûn

Lí tuì tsit-ê iā khang ū guā liáu-kái? Hó! Lí kám ē-tàng tī tsit-tiunn tshim-khong iánn-siōng lāi-té jīn-tshut kuí-ê khah ū-miâ ê thian-thé? M̄-kuán lí sī toh tsi̍t-khuán, lán sing lâi tsò tsi̍t-ê tshik-giām, khuànn lí sī-m̄-sī ē-tàng tī tsit pak ū tsiok tsē àm-àm bū-bū Sing-hûn ê tshim-khong iánn-siōng lāi-té, tshuē-tio̍h tsi̍t-kuá khah ū-miâ ê iā-khong thian-thé. Tsit-tiunn iánn-siōng lāi-té ū Báu-siù Sing-thuân, Barnard khuân, Bé-thâu Sing-hûn, La̍h-hōo-tsō Sing-hûn, Muî-kuì Sing-hûn, Înn-tsui Sing-hûn, Tsham-siù-tshit, Hái-thē Sing-hûn, Kâu-san-á-thâu Sing-hûn, Hué-iām-tshenn Sing-hûn, Tōo-kuai-á Sing-hûn, Pit-siù-ngóo, Simeis 147 (I-tá-lī-mī Sing-hûn), Hái-tsiáu Sing-hûn, kah Ka-tsiu Sing-hûn. Beh tsai-iánn in tī toh-uī, ē-tàng tsham-khó tsit-tiunn ū kā miâ piau–tshut-lâi ê iánn-siōng. Beh tshuē in sī ū tām-po̍h-á khùn-lân, tse-sī in-uī tī tsiok àm ê iā-khong tiong, tō-sǹg-sī lán si̍k-sāi ê sing-tsō mā-sī tsin pháinn tshuē, in-uī lán ê iā-khong siunn ho̍k-tsa̍p–ah. Tsit-tiunn sī kā tī Bí-kok Arizona tsiu ê oo-àm iā-khong ē-té khai 800 tiám-tsing ê kám-kng sî-kan hip–ê 28 tiunn siòng-phìnn tsoo-ha̍p khí-lâi ê phing-tàu iánn-siōng. Tsit-ê iā-khong sī ū guā-nī ho̍k-tsa̍p, lán ē-tàng uì tsia khuànn-tio̍h tsi̍t-pōo-hūn.

[English] Deep Nebulas: From Seagull to California

How well do you know the night sky? OK, but how well can you identify famous sky objects in a very deep image? Either way, here is a test: see if you can find some well-known night-sky icons in a deep image filled with faint nebulosity. This image contains the Pleiades star cluster, Barnard’s Loop, Horsehead Nebula, Orion Nebula, Rosette Nebula, Cone Nebula, Rigel, Jellyfish Nebula, Monkey Head Nebula, Flaming Star Nebula, Tadpole Nebula, Aldebaran, Simeis 147, Seagull Nebula and the California Nebula. To find their real locations, here is an annotated image version. The reason this task might be difficult is similar to the reason it is initially hard to identify familiar constellations in a very dark sky: the tapestry of our night sky has an extremely deep hidden complexity. The featured composite reveals some of this complexity in a mosaic of 28 images taken over 800 hours from dark skies over Arizona, USA.

詞彙學習（漢羅/POJ/KIP/華語/English）

• 【昴宿星團】Báu-siù Seng-thoân/Báu-siù Sing-thuân/昴宿星團/Pleiades
• 【Barnard 環】Barnard khoân/Barnard khoân/巴納德環路/Barnard’s Loop
• 【馬頭星雲】Bé-thâu seng-hûn/Bé-thâu Sing-hûn/馬頭星雲/Horsehead Nebula
• 【獵戶座星雲】La̍h-hō͘-chō seng-hûn/La̍h-hōo-tsō Sing-hûn/獵戶座星雲/Orion Nebula
• 【玫瑰星雲】Mûi-kùi seng-hûn/Muî-kuì Sing-hûn/玫瑰星雲/Rosette nebula
• 【圓錐星雲】Îⁿ-chui seng-hûn/Înn-tsui Sing-hûn/錐狀星雲/Cone Nebula
• 【參宿七】Chham-siù-chhit/Tsham-siù-tshit/參宿七/Rigel
• 【海䖳星雲】Hái-thē seng-hûn/Hái-thē Sing-hûn/水母星雲/Jellyfish Nebula
• 【猴山仔頭星雲】Kâu-san-á-thâu seng-hûn/Kâu-san-á-thâu Sing-hûn/猴頭星雲/Monkey Head Nebula
• 【火焰星星雲】Hóe-iām-chheⁿ seng-hûn/Hué-iām-tshenn Sing-hûn/火焰星星雲/Flaming Star Nebula
• 【肚胿仔星雲】Tō͘-koai-á seng-hûn/Tōo-kuai-á Sing-hûn/蝌蚪星雲/Auriga
• 【畢宿五】pit-siù-ngó͘/pit-siù-ngóo/畢宿五/Aldebaran
• 【意大利麵星雲】I-tá-lí-mī seng-hûn/I-tá-lí-mī Sing-hûn/義大利麵星雲/Simeis 147 (Spaghetti Nebula)
• 【海鷗星雲】Hái-o͘-seng-hûn/Hái-oo-Sing-hûn/海鷗星雲/the Seagull Nebula
• 【海鳥星雲】Hái-chiáu-seng-hûn/Hái-tsiáu-Sing-hûn/海鷗星雲/the Seagull Nebula
• 【加州星雲】Ka-chiu-seng-hûn/Ka-tsiu-Sing-hûn/加州星雲/California Nebula
• 【拼鬥影像】pheng-tàu-iáⁿ-siōng/phing-tàu-iánn-siōng/馬賽克/mosaic