山 kah 月娘 ê 影

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Shadows of Mountain and Moon
• 影像來源 kah 版權：Enzo Massa Micon
• 台文翻譯：An-Li Tsai (NSYSU)

[漢羅] 山 kah 月娘 ê 影

月娘 kah 山敢會投影出類似 ê 影？ 會呢！毋閣 光 kah 暗 ê 邊界無一定愛對予齊齊。 這張相片是 2022 年 10 月初翕--ê，是 意大利 Grivola 山 kah 天頂 ê 頂半月。 日頭就 tī 這幅構圖 ê 正爿，kā 月娘 ê 正爿照予光，嘛仝款 kā 山 ê 正爿照予光。 這款 月相 叫做「半月」，是因為伊去予日光照著 ê 彼爿，tī 地球 頂懸 看著 ê 部份，佔規个月表 ê 4 分 1。 用數位技術處理這个孤張感光影像了後，會當閣較清楚看著這兩項 大項 物件。 地球逐工自轉 一輾，所以欲翕著 半月 ê 晨昏線 kah 直直直 ê 山陵 排 tiàm 仝一條線，時間就愛掠較絚咧。

[POJ] Soaⁿ kah Goe̍h-niû ê Iáⁿ

Goe̍h-niû kah soaⁿ kám-ē tâu-iáⁿ chhut lūi-sū ê iáⁿ? Ē neh! M̄-koh kng kah àm ê pian-kài bô-it-tēng ài tùi hō͘ chiâu-chê. Chit-tiuⁿ siòng-phìⁿ sī 2022 nî 10 goe̍h-chhe hip--ê, sī I-tá-lī Grivola soaⁿ kah thiⁿ-téng ê téng-pòaⁿ-goe̍h. Ji̍t-thâu to̍h tī chit pak kò͘-tô͘ ê chiàⁿ-pêng, kā goe̍h-niû ê chiàⁿ-pêng chiàu hō͘ kng, mā kāng-khoán kā soaⁿ ê chiàⁿ-pêng chiàu hō͘ kng. Chit-khoán goe̍h-siòng kiò-chò "pòaⁿ-goe̍h", sī in-ūi i khì hō͘ ji̍t-kng chiò-tio̍h ê hit-pêng, tī tē-kiû téng-koân khòaⁿ-tio̍h ê pō͘-hūn, chiàm kui-ê goe̍h-piáu ê 4 hun 1. Iōng sò͘-ūi ki-su̍t chhú-lí chit-ê ko͘-tiuⁿ kám-kng iáⁿ-siōng liáu-āu, ē-tàng koh-khah chheng-chhó khòaⁿ-tio̍h chit nn̄g hāng tōa-hāng mi̍h-kiāⁿ. Tē-kiû ta̍k-kang chū-choán chi̍t liàn, só͘-í beh hip-tio̍h pòaⁿ-goe̍h ê sîn-hun-sòaⁿ kah ti̍t-ti̍t-ti̍t ê soaⁿ-niā pâi tiàm kāng chi̍t tiâu sòaⁿ, sî-kan to̍h-ài lia̍h khah ân leh.

[KIP] Suann kah Gue̍h-niû ê Iánn

Gue̍h-niû kah suann kám-ē tâu-iánn tshut luī-sū ê iánn? Ē neh! M̄-koh kng kah àm ê pian-kài bô-it-tīng ài tùi hōo tsiâu-tsê. Tsit-tiunn siòng-phìnn sī 2022 nî 10 gue̍h-tshe hip--ê, sī I-tá-lī Grivola suann kah thinn-tíng ê tíng-puànn-gue̍h. Ji̍t-thâu to̍h tī tsit pak kòo-tôo ê tsiànn-pîng, kā gue̍h-niû ê tsiànn-pîng tsiàu hōo kng, mā kāng-khuán kā suann ê tsiànn-pîng tsiàu hōo kng. Tsit-khuán gue̍h-siòng kiò-tsò "puànn-gue̍h", sī in-uī i khì hōo ji̍t-kng tsiò-tio̍h ê hit-pîng, tī tē-kiû tíng-kuân khuànn-tio̍h ê pōo-hūn, tsiàm kui-ê gue̍h-piáu ê 4 hun 1. Iōng sòo-uī ki-su̍t tshú-lí tsit-ê koo-tiunn kám-kng iánn-siōng liáu-āu, ē-tàng koh-khah tshing-tshó khuànn-tio̍h tsit nn̄g hāng tuā-hāng mi̍h-kiānn. Tē-kiû ta̍k-kang tsū-tsuán tsi̍t liàn, sóo-í beh hip-tio̍h puànn-gue̍h ê sîn-hun-suànn kah ti̍t-ti̍t-ti̍t ê suann-niā pâi tiàm kāng tsi̍t tiâu suànn, sî-kan to̍h-ài lia̍h khah ân leh.

[English] Shadows of Mountain and Moon

Can the Moon and a mountain really cast similar shadows? Yes, but the division between light and dark does not have to be aligned. Pictured, a quarter moon was captured above the mountain Grivola in Italy in early October of 2022. The Sun is to the right of the featured picturesque landscape, illuminating the right side of the Moon in a similar way that it illuminates the right side of the mountain. This lunar phase is called "quarter", in part, because the lit fraction visible from Earth is one quarter of the entire lunar surface. Digital post-processing of this single exposure gave both gigantic objects more prominence. Capturing the terminator of this quarter moon in close alignment with nearly vertical mountain ridge required careful timing because the Earth rotates once a day.

詞彙學習