獵鷹號載重火箭 ê 回航噴射

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Falcon Heavy Boostback Burn
• 影像來源 kah 版權：Dennis Huff
• 台文翻譯：An-Li Tsai (NSYSU)

[漢羅] 獵鷹號載重火箭 ê 回航噴射

12 月 28 暗暝，美國 Florida 州 Kennedy 太空中心發射 獵鷹號載重火箭，這是這个火箭會當重複使用 ê 側助推器 ê 第 5 擺發射。 飛了 2 分鐘 20 秒了後，兩爿 ê 側助推器 就 kah 火箭 ê 核心級分–開。 這張 感光 3 分鐘 ê 相片，就紀錄著 kah 助推器分–開了後，欲轉來地球 降落區 進前 ê 精彩 回航噴射。 雖罔講本底無按算欲 kā 獵鷹號載重火箭 ê 核心級收轉來閣再用，毋閣兩个側助推器攏成功降落，會當閣再飛。 這寡側助推器進前 ê 4 擺飛行，包括 舊年 10 月 ê 時陣，發射 NASA 欲飛去小行星 ê 靈神星任務。 後一个飛行計畫是 Europa 快船任務，按算欲 tī 2024 年 10 月發射。

[POJ] La̍h-eng-hō Chài-tāng Hóe-chìⁿ ê Hôe-hâng phùn-siā

12 goe̍h 28 àm-mî, Bí-kok Florida chiu Kennedy thài-khong tiong-sim hoat-siā La̍h-eng-hō Chài-tāng Hóe-chìⁿ, che-sī chit-ê hóe-chìⁿ ē-tàng tiông-ho̍k sú-iōng ê chhek-chō͘-thui-khì ê tē 5 pái Hoat-siā. poe-liáu 2 hun-cheng 20 bió liáu-āu,nn̄g-pêng ê chhek-chō͘-thui-khì to̍h kah hóe-chìⁿ ê he̍k-sim-kip pun–khui. Chit-tiuⁿ kám-kng 3 hun-cheng ê siòng-phìⁿ, to̍h kí-lio̍k tio̍h kah chō͘-thui-khì pun–khui liáu-āu, beh tńg-lâi Tē-kiû kàng-lo̍h-khu chìn-chêng ê cheng-chhái hôe-hâng phùn-siā. Sui-bóng kóng pún-té bô àn-sǹg beh kā La̍h-eng-hō Chài-tāng Hóe-chìⁿ ê he̍k-sim-kip siu tńg-lâi koh-chài iōng, m̄-koh nn̄g-ê chhek-chō͘-thui-khì lóng sêng-kong kàng-lo̍h, ē-tàng koh-chài poe. Chit kóa chhek-chō͘-thui-khì chìn-chêng ê 4 pái hui-hêng, pau-koat kū-nî 10 goe̍h ê sî-chūn, hoat-siā NASA beh poe-khì sió-kiâⁿ-chheⁿ ê Lêng-sîn-chheⁿ jīm-bū. Āu chi̍t-ê hui-hêng kè-ōe sī Europa Khoài-chûn jīm-bū, àn-sǹg beh tī 2024 nî 10 goe̍h hoat-siā.

[KIP] La̍h-ing-hō Tsài-tāng Hué-tsìnn ê Huê-hâng phùn-siā

12 gue̍h 28 àm-mî, Bí-kok Florida tsiu Kennedy thài-khong tiong-sim huat-siā La̍h-ing-hō Tsài-tāng Hué-tsìnn, tse-sī tsit-ê hué-tsìnn ē-tàng tiông-ho̍k sú-iōng ê tshik-tsōo-thui-khì ê tē 5 pái Huat-siā. pue-liáu 2 hun-tsing 20 bió liáu-āu,nn̄g-pîng ê tshik-tsōo-thui-khì to̍h kah hué-tsìnn ê hi̍k-sim-kip pun–khui. Tsit-tiunn kám-kng 3 hun-tsing ê siòng-phìnn, to̍h kí-lio̍k tio̍h kah tsōo-thui-khì pun–khui liáu-āu, beh tńg-lâi Tē-kiû kàng-lo̍h-khu tsìn-tsîng ê tsing-tshái huê-hâng phùn-siā. Sui-bóng kóng pún-té bô àn-sǹg beh kā La̍h-ing-hō Tsài-tāng Hué-tsìnn ê hi̍k-sim-kip siu tńg-lâi koh-tsài iōng, m̄-koh nn̄g-ê tshik-tsōo-thui-khì lóng sîng-kong kàng-lo̍h, ē-tàng koh-tsài pue. Tsit kuá tshik-tsōo-thui-khì tsìn-tsîng ê 4 pái hui-hîng, pau-kuat kū-nî 10 gue̍h ê sî-tsūn, huat-siā NASA beh pue-khì sió-kiânn-tshenn ê Lîng-sîn-tshenn jīm-bū. Āu tsi̍t-ê hui-hîng kè-uē sī Europa Khuài-tsûn jīm-bū, àn-sǹg beh tī 2024 nî 10 gue̍h huat-siā.

[English] Falcon Heavy Boostback Burn

The December 28 night launch of a Falcon Heavy rocket from Kennedy Space Center in Florida marked the fifth launch for the rocket’s reusable side boosters. About 2 minutes 20 seconds into the flight, the two side boosters separated from the rocket’s core stage. Starting just after booster separation, this three minute long exposure captures the pair’s remarkable boostback burns, maneuvers executed prior to their return to landing zones on planet Earth. While no attempt was made to recover the Falcon Heavy’s core stage, both side boosters landed successfully and can be flown again. The four previous flights for these side boosters included last October’s launch of NASA’s asteroid-bound Psyche mission. Their next planned flight is on the Europa Clipper mission scheduled for launch in October 2024.

詞彙學習（漢羅/POJ/KIP/華語/English）

• 【核心級】he̍k-sim-kip/hi̍k-sim-kip/核心級/core stage
• 【獵鷹號載重火箭】La̍h-eng-hō Chài-tāng Hóe-chìⁿ/La̍h-ing-hō Tsài-tāng Hué-tsìnn/獵鷹號重載火箭/Falcon Heavy rocket
• 【回航噴射】hôe-hâng phùn-siā/huê-hâng phùn-siā/回航噴射/boostback burn
• 【側助推器】chhek-chō͘-thui-khì/tshik-tsōo-thui-khì/側助推器/side boosters
• 【靈神星任務】Lêng-sîn-chheⁿ jīm-bū/Lîng-sîn-tshenn jīm-bū/靈神星任務/Psyche mission
• 【Europa 快船任務】Europa Khoài-chûn jīm-bū/Europa Khuài-tsûn jīm-bū/歐羅巴快車任務/Europa Clipper mission
• 【Kennedy 太空中心】Kennedy Thài-khong jīm-bū/Kennedy Thài-khong jīm-bū/甘迺迪太空中心/Kennedy Space Center
• 【降落區】kàng-lo̍h-khu/kàng-lo̍h-khu/降落區/landing zone