2 點半鐘 ê 木星變化

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Jupiter over 2 Hours and 30 Minutes
• 影像來源 kah 版權：Aurélien Genin
• 台文翻譯：An-Li Tsai (NSYSU)

[漢羅] 2 點半鐘 ê 木星變化

木星是太陽系內底上主要 ê 巨行星，嘛是 自轉速度上緊 ê 行星，踅一輾毋免 10 點鐘。 毋閣，氣體巨行星 kah 固體 ê 自轉無啥仝。 木星南北極 ê 一工 是 9 點鐘 56 分，毋閣 tī 赤道附近 ê 一工煞賰 9 點鐘 50 分。 巨行星 ê 高速自轉產生 較強 ê 噴射氣流，kā 雲分做一輾一輾、踅行星 ê 暗帶 kah 光區。 這張是 1 月 15 彼暗 tī 法國 巴黎邊仔 用 kha-mé-lah kah 細台天文望遠鏡翕--ê。 Tī 這組清楚相片內底，你會當真簡單就看著木星 ê 高速自轉。 這粒巨行星 ê 赤道南部有巨型風暴系統，就是咱知影 ê 大紅斑。 你會當 tī 相片內底看著伊綴行星咧自轉，ùi 倒爿徙到正爿。 這組 ùi 倒爿下底 到 正爿頂懸 ê 系列影像經過 ê 時間，差不多是 2 點鐘 30 分。

[POJ] 2 tiám-pòaⁿ-cheng ê Bo̍k-chheⁿ piàn-hòa

Bo̍k-chheⁿ sī Thài-iông-hē lāi-té siōng chú-iàu ê kū-kiâⁿ-chheⁿ, mā-sī chū-choán sok-tō͘ siōng kín ê kiâⁿ-chhiⁿ, se̍h chi̍t liàn m̄-bián 10 tiám-cheng. M̄-koh, khì-thé kū-kiâⁿ-chheⁿ kah kò͘-thé ê chū-choán bô-siáⁿ kāng. Bo̍k-chheⁿ lâm-pak-ke̍k ê chi̍t-kang sī 9 tiám-cheng 56 hun, m̄-koh tī chhek-tō hù-kīn ê chi̍t-kang soah chhun 9 tiám-cheng 50 hun. Kū-kiâⁿ-chheⁿ ê ko-sok chū-choán sán-seng khah kiông ê phùn-siā khì-liû, kā hûn pun-chò chi̍t liàn chi̍t liàn, se̍h kiâⁿ-chhiⁿ ê àm-tòa kah kng-khu. Chit-tiuⁿ sī 1 goe̍h 15 hit àm tī Hoat-kok Pa-lê piⁿ-á iōng kha-mé-lah kah sè-tâi thian-bûn bōng-oán-kiàⁿ hip--ê. Tī chit cho͘ chheng-chhó siòng-phìⁿ lāi-té, lí ē-tàng chin kán-tan to̍h khòaⁿ-tio̍h Bo̍k-chheⁿ ê ko-sok chū-choán. Chit lia̍p kū-kiâⁿ-chheⁿ ê chhek-tō lâm-pō͘ ū kū-hêng hong-pō hē-thóng, to̍h-sī lán chai-iáⁿ ê Tōa-âng-pan. Lí ē-tàng tī siòng-phìⁿ lāi-té khòaⁿ-to̍h i tòe kiâⁿ-chheⁿ teh chū-choán, ùi tò-pêng sóa kàu chiàⁿ-pêng. Chit cho͘ ùi tò-pêng ē-té kàu chiàⁿ-pêng téng-koân ê hē-lia̍t iáⁿ-siōng keng-kòe ê sî-kan, chha-put-to sī 2 tiám-cheng 30 hun.

[KIP] 2 tiám-puànn-tsing ê Bo̍k-tshenn piàn-huà

Bo̍k-tshenn sī Thài-iông-hē lāi-té siōng tsú-iàu ê kū-kiâⁿ-tshenn, mā-sī tsū-tsuán sok-tōo siōng kín ê kiânn-tshinn, se̍h tsi̍t liàn m̄-bián 10 tiám-tsing. M̄-koh, khì-thé kū-kiâⁿ-tshenn kah kòo-thé ê tsū-tsuán bô-siánn kāng. Bo̍k-tshenn lâm-pak-ki̍k ê tsi̍t-kang sī 9 tiám-tsing 56 hun, m̄-koh tī tshik-tō hù-kīn ê tsi̍t-kang suah tshun 9 tiám-tsing 50 hun. Kū-kiâⁿ-tshenn ê ko-sok tsū-tsuán sán-sing khah kiông ê phùn-siā khì-liû, kā hûn pun-tsò tsi̍t liàn tsi̍t liàn, se̍h kiânn-tshinn ê àm-tuà kah kng-khu. Tsit-tiunn sī 1 gue̍h 15 hit àm tī Huat-kok Pa-lê pinn-á iōng kha-mé-lah kah sè-tâi thian-bûn bōng-uán-kiànn hip--ê. Tī tsit tsoo tshing-tshó siòng-phìnn lāi-té, lí ē-tàng tsin kán-tan to̍h khuànn-tio̍h Bo̍k-tshenn ê ko-sok tsū-tsuán. Tsit lia̍p kū-kiâⁿ-tshenn ê tshik-tō lâm-pōo ū kū-hîng hong-pō hē-thóng, to̍h-sī lán tsai-iánn ê Tuā-âng-pan. Lí ē-tàng tī siòng-phìnn lāi-té khuànn-to̍h i tuè kiânn-tshenn teh tsū-tsuán, uì tò-pîng suá kàu tsiànn-pîng. Tsit tsoo uì tò-pîng ē-té kàu tsiànn-pîng tíng-kuân ê hē-lia̍t iánn-siōng king-kuè ê sî-kan, tsha-put-to sī 2 tiám-tsing 30 hun.

[English] Jupiter over 2 Hours and 30 Minutes

Jupiter, our Solar System's ruling gas giant, is also the fastest spinning planet, rotating once in less than 10 hours. The gas giant doesn't rotate like a solid body though. A day on Jupiter is about 9 hours and 56 minutes long at the poles, decreasing to 9 hours and 50 minutes near the equator. The giant planet's fast rotation creates strong jet streams, separating its clouds into planet girdling bands of dark belts and bright zones. You can easily follow Jupiter's rapid rotation in this sharp sequence of images from the night of January 15, all taken with a camera and small telescope outside of Paris, France. Located just south of the equator, the giant planet's giant storm system, also known as the Great Red Spot, can be seen moving left to right with the planet's rotation. From lower left to upper right, the sequence spans about 2 hours and 30 minutes.

詞彙學習