美國號 kah 寧靜海

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：America and the Sea of Serenity
• 影像來源 kah 版權：Gene Cernan, Apollo 17, NASA; Anaglyph by Patrick Vantuyne
• 台文翻譯：An-Li Tsai (NSYSU)

[漢羅] 美國號 kah 寧靜海

Kā 你 ê 3D 目鏡 提來，咱來看這張 tī 別个世界 ê 立體影像。 這張是阿波羅 17 號任務 ê 指揮官 Eugene Cernan tī 1972 年 12 月 11 欲降落月球進前 踅月球一輾 ê 時陣，紀錄著 ê 相片。 這組立體浮雕是 ùi 兩張相片 (AS17-147-22465, AS17-147-22466) 組合來--ê，是 伊 kah Harrison Schmitt 博士 tī 登月艙 挑戰號飛到上好地點翕--ê。 遐是 阿波羅 17 號 ê 降落地點，Taurus-Littrow 山谷。 這个面對日光、寬闊 ê 南 Massif 山就 ùi 相片 中央附近 peh 起來。 倒爿是烏暗 ê Taurus-Littrow 山谷。 Ron Evans 駛--ê 踅月球行 ê 美國號指揮艙，就 tī 南 Massif 山 ê 山尖 頭前。 Tī 山脈後壁，月球邊緣彼搭，是月球 ê 寧靜海。 2025 年 9 月以後，Artemis 2 號任務 會發射，伊按算欲載 4 个太空人踅月球冒險了後，才閣轉來地球。

[POJ] Bí-kok-hō kah Lêng-chêng-hái

Kā lí ê 3D ba̍k-kiàⁿ the̍h-lâi, lán lâi khòaⁿ chit tiuⁿ tī pa̍t ê sè-kài ê li̍p-thé iáⁿ-siōng. Chit-tiuⁿ sī A-pho-lô 17 hō jīm-bū ê chí-hui-koaⁿ Eugene Cernan tī 1972 nî 12 goe̍h 11 beh kàng-lo̍h Goe̍h-kiû chìn-chêng se̍h Goe̍h-kiû chi̍t-liàn ê sî-chūn, kì-lo̍k tio̍h ê siòng-phìⁿ. Chit cho͘ li̍p-thé phû-tiau sī ùi nn̄g tiuⁿ siòng-phìⁿ (AS17-147-22465, AS17-147-22466) cho͘-ha̍p lâi--ê, sī i kah Harrison Schmitt phok-sū tī Teng-goe̍h-chhng Thiáu-chiàn-hō poe kàu siōng hó tē-tiám hi̍p--ê. Hiah sī A-pho-lô 17 hō ê kàng-lo̍h tē-tiám, Taurus-Littrow soaⁿ-kok. Chit ê bīn-tùi ji̍t-kng, khoan-khoah ê Lâm Massif soaⁿ tō ùi siòng-phìⁿ tiong-ng hù-kīn peh--khí-lâi. Tò-pêng sī o͘-àm ê Taurus-Littrow soaⁿ-kok. Ron Evans sái--ê se̍h Goe̍h-kiû kiâⁿ ê Bí-kok-hō chí-hui-chhng, to̍h tī Lâm Massif soaⁿ ê soaⁿ-chiam thâu-chêng. Tī soaⁿ-me̍h āu-piah, Goe̍h-kiû pian-iân hit-tah, sī Goe̍h-kiû ê Lêng-chêng-hái. 2025 nî 9 goe̍h í-āu, Artemis 2 hō jīm-bū ē hoat-siā, i àn-sǹg beh chài 4 ê thài-khong-jîn se̍h Goe̍h-kiû mō͘-hiám liáu-āu, chiah-koh tńg-lâi Tē-kiû.

[KIP] Bí-kok-hō kah Lîng-tsîng-hái

Kā lí ê 3D ba̍k-kiànn the̍h-lâi, lán lâi khuànn tsit tiunn tī pa̍t ê sè-kài ê li̍p-thé iánn-siōng. Tsit-tiunn sī A-pho-lô 17 hō jīm-bū ê tsí-hui-kuann Eugene Cernan tī 1972 nî 12 gue̍h 11 beh kàng-lo̍h Gue̍h-kiû tsìn-tsîng se̍h Gue̍h-kiû tsi̍t-liàn ê sî-tsūn, kì-lo̍k tio̍h ê siòng-phìnn. Tsit tsoo li̍p-thé phû-tiau sī uì nn̄g tiunn siòng-phìnn (AS17-147-22465, AS17-147-22466) tsoo-ha̍p lâi--ê, sī i kah Harrison Schmitt phok-sū tī Ting-gue̍h-tshng Thiáu-tsiàn-hō pue kàu siōng hó tē-tiám hi̍p--ê. Hiah sī A-pho-lô 17 hō ê kàng-lo̍h tē-tiám, Taurus-Littrow suann-kok. Tsit ê bīn-tuì ji̍t-kng, khuan-khuah ê Lâm Massif suann tō uì siòng-phìnn tiong-ng hù-kīn peh--khí-lâi. Tò-pîng sī oo-àm ê Taurus-Littrow suann-kok. Ron Evans sái--ê se̍h Gue̍h-kiû kiânn ê Bí-kok-hō tsí-hui-tshng, to̍h tī Lâm Massif suann ê suann-tsiam thâu-tsîng. Tī suann-me̍h āu-piah, Gue̍h-kiû pian-iân hit-tah, sī Gue̍h-kiû ê Lîng-tsîng-hái. 2025 nî 9 gue̍h í-āu, Artemis 2 hō jīm-bū ē huat-siā, i àn-sǹg beh tsài 4 ê thài-khong-jîn se̍h Gue̍h-kiû mōo-hiám liáu-āu, tsiah-koh tńg-lâi Tē-kiû.

[English] America and the Sea of Serenity

Get out your red/blue glasses and check out this stereo view of another world. The scene was recorded by Apollo 17 mission commander Eugene Cernan on December 11, 1972, one orbit before descending to land on the Moon. The stereo anaglyph was assembled from two photographs AS17-147-22465, AS17-147-22466 captured from his vantage point on board the Lunar Module Challenger as he and Dr. Harrison Schmitt flew over Apollo 17's landing site in the Taurus-Littrow Valley. The broad, sunlit face of the mountain dubbed South Massif rises near the center of the frame, above the dark floor of Taurus-Littrow to its left. Piloted by Ron Evans, the Command Module America is visible in orbit in the foreground against the South Massif's peak. Beyond the mountains, toward the lunar limb, lies the Moon's Mare Serenitatis. Four astronauts will venture around the Moon and back again on the Artemis II mission, scheduled for launch no earlier than September 2025.

詞彙學習