金星 ê 相位

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Phases of Venus
• 影像來源 kah 許可：Stéphane Gonzales
• 免費 ê APOD 課程：January 9, 2024 to the Amateur Astronomers of Association of New York
• 台文翻譯：An-Li Tsai (NSYSU)

[漢羅] 金星 ê 相位

金星有相位 ê 變化。 金星 就親像月娘，會出現完整 ê 圓盤，薄薄 ê 月眉形，kah 這兩款之間 ê 形態。 金星定定是 日落了後，抑是 日出進前，天頂上光 ê 天體。 毋過，伊傷細粒矣，一般是愛用雙筒千里鏡 抑是 細台天文望遠鏡，才有法度看清楚伊這馬 ê 相位是佗一款。 這場 縮時攝影系列相片，是 2015 年 開 6 個月 ê 時間，tī 法國 Charente-Maritime 省 ê Surgères 翕--ê。 毋但有翕著金星相位 ê 變化，嘛有翕著伊視寸尺 ê 改變。 金星 若是出現 tī 離地球較遠 ê 太陽後壁彼爿，伊看起來就會較細粒，而且是月圓相。 金星 kah 地球 若是攏出現 tī 太陽仝這爿，伊看起來 就會較大粒，毋過會是月眉相。 這個月 ê 金星 會 tī 天光進前出現，會是 頂膨月 ê 相位。

[POJ] Kim-chheⁿ ê Siòng-ūi

Kim-chheⁿ ū siòng-ūi ê piàn-hòa. Kim-chheⁿ to̍h chhin-chhiūⁿ goe̍h-niû, ē chhut-hiān oân-chéng ê îⁿ-pôaⁿ, po̍h-po̍h ê goe̍h-bâi-hêng, kah chit nn̄g khoán chi-kan ê hêng-thài. Kim-chheⁿ tiāⁿ-tiāⁿ sī ji̍t-lo̍h liáu-āu, ia̍h-sī ji̍t-chhut chìn-chêng, thiⁿ-téng siōng kng ê thian-thé. M̄-koh, i siuⁿ sè-lia̍p ah, it-poaⁿ sī ài iōng siang-tâng chhian-lí-kiàⁿ ia̍h-sī sè-tâi thian-bûn bōng-oán-kiàⁿ, chiah ū-hoat-tō͘ khòaⁿ-chheng-chhó i chit-má ê siòng-ūi sī toh chi̍t-khoán. Chit-tiûⁿ sok-sî-liap-iáⁿ hē-lia̍t siòng-phìⁿ, sī 2015 nî khui 6 kò goe̍h ê sî-kan,tī Hoat-kok Charente Maritime séng ê Surgères hip--ê. M̄-nā ū hip-tio̍h Kim-chheⁿ siòng-ūi ê piàn-hòa, mā ū hip-tio̍h i sī-chhùn-chhioh ê kái-piàn. Kim-chheⁿ nā-sī chhut-hiān tī lī Tē-kiû khah hn̄g ê Thài-iông āu-piah hit-pêng, i khòaⁿ-khí-lâi to̍h ē khah sè-lia̍p, jî-chhiáⁿ sī goe̍h-îⁿ siòng. Kim-chheⁿ kah Tē-kiû nā-sī lóng chhut-hiān tī Thài-iông kāng chit-pêng,i khòaⁿ--khí-lâi to̍h ē khah tōa-lia̍p, m̄-koh ē sī goe̍h-bâi siòng. Chit kò goe̍h ê Kim-chheⁿ ē tī thiⁿ-kng chìn-chêng chhut-hiān, ē sī téng-phòng-goe̍h ê siòng-ūi.

[KIP] Kim-tshenn ê Siòng-uī

Kim-tshenn ū siòng-uī ê piàn-huà. Kim-tshenn to̍h tshin-tshiūnn gue̍h-niû, ē tshut-hiān uân-tsíng ê înn-puânn, po̍h-po̍h ê gue̍h-bâi-hîng, kah tsit nn̄g khuán tsi-kan ê hîng-thài. Kim-tshenn tiānn-tiānn sī ji̍t-lo̍h liáu-āu, ia̍h-sī ji̍t-tshut tsìn-tsîng, thinn-tíng siōng kng ê thian-thé. M̄-koh, i siunn sè-lia̍p ah, it-puann sī ài iōng siang-tâng tshian-lí-kiànn ia̍h-sī sè-tâi thian-bûn bōng-uán-kiànn, tsiah ū-huat-tōo khuànn-tshing-tshó i tsit-má ê siòng-ūi sī toh tsi̍t-khuán. Tsit-tiûnn sok-sî-liap-iánn hē-lia̍t siòng-phìnn, sī 2015 nî khui 6 kò gue̍h ê sî-kan,tī Huat-kok Charente Maritime síng ê Surgères hip--ê. M̄-nā ū hip-tio̍h Kim-tshenn siòng-uī ê piàn-huà, mā ū hip-tio̍h i sī-tshùn-tshioh ê kái-piàn. Kim-tshenn nā-sī tshut-hiān tī lī Tē-kiû khah hn̄g ê Thài-iông āu-piah hit-pîng, i khuànn-khí-lâi to̍h ē khah sè-lia̍p, jî-tshiánn sī gue̍h-înn siòng. Kim-tshenn kah Tē-kiû nā-sī lóng tshut-hiān tī Thài-iông kāng tsit-pîng,i khuànn--khí-lâi to̍h ē khah tuā-lia̍p, m̄-koh ē sī gue̍h-bâi siòng. Tsit kò gue̍h ê Kim-tshenn ē tī thinn-kng tsìn-tsîng tshut-hiān, ē sī tíng-phòng-gue̍h ê siòng-uī.

[English] The Phases of Venus

Venus goes through phases. Just like our Moon, Venus can appear as a full circular disk, a thin crescent, or anything in between. Venus, frequently the brightest object in the post-sunset or pre-sunrise sky, appears so small, however, that it usually requires binoculars or a small telescope to clearly see its current phase. The featured time-lapse sequence was taken over the course of six months in 2015 from Surgères, Charente-Maritime, France, and shows not only how Venus changes phase, but changes angular size as well. When Venus is on the far side of the Sun from the Earth, it appears angularly smallest and nearest to full phase, while when Venus and Earth are on the same side of the Sun, Venus appears larger, but as a crescent. This month Venus rises before dawn in waxing gibbous phases.

詞彙學習