彗星 67P 頂懸 ê 雪

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Snows of Churyumov-Gerasimenko
• 影像來源：ESA, Rosetta, MPS, OSIRIS; UPD/LAM/IAA/SSO/INTA/UPM/DASP/IDA;動畫：Jacint Roger Perez
• 台文翻譯：An-Li Tsai (NSYSU)

[漢羅] 彗星 67P 頂懸 ê 雪

你若是徛 tī 週期性彗星 67P/Churyumov-Gerasimenko ê 山壁頂懸，並袂去予這場暴風雪擋咧。 Rosetta 太空船 tī 2016 年 6 月踅這粒彗星 ê 時陣，伊 ê 狹視角 kha-mé-lah 就 tī 彗星表面 頂懸 附近，紀錄著這寡 tī 視野內底看起來敢若是咧落雪 ê 塗粉 kah 冰粒。 有一寡 tī 影像內底較光 ê 光斑，可能是因為高能紮電粒子 抑是 宇宙線 去舂著 kha-mé-lah。 有一寡是 tī 大隻狗星座（大犬座）方向 實密 ê 背景星。 影片 內底 ê 背景星較好揣，因為 in ê 光巡 是 ùi 頂懸到下底。 這支精彩 ê 影片是 Rosetta 太空船 tiàm 離 彗核 13 公里遠 ê 所在，kā 25 分鐘內翕 ê 33 張 連紲影像 合成 ê 影片。 2016 年 9 月 ê 時陣，Rosetta 太空船完成伊最後 ê 任務了後，成功控制伊家己去挵 彗星 67P。 彗核就變做是 Rosetta 太空船 上落尾安息 ê 所在。

[POJ] Hūi-chheⁿ 67P téng-koân ê Seh

Lí nā-sī khiā tī chiu-kî-sèng hūi-chheⁿ 67P/Churyumov Gerasimenko ê soaⁿ-piah téng-koân, pēng bē khì hō͘ chit-tiûⁿ pō-hong-seh tòng lih. Rosetta Thài-khong-chûn tī 2016 nî 6 goe̍h se̍h chit lia̍p hūi-chheⁿ ê sî-chūn, i ê e̍h-sī-kak kha-mé-lah to̍h tī hūi-chheⁿ piáu-bīn téng-koân hù-kīn, kì-lio̍k tio̍h chit kóa tī sī-iá lāi-té khòaⁿ-khí-lâi káⁿ-nā sī leh lo̍h-seh ê thô͘-hún kah peng-lia̍p. Ū chi̍t-kóa tī iáⁿ-siōng lāi-té khah kng ê kng-pan, khó-lêng sī in-ūi ko-lêng chah-tiān lia̍p-chú ia̍h-sī ú-tiū-sòaⁿ khì cheng-tio̍h kha-mé-lah. Ū chi̍t-kóa sī tī tōa-chiah-káu seng-chō (Tōa-khián-chō) hong-hiòng cha̍t-ba̍t ê pōe-kéng-chheⁿ. Iáⁿ-phìⁿ lāi-té ê pōe-kéng-chheⁿ khah hó-chhōe, in-ūi in ê kng-sûn sī ùi téng-koân kàu ē-té. Chit-ki cheng-chhái ê iáⁿ-phìⁿ sī Rosetta Thài-khong-chûn tiàm lī hūi-he̍k 13 kong-lí hn̄g ê só͘-chāi, kā 25 hun-cheng lāi hip–ê 33 tiuⁿ liân-sòa iáⁿ-siōng ha̍p-sêng ê iáⁿ-phìⁿ. 2016 nî 9 goe̍h ê sî-chūn, Rosetta Thài-khong-chûn oân-sêng i chòe-āu ê jīm-bū liáu-āu, sêng-kong khòng-chè i ka-kī khì lòng Hūi-chheⁿ 67P. Hūi-he̍k to̍h piàn-chò sī Rosetta Thài-khong-chûn siāng-lo̍h-bóe an-sit ê só͘-chāi.

[KIP] Huī-tshenn 67P tíng-kuân ê Seh

Lí nā-sī khiā tī tsiu-kî-sìng huī-tshenn 67P/Churyumov Gerasimenko ê suann-piah tíng-kuân, pīng bē khì hōo tsit-tiûnn pō-hong-seh tòng lih. Rosetta Thài-khong-tsûn tī 2016 nî 6 gue̍h se̍h tsit lia̍p huī-tshenn ê sî-tsūn, i ê e̍h-sī-kak kha-mé-lah to̍h tī huī-tshenn piáu-bīn tíng-kuân hù-kīn, kì-lio̍k tio̍h tsit kuá tī sī-iá lāi-té khuànn-khí-lâi kánn-nā sī leh lo̍h-seh ê thôo-hún kah ping-lia̍p. Ū tsi̍t-kuá tī iánn-siōng lāi-té khah kng ê kng-pan, khó-lîng sī in-uī ko-lîng tsah-tiān lia̍p-tsú ia̍h-sī ú-tiū-suànn khì tsing-tio̍h kha-mé-lah. Ū tsi̍t-kuá sī tī tuā-tsiah-káu sing-tsō (Tuā-khián-tsō) hong-hiòng tsa̍t-ba̍t ê puē-kíng-tshenn. Iánn-phìnn lāi-té ê puē-kíng-tshenn khah hó-tshuē, in-uī in ê kng-sûn sī uì tíng-kuân kàu ē-té. Tsit-ki tsing-tshái ê iánn-phìnn sī Rosetta Thài-khong-tsûn tiàm lī huī-hi̍k 13 kong-lí hn̄g ê sóo-tsāi, kā 25 hun-tsing lāi hip–ê 33 tiunn liân-suà iánn-siōng ha̍p-sîng ê iánn-phìnn. 2016 nî 9 gue̍h ê sî-tsūn, Rosetta Thài-khong-tsûn uân-sîng i tsuè-āu ê jīm-bū liáu-āu, sîng-kong khòng-tsè i ka-kī khì lòng Huī-tshenn 67P. Huī-hi̍k to̍h piàn-tsò sī Rosetta Thài-khong-tsûn siāng-lo̍h-bué an-sit ê sóo-tsāi.

[English] The Snows of Churyumov-Gerasimenko

You couldn’t really be caught in this blizzard while standing by a cliff on periodic comet 67P/Churyumov-Gerasimenko. Orbiting the comet in June of 2016, the Rosetta spacecraft’s narrow angle camera did record streaks of dust and ice particles similar to snow as they drifted across the field of view close to the camera and above the comet’s surface. Still, some of the bright specks in the scene are likely due to a rain of energetic charged particles or cosmic rays hitting the camera, and the dense background of stars in the direction of the constellation of the Big Dog (Canis Major). In the video, the background stars are easy to spot trailing from top to bottom. The stunning movie was constructed from 33 consecutive images taken over 25 minutes while Rosetta cruised some 13 kilometers from the comet’s nucleus. In September 2016, the nucleus became the final resting place for the Rosetta spacecraft after its mission was ended with a successful controlled impact on 67P/Churyumov-Gerasimenko.

詞彙學習（漢羅/POJ/KIP/華語/English）

• 【週期性彗星】chiu-kî-sèng hūi-chheⁿ/tsiu-kî-sìng huī-tshenn/週期性彗星/periodic comet
• 【彗星 67P】hūi-chheⁿ 67P//彗星 67P/ comet 67P/Churyumov-Gerasimenko
• 【狹視角 kha-mé-lah】e̍h-sī-kak kha-mé-lah/e̍h-sī-kak kha-mé-lah/窄視角相機/narrow angle camera
• 【紮電粒子】chah-tiān lia̍p-chú/tsah-tiān lia̍p-tsú/帶電粒子/chardged particle
• 【宇宙線】ú-tiū-sòaⁿ/ú-tiū-suànn/宇宙線/cosmic ray
• 【大犬座】Tōa-khián-chō/Tuā-khián-tsō/大犬座/Canis Major
• 【Rosetta 太空船】Rosetta Thài-khong-chûn/Rosetta Thài-khong-tsûn/羅塞塔號太空船/Rosetta spacecraft
• 【彗核】hūi-he̍k/huī-hi̍k/彗核/comet nucleus