四邊形星群：獵戶座星雲 ê 心臟

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Trapezium: At the Heart of Orion
• 影像來源 kah 版權：Fred Zimmer, Telescope Live
• 台文翻譯：An-Li Tsai (NSYSU)

[漢羅] 四邊形星群：獵戶座星雲 ê 心臟

這張清楚 ê 宇宙影像中心是 獵戶座星雲 ê 心臟，內底有 4 粒高溫大質量恆星，in 就是 四邊形星群。 In 相倚 tī 半徑 1.5 光年 ê 範圍內，是獵戶座星雲核心 ê 實密星團 ê 主要成員。 四邊形星 群發出 ê 電離輻射 紫外光，大部份是 ùi 一粒足光 ê 恆星，獵戶座 Theta-1 C 發出來–ê。 伊驅動這个複雜 ê 恆星形成區，予伊發出可見光。 這个 300 萬歲 ê 獵戶座星雲 內底 ê 星團，是比伊少年 ê 時陣猶閣較實密。 照 動力學研究 表示講，可能是當初時 失控 ê 恆星相挵，產生一粒 質量超過 100 倍太陽質量 ê 烏洞 。 星團內底若是有 烏洞 ，就會當解說 四邊形星群 內底 ê 恆星是按怎會有遮爾懸 ê 運動速度。 獵戶座星雲 kah 咱 ê 距離差不多有 1500 光年，按呢這粒烏洞真有可能是目前為止 kah 咱地球 上倚 ê 烏洞。

[POJ] Sì-piⁿ-hêng Seng-kûn:La̍h-hō͘-chō Seng-hûn ê sim-chōng

Chit-tiuⁿ chheng-chhó ê ú-tiū iáⁿ-siōng tiong-sim sī La̍h-hō͘-chō Seng-hûn ê sim-chōng, lāi-té ū 4 lia̍p ko-un tōa chit-liōng hêng-chheⁿ, in to̍h-sī Sì-piⁿ-hêng Seng-kûn. In sio-óa tī pòaⁿ-kèng 1.5 kng-nî ê hoān-ûi-lāi,sī La̍h-hō͘-chō Seng-hûn he̍k-sim ê si̍t ba̍t chheⁿ thoân ê chú-iàu sêng-oân. Sì-piⁿ-hêng Seng-kûn hoat-chhut ê tiān lī hok-siā chí gōa kng,tōa-pō͘-hūn sī ùi chi̍t-lia̍p chiok kng ê hêng-chheⁿ,La̍h-hō͘-chō Theta 1 C hoat–chhut-lâi–ê. I khu-tōng chit-ê ho̍k-cha̍p ê hêng-chheⁿ hêng-sêng-khu, hō͘ i hoat-chhut khó-kiàn-kng. Chit-ê 300 bān-hòe ê La̍h-hō͘-chō Seng-hûn lāi-té ê seng-thoân, sī pí i siàu-liân ê sî-chūn iáu koh-khah cha̍t-ba̍t. Chiàu tōng-le̍k-ha̍k gián-kiù piáu-sī kóng, khó-lêng sī tong-chhoe-sî sit-khòng ê hêng-chheⁿ sio-lòng, sán-seng chi̍t-lia̍p chit-liōng chhiau-kòe 100 pōe thài-iông chit-liōng ê o͘-tōng. Seng-thoân lāi-té nā-sī ū o͘-tōng, to̍h ē-tàng kái-soeh Sì-piⁿ-hêng Seng-kûn lāi-té ê hêng-chheⁿ sī-án-chóaⁿ ē ū chiah-nī koân ê ūn-tōng sok-tō͘. La̍h-hō͘-chō Seng-hûn kah lán ê kū-lî chha-put-to ū 1500 kng-nî, án-ne chit lia̍p o͘-tōng chin ū khó-lêng sī bo̍k-chêng ûi-chí kah lán Tē-kiû siōng óa ê o͘-tōng.

[KIP] Sì-pinn-hîng Sing-kûn:La̍h-hōo-tsō Sing-hûn ê sim-tsōng

Tsit-tiunn tshing-tshó ê ú-tiū iánn-siōng tiong-sim sī La̍h-hōo-tsō Sing-hûn ê sim-tsōng, lāi-té ū 4 lia̍p ko-un tuā tsit-liōng hîng-tshenn, in to̍h-sī Sì-pinn-hîng Sing-kûn. In sio-uá tī puànn-kìng 1.5 kng-nî ê huān-uî-lāi,sī La̍h-hōo-tsō Sing-hûn hi̍k-sim ê si̍t ba̍t tshenn thuân ê tsú-iàu sîng-uân. Sì-pinn-hîng Sing-kûn huat-tshut ê tiān lī hok-siā tsí guā kng,tuā-pōo-hūn sī uì tsi̍t-lia̍p tsiok kng ê hîng-tshenn,La̍h-hōo-tsō Theta 1 C huat–tshut-lâi–ê. I khu-tōng tsit-ê ho̍k-tsa̍p ê hîng-tshenn hîng-sîng-khu, hōo i huat-tshut khó-kìan-kng. Tsit-ê 300 bān-huè ê La̍h-hōo-tsō Sing-hûn lāi-té ê sing-thuân, sī pí i siàu-liân ê sî-tsūn iáu koh-khah tsa̍t-ba̍t. Tsiàu tōng-li̍k-ha̍k gián-kiù piáu-sī kóng, khó-lîng sī tong-tshue-sî sit-khòng ê hîng-tshenn sio-lòng, sán-sing tsi̍t-lia̍p tsit-liōng tshiau-kuè 100 puē thài-iông tsit-liōng ê oo-tōng. Sing-thuân lāi-té nā-sī ū oo-tōng, to̍h ē-tàng kái-sueh Sì-pinn-hîng Sing-kûn lāi-té ê hîng-tshenn sī-án-tsuánn ē ū tsiah-nī kuân ê ūn-tōng sok-tōo. La̍h-hōo-tsō Sing-hûn kah lán ê kū-lî tsha-put-to ū 1500 kng-nî, án-ne tsit lia̍p oo-tōng tsin ū khó-lîng sī bo̍k-tsîng uî-tsí kah lán Tē-kiû siōng uá ê oo-tōng.

[English] Trapezium: At the Heart of Orion

Near the center of this sharp cosmic portrait, at the heart of the Orion Nebula, are four hot, massive stars known as the Trapezium. Gathered within a region about 1.5 light-years in radius, they dominate the core of the dense Orion Nebula Star Cluster. Ultraviolet ionizing radiation from the Trapezium stars, mostly from the brightest star Theta-1 Orionis C powers the complex star forming region’s entire visible glow. About three million years old, the Orion Nebula Cluster was even more compact in its younger years and a dynamical study indicates that runaway stellar collisions at an earlier age may have formed a black hole with more than 100 times the mass of the Sun. The presence of a black hole within the cluster could explain the observed high velocities of the Trapezium stars. The Orion Nebula’s distance of some 1,500 light-years would make it one of the closest known black holes to planet Earth.

詞彙學習（漢羅/POJ/KIP/華語/English）

• 【四邊形星群】Sì-piⁿ-hêng Seng-kûn/Sì-pinn-hîng Sing-kûn/四邊形星群/Trapezium
• 【獵戶座星雲】La̍h-hō͘-chō Seng-hûn/La̍h-hōo-tsō Sing-hûn/獵戶座星雲/Orion Nebula
• 【獵戶座 Theta-1 C】La̍h-hō͘-chō Theta it C/La̍h-hōo-tsō Theta it C/獵戶座 Theta-1 C/Theta-1 Orionis C
• 【恆星形成區】hêng-chheⁿ hêng-sêng-khu/hîng-tshenn hîng-sîng-khu/恆星形成區/star forming region
• 【烏洞】o͘-tōng/oo-tōng/黑洞/black hole
• 【星團】seng-thoân/sing-thuân/星團/star cluster
• 【電離】tiān-lî/tiān-lî/電離/ionizing
• 【輻射】hok-siā/hok-siā/輻射/radiation