揭示計畫：宇宙模擬影片

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Illustris: A Simulation of the Universe
• 影片來源：Illustris Collaboration, NASA, PRACE, XSEDE, MIT, Harvard CfA; 音樂：The Poisoned Princess (Media Right Productions)
• 台文翻譯：An-Li Tsai (NSYSU)

[漢羅] 揭示計畫：宇宙模擬影片

咱是按怎來到遮--ê？ 請你 揤「放送」，坐予好勢，開始來看。 這个宇宙演化 ê 電腦模擬，提供咱了解 tī 這个宇宙中，星系是按怎形成--ê？人類是 tī 宇宙 ê 佗一位？ 揭示計畫 是一个 tī 2014 年 用 2000 萬點鐘 ê CPU 時間，追蹤 3500 萬 光年 長 ê 立方體 tī 130 億年內演化 ê 電腦模擬計畫。 這个模擬 是咧追蹤物質是按怎 做出 無仝款 ê 星系。 這个虛擬 宇宙 那演化，一寡物質嘛那咧漲大。 無偌久，這个宇宙就因為重力作用，堅做雲絲、星系、kah 星系團。 這支影片 是利用虛擬相機踅咧看一部份 ê 宇宙。 頭一个是咧看 烏暗物質 ê 演化，紲落來 0:45 ê 時陣是 水素 氣體 tī 無仝溫度 ê 變化，閣來 1:30 ê 時陣是重元素，像 日素 kah 炭素 ê 出現，落尾 2:07 ê 時陣閣轉來看 烏暗物質。 影格倒爿下跤標 ê 是 ùi 大霹靂 開始算 ê 時間，正爿下底標 ê 是物質 ê 種類。 0:50 ê 爆發事件是星系中心 ê 超大質量烏洞噴出來 ê 燒滾滾 ê 氣泡。 揭示計畫 kah 真正 ê 宇宙 無仝 ê 部份真趣味，包括講 這个模擬 是按怎會生出傷濟較老 ê 恆星，所以這嘛是一个研究主題。

[POJ] Khiat-sī kè-ōe: Ú-tiū bô͘-gí iáⁿ-phìⁿ

Lán sī án-chóaⁿ lâi-kàu chiah--ê? Chhiáⁿ lí chhi̍h "hòng-sàng", chē hō͘ hó-sè, khai-sí lâi-khòaⁿ. Chit-ê ú-tiū ián-hòa ê tiān-náu bô͘-gí, thê-kiong lán liáu-kái tī chit-ê ú-tiū tiong, seng-hē sī án-nóa hêng-sêng--ê? jîn-lūi sī tī ú-tiū ê to̍h chi̍t-ūi? Khiat-sī kè-ōe sī chi̍t-ê tī 2014 nî iōng 2000 bān tiám-cheng ê CPU sî-kan, tui-chong 3500 bān kng-nî tn̂g ê li̍p-hong-thé tī 130 ek nî lāi ián-hòa ê tiān-náu bô͘-gí kè-ōe. Chit-ê bô͘-gí sī leh tui-chong bu̍t-chit sī án-chóaⁿ chò-chhut bô-kâng-khoán ê seng-hē. Chit-ê hi-gí ú-tiū ná ián-hòa, chi̍t-kóa bu̍t-chit mā ná leh tiùⁿ-tōa. Bô gōa-kú, chit-ê ú-tiū to̍h in-ūi tiōng-le̍k chok-iōng, kian chò hûn-si, seng-hē, kah seng-hē-thoân. Chit-ki iáⁿ-phìⁿ sī lī-iōng hi-gí siòng-ki se̍h leh khòaⁿ chi̍t-pō͘-hūn ê ú-tiū. Thâu-chi̍t-ê sī leh khòaⁿ o͘-àm bu̍t-chit ê ián-hòa, sòa-lo̍h-lâi 0:45 ê sî-chūn sī chúi-sò͘ khì-thé tī bô-kâng un-tō͘ ê piàn-hòa, koh-lâi 1:30 ê sî-chūn sī tāng-goân-sò͘, chhiūⁿ ji̍t-sò͘ kah thòaⁿ-sò͘ ê chhut-hiān, lo̍h-bóe 2:07 ê sî-chūn koh tńg-lâi khòaⁿ o͘-àm bu̍t-chit. Iáⁿ-keh tò-pêng ē-kha piau--ê sī ùi Tōa-phek-le̍k khai-sí sǹg--ê sî-kan, chiàⁿ-pêng ē-té piau ê sī bu̍t-chit ê chióng-lūi. 0:50 ê po̍k-hoat sū-kiāⁿ sī seng-hē tiong-sim ê chhiau-tōa chit-liōng o͘-tōng phùn--chhut-lâi ê sio-kún-kún ê khì-phàu. Khiat-sī kè-ōe kah chin-chiàⁿ ê ú-tiū bô-kâng ê pō͘-hūn chin chhù-bī, pau-koat kóng chit-ê bô͘-gí sī án-chóaⁿ ē seⁿ-chhut siuⁿ-chē khah lāu ê hêng-chheⁿ, só͘-í che mā-sī chi̍t-ê gián-kiù chú-tê.

[KIP] Khiat-sī kè-uē: Ú-tiū bôo-gí iánn-phìnn

Lán sī án-tsuánn lâi-kàu tsiah--ê? Tshiánn lí tshi̍h "hòng-sàng", tsē hōo hó-sè, khai-sí lâi-khuànn. Tsit-ê ú-tiū ián-huà ê tiān-náu bôo-gí, thê-kiong lán liáu-kái tī tsit-ê ú-tiū tiong, sing-hē sī án-nuá hîng-sîng--ê? jîn-luī sī tī ú-tiū ê to̍h tsi̍t-uī? Khiat-sī kè-uē sī tsi̍t-ê tī 2014 nî iōng 2000 bān tiám-tsing ê CPU sî-kan, tui-tsong 3500 bān kng-nî tn̂g ê li̍p-hong-thé tī 130 ik nî lāi ián-huà ê tiān-náu bôo-gí kè-uē. Tsit-ê bôo-gí sī leh tui-tsong bu̍t-tsit sī án-tsuánn tsò-tshut bô-kâng-khuán ê sing-hē. Tsit-ê hi-gí ú-tiū ná ián-huà, tsi̍t-kuá bu̍t-tsit mā ná leh tiùnn-tuā. Bô guā-kú, tsit-ê ú-tiū to̍h in-uī tiōng-li̍k tsok-iōng, kian tsò hûn-si, sing-hē, kah sing-hē-thuân. Tsit-ki iánn-phìnn sī lī-iōng hi-gí siòng-ki se̍h leh khuànn tsi̍t-pōo-hūn ê ú-tiū. Thâu-tsi̍t-ê sī leh khuànn oo-àm bu̍t-tsit ê ián-huà, suà-lo̍h-lâi 0:45 ê sî-tsūn sī tsuí-sòo khì-thé tī bô-kâng un-tōo ê piàn-huà, koh-lâi 1:30 ê sî-tsūn sī tāng-guân-sòo, tshiūnn ji̍t-sòo kah thuànn-sòo ê tshut-hiān, lo̍h-bué 2:07 ê sî-tsūn koh tńg-lâi khuànn oo-àm bu̍t-tsit. Iánn-keh tò-pîng ē-kha piau--ê sī uì Tuā-phik-li̍k khai-sí sǹg--ê sî-kan, tsiànn-pîng ē-té piau ê sī bu̍t-tsit ê tsióng-luī. 0:50 ê po̍k-huat sū-kiānn sī sing-hē tiong-sim ê tshiau-tuā tsit-liōng oo-tōng phùn--tshut-lâi ê sio-kún-kún ê khì-phàu. Khiat-sī kè-uē kah tsin-tsiànn ê ú-tiū bô-kâng ê pōo-hūn tsin tshù-bī, pau-kuat kóng tsit-ê bôo-gí sī án-tsuánn ē senn-tshut siunn-tsē khah lāu ê hîng-tshenn, sóo-í tse mā-sī tsi̍t-ê gián-kiù tsú-tê.

[English] Illustris: A Simulation of the Universe

How did we get here? Click play, sit back, and watch. A computer simulation of the evolution of the universe provides insight into how galaxies formed and perspectives into humanity's place in the universe. The Illustris project exhausted 20 million CPU hours in 2014 following 12 billion resolution elements spanning a cube 35 million light years on a side as it evolved over 13 billion years. The simulation tracks matter into the formation of a wide variety of galaxy types. As the virtual universe evolves, some of the matter expanding with the universe soon gravitationally condenses to form filaments, galaxies, and clusters of galaxies. The featured video takes the perspective of a virtual camera circling part of this changing universe, first showing the evolution of dark matter, then hydrogen gas coded by temperature (0:45), then heavy elements such as helium and carbon (1:30), and then back to dark matter (2:07). On the lower left the time since the Big Bang is listed, while on the lower right the type of matter being shown is listed. Explosions (0:50) depict galaxy-center supermassive black holes expelling bubbles of hot gas. Interesting discrepancies between Illustris and the real universe have been studied, including why the simulation produced an overabundance of old stars.

詞彙學習