木星 kah 雙生仔座流星雨

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Jupiter and the Geminid
• 影像來源 kah 版權：Gaurav Singh
• 台文翻譯：An-Li Tsai (NSYSU)

[漢羅] 木星 kah 雙生仔座流星雨

這粒光爍爍 ê 火流星 tī 一个足短 ê 時間內，tī 地球夜空中變甲比木星閣較光。 這張意外翕著 ê 影像，是 12 月 14，差不多是 雙生仔座流星雨 上濟 ê 時陣，tī 加拿大 冷吱吱 ê 暗暝，利用 kha-mé-lah 咧翕流星 ê 縮時攝影 ê 時陣翕著--ê。 雙生仔座流星雨是 編號 3200 ê Phaethon 小行星 ê 年度禮物，一直是 tī 12 月 ê 時陣送--來。 這粒神祕小行星落 tī 軌道頂懸 ê 塗粉粒，用一秒鐘 22 公里緊 ê 速度迵過地球高層大氣 ê 時陣，就會蒸發，變做流星光巡。 是講，雙生仔座流星雨會叫做這个名，是因為這寡流星 ê 輻射點 tī 雙生仔座內底。 這个輻射點就 tī 相片倒爿下底。 除了流星以外，12 月 ê 夜空 閣有 昴宿星團 kah 畢宿星團，正爿閣有足光 ê 木星。

[POJ] Bo̍k-chheⁿ kah Siang-seⁿ-á-chō Liû-chheⁿ-hō͘

Chit lia̍p kng-sih-sih ê hóe-liû-chheⁿ tī chi̍t-ê chiok té ê sî-kan-lāi, tī Tē-kiû iā-khong tiong piàn-kah pí Bo̍k-chheⁿ koh-khah kng. Chit-tiuⁿ ì-gōa hip--tio̍h ê iáⁿ-siōng, sī 12 goe̍h 14, chha-put-to sī Siang-seⁿ-á-chō Liû-chheⁿ-hō͘ siōng-chē ê sî-chūn, tī Ka-ná-tāi léng-ki-ki ê àm-mê, lī-iōng kha-mé-lah leh hip liû-chheⁿ ê sok-sî-liap-iáⁿ ê sî-chūn hip--tio̍h--ê. Siang-seⁿ-á-chō Liû-chheⁿ-hō͘ sī pian-hō 3200 ê Phaethon sió-kiâⁿ-chheⁿ ê nî-tō͘ lé-bu̍t, it-ti̍t sī tī 12 goe̍h ê sî-chūn sàng--lâi. Chit lia̍p sîn-pì sió-kiâⁿ-chheⁿ lak tī kúi-tō téng-koân ê thô͘-hún-lia̍p, iōng chi̍t bió-cheng 22 kong-lí kín ê sok-tō͘ thàng-kòe Tē-kiû ko-chân tāi-khì ê sî-chūn, to̍h ē cheng-hoat, piàn-chò liû-chheⁿ kng-sûn. Sī-kóng, Siang-seⁿ-á chō Liû-chheⁿ-hō͘ ē kiò-chò chit-ê miâ, sī in-ūi chit kóa liû-chheⁿ ê hok-siā-tiám tī Siang-seⁿ-á-chō lāi-té. Chit ê hok-siā-tiám tō tī siòng-phìⁿ tò-pêng ē-té. Tû-liáu liû-chheⁿ í-gōa, 12 goe̍h ê iā-khong koh-ū Báu-siù Seng-thoân kah Pit-siù Seng-thoân, chiàⁿ-pêng koh-ū chiok kng ê Bo̍k-chheⁿ.

[KIP] Bo̍k-tshenn kah Siang-senn-á-tsō Liû-tshenn-hōo

Tsit lia̍p kng-sih-sih ê hué-liû-tshenn tī tsi̍t-ê tsiok té ê sî-kan-lāi, tī Tē-kiû iā-khong tiong piàn-kah pí Bo̍k-tshenn koh-khah kng. Tsit-tiunn ì-guā hip--tio̍h ê iánn-siōng, sī 12 gue̍h 14, tsha-put-to sī Siang-senn-á-tsō Liû-tshenn-hōo siōng-tsē ê sî-tsūn, tī Ka-ná-tāi líng-ki-ki ê àm-mê, lī-iōng kha-mé-lah leh hip liû-tshenn ê sok-sî-liap-iánn ê sî-tsūn hip--tio̍h--ê. Siang-senn-á-tsō Liû-tshenn-hōo sī pian-hō 3200 ê Phaethon sió-kiânn-tshenn ê nî-tōo lé-bu̍t, it-ti̍t sī tī 12 gue̍h ê sî-tsūn sàng--lâi. Tsit lia̍p sîn-pì sió-kiânn-tshenn lak tī kuí-tō tíng-kuân ê thôo-hún-lia̍p, iōng tsi̍t bió-tsing 22 kong-lí kín ê sok-tōo thàng-kuè Tē-kiû ko-tsân tāi-khì ê sî-tsūn, to̍h ē tsing-huat, piàn-tsò liû-tshenn kng-sûn. Sī-kóng, Siang-senn-á tsō Liû-tshenn-hōo ē kiò-tsò tsit-ê miâ, sī in-uī tsit kuá liû-tshenn ê hok-siā-tiám tī Siang-senn-á-tsō lāi-té. Tsit ê hok-siā-tiám tō tī siòng-phìnn tò-pîng ē-té. Tû-liáu liû-tshenn í-guā, 12 gue̍h ê iā-khong koh-ū Báu-siù Sing-thuân kah Pit-siù Sing-thuân, tsiànn-pîng koh-ū tsiok kng ê Bo̍k-tshenn.

[English] Jupiter and the Geminid

For a brief moment, this brilliant fireball meteor outshone Jupiter in planet Earth's night. The serendipitous image was captured while hunting meteors under cold Canadian skies with a camera in timelapse mode on December 14, near the peak of the Geminid meteor shower. The Geminid meteor shower, asteroid 3200 Phaethon's annual gift, always arrives in December. Dust shed along the orbit of the mysterious asteroid causes the meteor streaks, as the vaporizing grains plow through our fair planet's upper atmosphere at 22 kilometers per second. Of course Geminid shower meteors appear to radiate from a point in the constellation of the Twins. That's below and left of this frame. With bright Jupiter on the right, also in the December night skyview are the Pleiades and Hyades star clusters.

詞彙學習