冰島水沖天頂 ê 七彩極光

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Rainbow Aurora over Icelandic Waterfall
• 影像來源 kah 版權：Stefano Pellegrini
• 你 ê 生日禮物：你 ê APOD 生日相片是啥物？ (post 1995)
• 台文翻譯：An-Li Tsai (NSYSU)

[漢羅] 冰島水沖天頂 ê 七彩極光

你看--過 ê 極光敢有遮爾媠？ 第一，極光 看起來有可能會親像 虹，毋過 in 是完全無仝款 ê 現象。 極光是因為太陽產生 ê 粒子，綴 地球磁場 來到 地球大氣層，激發 tī 地球無仝懸度 ê 原子 發彩色光 ê 結果。 顛倒來講，虹 是日光 ùi 欲落--落來 ê 雨水，反向散射產生--ê，無仝色是無仝角度 屈折 ê 結果。 是講 真不幸，極光袂產生水沖，毋過你若是計畫好勢、運氣袂䆀，你就會當同齊翕著 in。 這張影像 是進前 11 月 tī 冰島 Skógafoss 水沖 附近 翕--ê，是 kā 幾若張相片組合起來 ê 影像。 這个翕相 ê 計畫主要是欲翕 媠甲親像一幅圖 ê 水沖，kah 伊天頂 ê 銀河系 中央帶。 是講運氣袂䆀，壯觀 ê 極光連鞭就出現 tī 銀河彎弓下底。 遙遠 ê 背景內底，閣有 昴宿星團 kah 仙女座 星系。

[POJ] Peng-tó Chúi-chhiâng thiⁿ-téng ê Chhit-chhái ke̍k-kng

Lí khòaⁿ--kòe ê ke̍k-kng kám-ū chiah-nī súi? Tē-it, ke̍k-kng khòaⁿ--khí-lâi ū khó-lêng ē chhin-chhiūⁿ khēng, m̄-koh in sī oân-choân bô-kâng-khoán ê hiān-siōng. Ke̍k-kng sī in-ūi Thài-iông sán-seng ê lia̍p-chú, tòe Tē-kiû chû-tiûⁿ lâi-kàu Tē-kiû tāi-khì-chân, kek-hoat tī Tē-kiû bô-kâng koân-tō͘ ê goân-chú hoat chhái-sek kng ê kiat-kó. Tian-tò lâi-kóng, khēng sī ji̍t-kng ùi beh lak--lo̍h-lâi ê hō͘-chúi, hoán-hiòng sàn-siā sán seⁿ--ê, bô-kâng sek sī bô-kâng kak-tō͘ khut-chiat ê kiat-kó. Sī-kóng chin put-hēng, ke̍k-kng bē sán-seng chúi-chhiâng, m̄-koh lí nā-sī kè-ōe hó-sè, ūn-khì bē-bái, lí to̍h ē-tàng tâng-chê hip-tio̍h in. Chit-tiuⁿ iáⁿ-siōng sī chìn-chêng 11 goe̍h tī Peng-tó Skógafoss chúi-chhiâng hù-kīn hip--ê, sī kā kúi-nā tiuⁿ siòng-phìⁿ cho͘-ha̍p khí-lâi ê iáⁿ-siōng. Chit-ê hip-siòng ê kè-ōe chú-iàu sī beh hip súi kah chhin-chhiūⁿ chi̍t pak tô͘ ê chúi-chhiâng, kah i thiⁿ-téng ê Gîn-hô-hē tiong-ng-tòa. Sī-kóng ūn-khì bē-bái, chòng-koan ê ke̍k-kng liâm-mi to̍h chhut-hiān tī Gîn-hô oan-keng ē-té. Iâu-oán ê pōe-kéng lāi-té, koh-ū Báu-siù Seng-thoân kah Sian-lú-chō Seng-hē.

[KIP] Ping-tó Tsuí-tshiâng thinn-tíng ê Tshit-tshái ki̍k-kng

Lí khuànn--kuè ê ki̍k-kng kám-ū tsiah-nī suí? Tē-it, ki̍k-kng khuànn--khí-lâi ū khó-lîng ē tshin-tshiūnn khīng, m̄-koh in sī uân-tsuân bô-kâng-khuán ê hiān-siōng. Ki̍k-kng sī in-uī Thài-iông sán-sing ê lia̍p-tsú, tuè Tē-kiû tsû-tiûnn lâi-kàu Tē-kiû tāi-khì-tsân, kik-huat tī Tē-kiû bô-kâng kuân-tōo ê guân-tsú huat tshái-sik kng ê kiat-kó. Tian-tò lâi-kóng, khīng sī ji̍t-kng uì beh lak--lo̍h-lâi ê hōo-tsuí, huán-hiòng sàn-siā sán senn--ê, bô-kâng sik sī bô-kâng kak-tōo khut-tsiat ê kiat-kó. Sī-kóng tsin put-hīng, ki̍k-kng bē sán-sing tsuí-tshiâng, m̄-koh lí nā-sī kè-uē hó-sè, ūn-khì bē-bái, lí to̍h ē-tàng tâng-tsê hip-tio̍h in. Tsit-tiunn iánn-siōng sī tsìn-tsîng 11 gue̍h tī Ping-tó Skógafoss tsuí-tshiâng hù-kīn hip--ê, sī kā kuí-nā tiunn siòng-phìnn tsoo-ha̍p khí-lâi ê iánn-siōng. Tsit-ê hip-siòng ê kè-uē tsú-iàu sī beh hip suí kah tshin-tshiūnn tsi̍t pak tôo ê tsuí-tshiâng, kah i thinn-tíng ê Gîn-hô-hē tiong-ng-tuà. Sī-kóng ūn-khì bē-bái, tsòng-kuan ê ki̍k-kng liâm-mi to̍h tshut-hiān tī Gîn-hô uan-king ē-té. Iâu-uán ê puē-kíng lāi-té, koh-ū Báu-siù Sing-thuân kah Sian-lú-tsō Sing-hē.

[English] Rainbow Aurora over Icelandic Waterfall

Yes, but can your aurora do this? First, yes, auroras can look like rainbows even though they are completely different phenomena. Auroras are caused by Sun-created particles being channeled into Earth's atmosphere by Earth's magnetic field, and create colors by exciting atoms at different heights. Conversely, rainbows are created by sunlight backscattering off falling raindrops, and different colors are refracted by slightly different angles. Unfortunately, auroras can’t create waterfalls, but if you plan well and are lucky enough, you can photograph them together. The featured picture is composed of several images taken on the same night last November near the Skógafoss waterfall in Iceland. The planning centered on capturing the central band of our Milky Way galaxy over the picturesque cascade. By luck, a spectacular aurora soon appeared just below the curving arch of the Milky Way. Far in the background, the Pleiades star cluster and the Andromeda galaxy can be found.

詞彙學習