183 工 ê 太陽

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：183 Days in the Sun
• 影像來源 kah 版權：José Zarcos Palma
• 台文翻譯：An-Li Tsai (NSYSU)

[漢羅] 183 工 ê 太陽

用針孔相機 kah 翕相紙進行 183 工 ê 感光，結果翕出這幅長時間 ê 日照軌跡圖。 這張相片是 tī 葡萄牙 Mertola 紀錄 日頭 ùi 2022 年 ê 夏至 到 冬至，6 月 21 到 12 月 21，逐工 tī 地球 天頂 ê路線。 6 月 21 ê 時陣，太陽 tī 北半球天頂行到上懸 ê 所在，伊 tī 天頂 ê 路線行做一條上長 ê 弧線，表示講這工 ê 日時上長。 這就是天文學定義 北半球 夏季 ê 頭一工。 冬至 ê 日時時間上短，是北半球冬季 ê 頭一工。 Tī 這張 2022 年 ê 日照軌跡圖內底，就是太陽上低上短彼條光弧。 北半球 2023 年 ê 冬至是 tī 世界協調時 12 月 22 3:27。 對北美洲 ê 時區來講，是 12 月 21。 對亞洲 ê 時區來講，仝款是 12 月 22。

[POJ] 183 kang ê Thài-iông

Iōng chiam-kháng siòng-ki kah hip-siòng-chóa chìn-hêng 183 kang ê kám-kng, kiat-kó hip chhut chit pak tn̂g sî-kan ê ji̍t-chiàu khúi-jiah-tô͘. Chit-tiuⁿ siòng-phìⁿ sī tī Phû-tô-gâ Mertola kì-lio̍k ji̍t-thâu ùi 2022 nî ê hē-chì kàu tang-chì, 6 goe̍h 21 kàu 12 goe̍h 21, ta̍k-kang tī Tē-kiû thiⁿ-téng ê lō͘-sòaⁿ. 6 goe̍h 21 ê sî-chūn, Thài-iông tī pak-pòaⁿ-kiû thiⁿ-téng kiâⁿ kàu siōng koân ê só͘-chāi, i tī thiⁿ-téng ê lō͘-sòaⁿ kiâⁿ chò chi̍t tiâu siōng tn̂g ê hô͘ sòaⁿ, piáu-sī kóng chit kang ê ji̍t–sî siōng tn̂g. Che to̍h sī thian-bûn-ha̍k tēng-gī pak-pòaⁿ-kiû hā-kùi ê thâu chi̍t-kang. Tang-chì ê ji̍t-sî sî-kan siōng té, sī pak-pòaⁿ-kiû tang-kùi ê thâu chi̍t-kang. Tī chit-tiuⁿ 2022 nî ê ji̍t-chiàu khúi-jiah-tô͘ lāi-té, to̍h-sī Thài-iông sióng kē siōng té hit tiâu kng-hô͘. Pak-pòaⁿ-kiû 2023 nî ê tang-chì sī tī Sè-kài Hia̍p-tiâu-sî 12 goe̍h 22 3:27. Tùi Pak-bí-chiu ê sî-khu lâi-kóng, sī 12 goe̍h 21. Tùi A-chiu ê sî-khu lâi-kóng, kâng-khoán sī 12 goe̍h 22.

[KIP] 183 kang ê Thài-iông

Iōng tsiam-kháng siòng-ki kah hip-siòng-tsuá tsìn-hîng 183 kang ê kám-kng, kiat-kó hip tshut tsit pak tn̂g sî-kan ê ji̍t-tsiàu khuí-jiah-tôo. Tsit-tiunn siòng-phìnn sī tī Phû-tô-gâ Mertola kì-lio̍k ji̍t-thâu uì 2022 nî ê hē-tsì kàu tang-tsì, 6 gue̍h 21 kàu 12 gue̍h 21, ta̍k-kang tī Tē-kiû thinn-tíng ê lōo-suànn. 6 gue̍h 21 ê sî-tsūn, Thài-iông tī pak-puànn-kiû thinn-tíng kiânn kàu siōng kuân ê sóo-tsāi, i tī thinn-tíng ê lōo-suànn kiânn tsò tsi̍t tiâu siōng tn̂g ê hôo suànn, piáu-sī kóng tsit kang ê ji̍t–sî siōng tn̂g. Tse to̍h sī thian-bûn-ha̍k tīng-gī pak-puànn-kiû hā-kuì ê thâu tsi̍t-kang. Tang-tsì ê ji̍t-sî sî-kan siōng té, sī pak-puànn-kiû tang-kuì ê thâu tsi̍t-kang. Tī tsit-tiunn 2022 nî ê ji̍t-tsiàu khuí-jiah-tôo lāi-té, to̍h-sī Thài-iông sióng kē siōng té hit tiâu kng-hôo. Pak-puànn-kiû 2023 nî ê tang-tsì sī tī Sè-kài Hia̍p-tiâu-sî 12 gue̍h 22 3:27. Tuì Pak-bí-tsiu ê sî-khu lâi-kóng, sī 12 gue̍h 21. Tuì A-tsiu ê sî-khu lâi-kóng, kâng-khuán sī 12 gue̍h 22.

[English] 183 Days in the Sun

A single 183 day exposure with a pinhole camera and photographic paper resulted in this long-duration solargraph. Recorded from solstice to solstice, June 21 to December 21, in 2022, it follows the Sun’s daily arcing path through planet Earth’s skies from Mertola, Portugal. On June 21, the Sun’s highest point and longest arc represents the longest day and the astronomical beginning of summer in the northern hemisphere. The solstice date with the fewest hours of daylight is at the beginning of winter in the north, corresponding to the Sun’s shortest and lowest arc in the 2022 solargraph. For 2023, the northern winter solstice was on December 22 at 3:27 UTC. That’s December 21 for North America time zones.

詞彙學習（漢羅/POJ/KIP/華語/English）

• 【日照軌跡圖】ji̍t-chiàu kúi-jiah-tô͘/ji̍t-tsiàu kuí-jiah-tôo/日照軌跡圖/solargraph
• 【感光】kám-kng/kám-kng/感光/exposure
• 【針孔相機】chiam-kháng siòng-ki/tsiam-kháng siòng-ki/針孔相機/pinhole camera
• 【夏至】hā-chì/hā-tsì/夏至/summer solstice
• 【夏至】hē-chì/hē-tsì/夏至/summer solstice
• 【冬至】tang-chì/tang-tsì/冬至/winter solstice
• 【冬節】tang-cheh/tang-tseh/冬至/winter solstice
• 【世界協調時】Sè-kài Hia̍p-tiâu-sî/Sè-kài Hia̍p-tiâu-sî/世界協調時/Coordinated Universal Time (UTC)
• 【時區】sî-khu/sî-khu/時區/time zone