三粒星系 kah 一粒彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Three Galaxies and a Comet
• 影像來源 kah 版權：Dan Bartlett
• 台文翻譯：An-Li Tsai (NSYSU)

[漢羅] 三粒星系 kah 一粒彗星

這張向南天 天鶴座方向 翕 ê 1 度闊 闊幅視野內底，四界攏是遙遠 ê 星系。 毋過，正爿下跤有三个捲螺仔星系是足出眾--ê。 實際上，這三个星系是一組--ê，叫做 天鶴三重奏，離咱有 7000 萬光年遠。 這張 12 月 13 翕 ê 望遠鏡影像，有翕著 美麗 彗星 C/2020 V2 ZTF。 這粒彗星這馬 kah 咱 ê 距離差不多是 29 光分遠，伊綴 雙曲線 軌道欲離開內太陽系，迵過黃道面落去。 這粒 ZTF 彗星 tī 2023 年 5 月 上倚太陽，kah tī 9 月上倚地球 ê 時陣較光。 毋過咧翕這張南天夜空 ê 望遠鏡相片 ê 時陣，伊猶是足光--ê，所以伊看起來 kah 天鶴三重奏 就差不多光。

[POJ] Saⁿ lia̍p Seng-hē kah chi̍t-lia̍p hūi-chheⁿ

Chit-tiuⁿ hiòng lâm-thian Thian-ho̍h-chō hong-hiòng hip--ê 1 tō͘ khoah khoah-pak sī-iá lāi-té, sì-kè lóng sī iâu-oán ê seng-hē. M̄-koh, chiàⁿ-pêng ē-kha ū saⁿ ê kńg-lê-á seng-hē sī chiok chhut-chèng--ê. Si̍t-chè-siōng, chit saⁿ ê seng-hē sī chi̍t cho͘--ê, kiò-chò Thian-ho̍h Sam-tiông-chàu, lī lán ū 7000 bān kng-nî hn̄g. Chit-tiuⁿ 12 goe̍h 13 hip ê bōng-oán-kiàⁿ iáⁿ-siōng, ū hip-tio̍h bí-lē hūi-chheⁿ C/2020 V2 ZTF. Chit lia̍p hūi-chheⁿ chit-má kah lán ê kū-lî chha-put-to sī 29 kng-hun hn̄g, i tòe siang-khiok-sòaⁿ kúi-tō beh lī-khui lōe-thài-iông-hē, thàng-kòe n̂g-tō-bīn lo̍h-khì. Chit lia̍p ZTF hūi-chheⁿ tī 2023 nî 5 goe̍h siōng óa Thài-iông, kah tī 9 goe̍h siōng óa Tē-kiû ê sî-chūn khah kng. M̄-koh leh hip chit-tiuⁿ lâm-thian iā-khong ê bōng-oán-kiàⁿ siòng-phìⁿ ê sî-chūn, i iáu-sī chiok kng--ê, só͘-í i khòaⁿ-khí-lâi kah Thian-ho̍h Sam-tiông-chàu to̍h chha-put-to kng.

[KIP] Sann lia̍p Sing-hē kah tsi̍t-lia̍p huī-tshenn

Tsit-tiunn hiòng lâm-thian Thian-ho̍h-tsō hong-hiòng hip--ê 1 tōo khuah khuah-pak sī-iá lāi-té, sì-kè lóng sī iâu-uán ê sing-hē. M̄-koh, tsiànn-pîng ē-kha ū sann ê kńg-lê-á sing-hē sī tsiok tshut-tsìng--ê. Si̍t-tsè-siōng, tsit sann ê sing-hē sī tsi̍t tsoo--ê, kiò-tsò Thian-ho̍h Sam-tiông-tsàu, lī lán ū 7000 bān kng-nî hn̄g. Tsit-tiunn 12 gue̍h 13 hip ê bōng-uán-kiànn iánn-siōng, ū hip-tio̍h bí-lē huī-tshenn C/2020 V2 ZTF. Tsit lia̍p huī-tshenn tsit-má kah lán ê kū-lî tsha-put-to sī 29 kng-hun hn̄g, i tuè siang-khiok-suànn kuí-tō beh lī-khui luē-thài-iông-hē, thàng-kuè n̂g-tō-bīn lo̍h-khì. Tsit lia̍p ZTF huī-tshenn tī 2023 nî 5 gue̍h siōng uá Thài-iông, kah tī 9 gue̍h siōng uá Tē-kiû ê sî-tsūn khah kng. M̄-koh leh hip tsit-tiunn lâm-thian iā-khong ê bōng-uán-kiànn siòng-phìnn ê sî-tsūn, i iáu-sī tsiok kng--ê, sóo-í i khuànn-khí-lâi kah Thian-ho̍h Sam-tiông-tsàu to̍h tsha-put-to kng.

[English] Three Galaxies and a Comet

Distant galaxies abound in this one degree wide field of view toward the southern constellation Grus (The Crane). But the three spiral galaxies at the lower right are quite striking. In fact, all three galaxies are grouped about 70 million light years away and sometimes known as the Grus Triplet. They share the pretty telescopic frame, recorded on December 13, with the comet designated C/2020 V2 ZTF. Now outbound from the inner Solar System and swinging below the ecliptic plane in a hyperbolic orbit, the comet was about 29 light-minutes from our fair planet in this image. And though this comet ZTF was brighter when it was closest to the Sun last May and closest to Earth in September of 2023, it still shines in telescopes pointed toward southern night skies, remaining almost as bright as the Grus Triplet galaxies.

詞彙學習