中國念湖天頂 ê 雙生仔座流星雨

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Geminids over China’s Nianhu Lake
• 影像來源 kah 版權：Hongyang Luo
• 2023 年 ê APOD 回顧：RJN’s Night Sky Network Lecture
• 台文翻譯：An-Li Tsai (NSYSU)

[漢羅] 中國念湖天頂 ê 雙生仔座流星雨

這寡流星是 tùi 佗位來–ê？ 以天頂 ê 方位來看，這个答案應該是指向 雙生仔座。 這就是是按怎 12 月主要 ê 流星雨叫做 雙生仔座流星雨，因為這寡流星雨攏是 ùi 一个 tī 雙生仔座 ê 輻射點 來–ê。 Ùi 3D 空間來看，這粒 編號 3200 ê 奇怪小行星 Phaethon 噴出來–ê 沙塗大細 ê 屑仔，就落 tī 踅太陽 ê 軌道頂懸，其中較倚 地球 ê 部份就出現 tī 雙生仔座 頭前。 地球 行過這粒小行星 ê 軌道 ê 時陣，因為這寡 落落來 ê 沙塗屑仔 出現 tī 雙生仔座方向，所以 輻射點 看起來就 tī 雙生仔座內底。 這張相片是 kā 幾若工前 tī 中國 念湖 暗暝翕–ê 足濟張 相片鬥做伙 ê 組合影像。 咱會當看著內底有超過 100 粒較光 ê 雙生仔座流星雨 ê 流星 軌跡。

[POJ] Tiong-kok Liām-ô͘ thiⁿ-téng ê Siang-seⁿ-á-chō Liû-chheⁿ-hō͘

Chit kóa liû-chheⁿ sī tùi tó-ūi lâi–ê? Í thiⁿ-téng ê hong-ūi lâi-khòaⁿ, chit-ê tap-àn eng-kai sī chí-hiòng Siang-seⁿ-á-chō. Che to̍h-sī sī-án-chóaⁿ 12 goe̍h chú-iàu ê liû-chheⁿ-hō͘ kiò-chò Siang-seⁿ-á-chō liû-chheⁿ-hō͘, in-ūi chit kóa liû-chheⁿ-hō͘ lóng sī ùi chi̍t-ê tī Siang-seⁿ-á-chō ê hok-siā-tiám lâi–ê. Ùi 3D khong-kan lâi-khòaⁿ, chit lia̍p pian-hō 3200 ê kî-koài sió-kiâⁿ-chheⁿ Phaethon phùn–chhut-lâi–ê soa-thô͘ tōa-sè ê sap-á, to̍h lak tī se̍h Thài-iông ê kúi-tō téng-koân, kî-tiong khah óa Tē-kiû ê pō͘-hūn to̍h chhut-hiān tī Siang-seⁿ-á-chō thâu-chêng. Tē-kiû kiâⁿ-kè chit lia̍p sió-kiâⁿ-chheⁿ ê kúi-tō ê sî-chūn, in-ūi chit kóa lak-lo̍h-lâi ê soa-thô͘ sap-á chhut-hiān tī Siang-seⁿ-á-chō hong-hiòng, só͘-í hok-siā-tiám khòaⁿ–khí-lâi to̍h tī Siang-seⁿ-á-chō lāi-té. Chit-tiuⁿ siòng-phìⁿ sī kā kúi-nā kang chêng tī Tiong-kok Liām-ô͘ àm-mê hip–ê chiok chē tiuⁿ siòng-phìⁿ tàu-chò-hóe ê cho͘-ha̍p iáⁿ-siōng. Lán ē-tàng khòaⁿ-tio̍h lāi-té ū chhiau-kòe 100 lia̍p khah kng ê Siang-seⁿ-á-chō liû-chheⁿ-hō͘ ê liû-chheⁿ khúi-jiah.

[KIP] Tiong-kok Liām-ôo thinn-tíng ê Siang-senn-á-tsō Liû-tshenn-hōo

Tsit kuá liû-tshenn sī tuì tó-uī lâi–ê? Í thinn-tíng ê hong-uī lâi-khuànn, tsit-ê tap-àn ing-kai sī tsí-hiòng Siang-senn-á-tsō. Tse to̍h-sī sī-án-tsuánn 12 gue̍h tsú-iàu ê liû-tshenn-hōo kiò-tsò Siang-senn-á-tsō liû-tshenn-hōo, in-uī tsit kuá liû-tshenn-hōo lóng sī uì tsi̍t-ê tī Siang-senn-á-tsō ê hok-siā-tiám lâi–ê. Uì 3D khong-kan lâi-khuànn, tsit lia̍p pian-hō 3200 ê kî-kuài sió-kiânn-tshenn Phaethon phùn–tshut-lâi–ê sua-thôo tuā-sè ê sap-á, to̍h lak tī se̍h Thài-iông ê kuí-tō tíng-kuân, kî-tiong khah uá Tē-kiû ê pōo-hūn to̍h tshut-hiān tī Siang-senn-á-tsō thâu-tsîng. Tē-kiû kiânn-kè tsit lia̍p sió-kiânn-tshenn ê kuí-tō ê sî-tsūn, in-uī tsit kuá lak-lo̍h-lâi ê sua-thôo sap-á tshut-hiān tī Siang-senn-á-tsō hong-hiòng, sóo-í hok-siā-tiám khuànn–khí-lâi to̍h tī Siang-senn-á-tsō lāi-té. Tsit-tiunn siòng-phìnn sī kā kuí-nā kang tsîng tī Tiong-kok Liām-ôo àm-mê hip–ê tsiok tsē tiunn siòng-phìnn tàu-tsò-hué ê tsoo-ha̍p iánn-siōng. Lán ē-tàng khuànn-tio̍h lāi-té ū tshiau-kuè 100 lia̍p khah kng ê Siang-senn-á-tsō liû-tshenn-hōo ê liû-tshenn khuí-jiah.

[English] Geminids over China’s Nianhu Lake

Where are all of these meteors coming from? In terms of direction on the sky, the pointed answer is the constellation of Gemini. That is why the major meteor shower in December is known as the Geminids – because shower meteors all appear to come from a radiant toward Gemini. Three dimensionally, however, sand-sized debris expelled from the unusual asteroid 3200 Phaethon follows a well-defined orbit about our Sun, and the part of the orbit that approaches Earth is superposed in front of the constellation of Gemini. Therefore, when Earth crosses this orbit, the radiant point of falling debris appears in Gemini. Featured here is a composite of many images taken a few days ago through dark skies from Nianhu Lake in China. Over 100 bright meteor streaks from the Geminids meteor shower are visible.

詞彙學習（漢羅/POJ/KIP/華語/English）

• 【雙生仔座】Siang-seⁿ-á-chō/Siang-senn-á-tsō/雙子座/Gemini
• 【雙生仔座流星雨】Siang-seⁿ-á-chō liû-chheⁿ-hō͘/Siang-senn-á-tsō liû-tshenn-hōo/雙子座流星雨/Geminids
• 【輻射點】hok-siā-tiám/hok-siā-tiám/輻射點/radiant
• 【3200 號小行星 Phaethon】3200 hō sió-kiâⁿ-chheⁿ Phaethon/3200 hō sió-kiânn-tshenn Phaethon/3200 號小行星 Phaethon/asteroid 3200 Phaethon