月眉形 ê 土衛二 Enceladus

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Crescent Enceladus
• 影像來源：Cassini Imaging Team, SSI, JPL, ESA, NASA
• 台文翻譯：An-Li Tsai (NSYSU)

[漢羅] 月眉形 ê 土衛二 Enceladus

這幅 ùi 烏影區看出去 ê Cassini 太空船影像，是 面對土星彼半球 ê 內衛星 土衛二 Enceladus。 Cassini ê kha-mé-lah tī 2016 年 11 月翕著 這張戲劇性 ê 景色。 相片頂懸是 北方 ，相機是向太陽 ê 方向翕–ê，離衛星較光 ê 月眉形彼爿有 13 萬公里遠。 實際上，遙遠天體反射 超過 90 葩照著伊 ê 日光，予伊 ê 表面 ê 反射率 kah 拄落 ê 雪 差不多仝款。 直徑才 500 公里 ê 土衛二 Enceladus，無想到 是一粒活跳跳 ê 衛星。 Ùi Cassini 太空船飛過 Enceladus ê 時陣提著 ê 資料 kah 影像，揣著南極 ê 歇陣噴泉，伊會噴出水煙 kah 冰粒。 另外嘛有揣著海洋 ê 證據，液態水就藏 tī 衛星 ê 冰層地殼下底。

[POJ] Goe̍h-bâi-hêng ê Thó͘-ūi-jī Enceladus

Chit pak ùi o͘-iáⁿ-khu khòaⁿ–chhut-khì ê Cassini Thài-khong-chûn iáⁿ-siōng, sī bīn-tùi Thó͘-chheⁿ hit pòaⁿ-kiû ê lāi-ūi-chheⁿ Thó͘-ūi-jī Enceladus. Cassini ê kha-mé-lah tī 2016 nî 11 goe̍h hip-tio̍h chit-tiuⁿ hì-kio̍k sèng ê kéng-sek. Siòng-phìⁿ téng-koân sī pak-hong, siòng-ki sī hiòng Thài-iông ê hong-hiòng hip–ê, lī ūi-chheⁿ khah kng ê goe̍h-bâi-hêng hit-pêng ū 13 bān kong-lí hn̄g. Si̍t-chè-siōng, iâu-oán thian-thé hoán-siā chhiau-kòe 90 pha chiò-tio̍h i ê ji̍t-kng, hō͘ i ê piáu-bīn ê hoán-siā-lu̍t kah tú-lo̍h ê seh chha-put-to kāng-khoán. Ti̍t-kèng chiah 500 kong-lí ê Thó͘-ūi-jī Enceladus, bô siūⁿ kàu sī chi̍t-lia̍p oa̍h-thiàu-thiàu ê ūi-chheⁿ. Ùi Cassini Thài-khong-chûn poe-kòe Enceladus ê sî-chūn the̍h-tio̍h ê chu-liāu kah iáⁿ-siōng, chhē-tio̍h lâm-ke̍k ê hioh-chūn phùn-chôaⁿ, i ē phùn-chhut chúi-ian kah peng-lia̍p. Lēng-gōa mā ū chhōe-tio̍h hái-iûⁿ ê chèng-kì, e̍k-thài-chúi to̍h chhàng tī ūi-chheⁿ ê peng-chân tē-khak ē-té.

[KIP] Gue̍h-bâi-hîng ê Thóo-uī-jī Enceladus

Tsit pak uì oo-iánn-khu khuànn–tshut-khì ê Cassini Thài-khong-tsûn iánn-siōng, sī bīn-tuì Thóo-tshenn hit puànn-kiû ê lāi-uī-tshenn Thóo-uī-jī Enceladus. Cassini ê kha-mé-lah tī 2016 nî 11 gue̍h hip-tio̍h tsit-tiunn hì-kio̍k sìng ê kíng-sik. Siòng-phìnn tíng-kuân sī pak-hong, siòng-ki sī hiòng Thài-iông ê hong-hiòng hip–ê, lī uī-tshenn khah kng ê gue̍h-bâi-hîng hit-pîng ū 13 bān kong-lí hn̄g. Si̍t-tsè-siōng, iâu-uán thian-thé huán-siā tshiau-kuè 90 pha tsiò-tio̍h i ê ji̍t-kng, hōo i ê piáu-bīn ê huán-siā-lu̍t kah tú-lo̍h ê seh tsha-put-to kāng-khuán. Ti̍t-kìng tsiah 500 kong-lí ê Thóo-uī-jī Enceladus, bô siūnn kàu sī tsi̍t-lia̍p ua̍h-thiàu-thiàu ê uī-tshenn. Uì Cassini Thài-khong-tsûn pue-kuè Enceladus ê sî-tsūn the̍h-tio̍h ê tsu-liāu kah iánn-siōng, tshē-tio̍h lâm-ki̍k ê hioh-tsūn phùn-tsuânn, i ē phùn-tshut tsuí-ian kah ping-lia̍p. Līng-guā mā ū tshuē-tio̍h hái-iûnn ê tsìng-kì, i̍k-thài-tsuí to̍h tshàng tī uī-tshenn ê ping-tsân tē-khak ē-té.

[English] Crescent Enceladus

Peering from the shadows, the Saturn-facing hemisphere of tantalizing inner moon Enceladus poses in this Cassini spacecraft image. North is up in the dramatic scene captured during November 2016 as Cassini’s camera was pointed in a nearly sunward direction about 130,000 kilometers from the moon’s bright crescent. In fact, the distant world reflects over 90 percent of the sunlight it receives, giving its surface about the same reflectivity as fresh snow. A mere 500 kilometers in diameter, Enceladus is a surprisingly active moon. Data and images collected during Cassini’s flybys have revealed water vapor and ice grains spewing from south polar geysers and evidence of an ocean of liquid water hidden beneath the moon’s icy crust.

詞彙學習（漢羅/POJ/KIP/華語/English）

• 【Cassini 太空船】Cassini Thài-khong-chûn/Cassini Thài-khong-tsûn/卡西尼號太空船/Cassini spacecraft
• 【土星】Thó͘-chheⁿ/Thóo-tshenn/土星/Saturn
• 【內衛星】lōe-ūi-chheⁿ/luē-uī-tshenn/內衛星/inner moon
• 【內衛星】lāi-ūi-chheⁿ/lāi-uī-tshenn/內衛星/inner moon
• 【土衛二 Enceladus】Thó͘-ūi-jī Enceladus/Thóo-uī-jī Enceladus/土衛二 恩克拉多斯/Enceladus
• 【月眉形】goe̍h-bâi-hêng/gue̍h-bâi-hîng/眉月形/crescent
• 【反射率】hoán-siā-lu̍t/huán-siā-lu̍t/反射率/reflectivity
• 【歇陣噴泉】hioh-chūn phùn-chôaⁿ/hioh-tsūn phùn-tsuânn/間歇泉/geysers
• 【水煙】chúi-ian/tsuí-ian/水蒸氣/water vapor
• 【水蒸氣】chúi-cheng-khì/tsuí-tsing-khì/水蒸氣/water vapor
• 【冰粒】peng-lia̍p/ping-lia̍p/冰粒/ice grains
• 【液態水】e̍k-thài-chúi/i̍k-thài-tsuí/液態水/liquid water
• 【冰層地殼】peng-chân tē-khak/ping-tsân tē-khak/冰殼/icy crust