織女星 kah 彗星 12P/Pons-Brooks

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Vega and Comet 12P/Pons-Brooks
• 影像來源 kah 版權：Dan Bartlett
• 台文翻譯：An-Li Tsai (NSYSU)

[漢羅] 織女星 kah 彗星 12P/Pons-Brooks

12 月 4 號 ê 時陣，週期性 彗星 12P/Pons-Brooks kah 織女星，就是北天 ê 天琴座 alpha，同齊出現 tī 這个 望遠鏡視野 內底。 織女星 是地球暗暝天頂第 5 光 ê 天星，離咱有 25 光年遠。 毋過這粒較暗 ê 彗星，離咱才 21 光分遠。 是講 最近這幾若個月，彗星爆發造成 Pons-Brooks 彗星 ê 光度衝懸。 伊有一个偏名叫做惡魔彗星，因為伊 ê 外形看起來敢若有生角 ê 款。 有一寡咧逐星際太空飛行物 ê 迷眾，認為這款變形 ê 大型中央彗鬚，就親像 Star Wars 內底 ê 宇宙船 千年鷹號。 12P/Pons-Brooks 是哈雷型彗星，頂擺來到咱 內太陽系 ê 時陣是 1954 年。 後擺經過近日點，就是離太陽上倚 ê 時陣，會是 2024 年 4 月 21。 這拄仔好是 4 月 8 號日全食路線經過北美洲 ê 2 禮拜前。 毋過，因為伊 ê 軌道 對 太陽系黃道面來講，角度有較趨，週期 彗星 12P/Pons-Brooks ê 軌道就袂 kah 地球 ê 軌道交叉。

[POJ] Chit-lú-chheⁿ kah Hūi-chheⁿ 12P/Pons Brooks

12 goe̍h 4 hō ê sî-chūn, chiu-kî-sèng hūi-chheⁿ 12P/Pons Brooks kah Chit-lú-chhiⁿ, to̍h-sī pak-thian ê Thian-khîm-chō alpha, tâng-chê chhut-hiān tī chit-ê bōng-oán-kiàⁿ sī-iá lāi-té. Chit-lú-chheⁿ sī Tē-kiû àm-mê thiⁿ-téng tē 5 kng ê thiⁿ-chheⁿ, lī lán chiah 25 kng-hun hn̄g. M̄-koh chit lia̍p khah àm ê hūi-chheⁿ, lī lán ū 21 kng-nî hn̄g. Sī-kóng chòe-kīn chit kúi-nā kò goe̍h, hūi-chheⁿ po̍k-hoat chō-sêng Pons-Brooks hūi-chheⁿ ê kng-tō͘ chhèng-koân. I ū chi̍t-ê phian-miâ kiò-chò Ok-mô͘ Hūi-chheⁿ, in-ūi i ê gōa-hêng khòaⁿ--khí-lâi káⁿ-nā ū seⁿ kak ê khoán. Ū chi̍t-kóa leh jiok seng-chè thài-khong hui-hêng-bu̍t ê bê-chiòng, jīn-ûi chit-khoán piàn-hêng ê tōa-hêng tiong-ng hūi-chhiu, to̍h chhin-chhiūⁿ Star Wars lāi-té ê ú-tiū-chûn Chhian-nî Eng-hō. 12P/Pons-Brooks sī Ha-lûi-hêng hūi-chheⁿ, téng-pái lâi-kàu lán Lōe-thài-iông-hē ê sî-chūn sī 1954 nî. Āu-pái keng-kòe kīn-ji̍t-tiám, to̍h-sī lī thài-iông siōng óa ê sî-chūn ,ē sī 2024 nî 4 goe̍h 21. Che tú-á-hó sī 4 goe̍h 8 hō ji̍t-choân-si̍t lō͘-sòaⁿ keng-kòe Pak-bí-chiu ê 2 lé-pài chêng. M̄-koh, in-ūi i ê kúi-tō tùi Thài-iông-hē Nn̂g-tō-bīn lâi-kóng, kak-tō͘ ū khah chhu, chiu-kî hūi-chheⁿ 12P/Pons Brooks ê kúi-tō to̍h bē kah Tē-kiû ê kúi-tō kau-chhe.

[KIP] Tsit-lú-tshenn kah Huī-tshenn 12P/Pons Brooks

12 gue̍h 4 hō ê sî-tsūn, tsiu-kî-sìng huī-tshenn 12P/Pons Brooks kah Tsit-lú-tshinn, to̍h-sī pak-thian ê Thian-khîm-tsō alpha, tâng-tsê tshut-hiān tī tsit-ê bōng-uán-kiànn sī-iá lāi-té. Tsit-lú-tshenn sī Tē-kiû àm-mê thinn-tíng tē 5 kng ê thinn-tshenn, lī lán ū 25 kng-nî hn̄g. M̄-koh tsit lia̍p khah àm ê huī-tshenn, lī lán tsiah 21 kng-hun hn̄g. Sī-kóng tsuè-kīn tsit kuí-nā kò gue̍h, huī-tshenn po̍k-huat tsō-sîng Pons-Brooks huī-tshenn ê kng-tōo tshìng-kuân. I ū tsi̍t-ê phian-miâ kiò-tsò Ok-môo Huī-tshenn, in-uī i ê guā-hîng khuànn--khí-lâi kánn-nā ū senn kak ê khuán. Ū tsi̍t-kuá leh jiok sing-tsè thài-khong hui-hîng-bu̍t ê bê-tsiòng, jīn-uî tsit-khuán piàn-hîng ê tuā-hîng tiong-ng huī-tshiu, to̍h tshin-tshiūnn Star Wars lāi-té ê ú-tiū-tsûn Tshian-nî Ing-hō. 12P/Pons-Brooks sī Ha-luî-hîng huī-tshenn, tíng-pái lâi-kàu lán Luē-thài-iông-hē ê sî-tsūn sī 1954 nî. Āu-pái king-kuè kīn-ji̍t-tiám, to̍h-sī lī thài-iông siōng uá ê sî-tsūn ,ē sī 2024 nî 4 gue̍h 21. Tse tú-á-hó sī 4 gue̍h 8 hō ji̍t-tsuân-si̍t lōo-suànn king-kuè Pak-bí-tsiu ê 2 lé-pài tsîng. M̄-koh, in-uī i ê kuí-tō tuì Thài-iông-hē Nn̂g-tō-bīn lâi-kóng, kak-tōo ū khah tshu, tsiu-kî huī-tshenn 12P/Pons Brooks ê kuí-tō to̍h bē kah Tē-kiû ê kuí-tō kau-tshe.

[English] Vega and Comet 12P/Pons-Brooks

On December 4, periodic Comet 12P/Pons-Brooks shared this telescopic field of view with Vega, alpha star of the northern constellation Lyra. Fifth brightest star in planet Earth's night, Vega is some 25 light-years distant while the much fainter comet was about 21 light-minutes away. In recent months, outbursts have caused dramatic increases in brightness for Pons-Brooks though. Nicknamed the Devil Comet for its hornlike appearance, fans of interstellar spaceflight have also suggested the distorted shape of this large comet's central coma looks like the Millenium Falcon. A Halley-type comet, 12P/Pons-Brooks last visited the inner Solar System in 1954. Its next perihelion passage or closest approach to the Sun will be April 21, 2024. That's just two weeks after the April 8 total solar eclipse path crosses North America. But, highly inclined to the Solar System's ecliptic plane, the orbit of periodic Comet 12P/Pons-Brooks will never cross the orbit of planet Earth.

詞彙學習