獵戶座太空船 kah 風暴洋

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Orion and the Ocean of Storms
• 影像來源：NASA, Artemis 1
• 台文翻譯：An-Li Tsai (NSYSU)

[漢羅] 獵戶座太空船 kah 風暴洋

2022 年 12 月 5 號，無載人 ê 獵戶座太空船 用回航動力飛過月球 ê 時陣，鬥 tī 伊頂懸 ê kha-mé-lah 翕著這个景色。 Tī 獵戶座太空船其中一組拍開 ê 太陽能枋陣列後壁，是 風暴洋 西爿 烏暗 koh 滑溜 ê 地形。 Tī 月球這爿 ê 風暴洋 是足顯目--ê，伊是 月球頂懸去予熔岩崁牢 ê 月海 內底上大--ê。 月球 ê 晨昏線，就是月球暗暝 kah 日時 ê 交界線，就 tī 這張影像倒爿。 直徑 41公里 ê Marius 隕石坑 就 tī 中央頂懸，輻射形 ê Kepler 隕石坑 就出現 tī 正爿上邊仔，太陽能枋陣列 ê 正爿遐。 Kepler 隕石坑 ê 淺色 ê 輻射紋向北 kah 向西去，一直到 烏暗 ê Marius 隕石坑 遐。 2022 年12月11日，獵戶座太空船 轉來 in 兜 矣。 落尾這个歷史性 ê Artemis 1 號任務 ê 獵戶座太空船成功轉來地球，落 tiàm 地球 表面 ê 太平洋，噴甲規四界，結束伊 ê 任務。

[POJ] La̍h-hō͘-chō Thài-khong-chûn kah Hong-pō-iûⁿ

2022 nî 12 goe̍h 5 hō, bô chài lâng ê La̍h-hō͘-chō Thài-khong-chûn iōng hôe-hâng tōng-le̍k poe-kòe Goe̍h-kiû ê sî-chūn, tàu tī i téng-koân ê kha-mé-lah hip-tio̍h chit-ê kéng-sek. Tī La̍h-hō͘-chō Thài-khong-chûn kî-tiong chi̍t cho͘ phah-khui ê thài-iông-lêng-pang tīn-lia̍t āu-piah, sī Hong-pō-iûⁿ sai-pêng o͘-àm koh ku̍t-liu ê tē-hêng. Tī Goe̍h-kiû chit-pêng ê Hong-pō-iûⁿ sī chiok hiáⁿ-ba̍k--ê, i sī Goe̍h-kiû téng-koân khì hō͘ iông-giâm khàm-tiâu ê goe̍h-hái lāi-té siōng tōa--ê. Goe̍h-kiû-ê sîn-hun-sòaⁿ, to̍h-sī Goe̍h-kiû àm-mê kah ji̍t-sî ê kau-kài-sòaⁿ, to̍h tī chit-tiuⁿ iáⁿ-siōng tò-pêng. Ti̍t-kèng 41 kong-lí ê Marius ún-se̍k-kheⁿ to̍h tī tiong-ng téng-koân, hok-siā hêng ê Kepler ún-se̍k-kheⁿ tō chhut-hiān tī chiàⁿ-pêng siōng piⁿ-á, thài-iông-lêng-pang tīn-lia̍t ê chiàⁿ-pêng hiah. Kepler ún-se̍k-kheⁿ ê chhián-sek ê hok-siā bûn hiòng pak kah hiòng sai khì, it-ti̍t kàu o͘-àm ê Marius ún-se̍k-kheⁿ hiah. 2022 nî 12 goe̍h 11 ji̍t, La̍h-hō͘-chō Thài-khong-chûn tńg-lâi in tau ah. Lo̍h-bóe chit-ê le̍k-sú-sèng ê Artemis 1 hō jīm-bū ê La̍h-hō͘-chō Thài-khong-chûn sêng-kong tńg-lâi tē-kiû, lak tiàm Tē-kiû piáu-bīn ê Thài-pêng-iûⁿ, phùn kah kui-sì-kè, kiat-sok i ê jīm-bū.

[KIP] La̍h-hōo-tsō Thài-khong-tsûn kah Hong-pō-iûnn

2022 nî 12 gue̍h 5 hō, bô tsài lâng ê La̍h-hōo-tsō Thài-khong-tsûn iōng huê-hâng tōng-li̍k pue-kuè Gue̍h-kiû ê sî-tsūn, tàu tī i tíng-kuân ê kha-mé-lah hip-tio̍h tsit-ê kíng-sik. Tī La̍h-hōo-tsō Thài-khong-tsûn kî-tiong tsi̍t tsoo phah-khui ê thài-iông-lîng-pang tīn-lia̍t āu-piah, sī Hong-pō-iûnn sai-pîng oo-àm koh ku̍t-liu ê tē-hîng. Tī Gue̍h-kiû tsit-pîng ê Hong-pō-iûnn sī tsiok hiánn-ba̍k--ê, i sī Gue̍h-kiû tíng-kuân khì hōo iông-giâm khàm-tiâu ê gue̍h-hái lāi-té siōng tuā--ê. Gue̍h-kiû-ê sîn-hun-suànn, to̍h-sī Gue̍h-kiû àm-mê kah ji̍t-sî ê kau-kài-suànn, to̍h tī tsit-tiunn iánn-siōng tò-pîng. Ti̍t-kìng 41 kong-lí ê Marius ún-se̍k-khenn to̍h tī tiong-ng tíng-kuân, hok-siā hîng ê Kepler ún-si̍k-khenn tō tshut-hiān tī tsiànn-pîng siōng pinn-á, thài-iông-lîng-pang tīn-lia̍t ê tsiànn-pîng hiah. Kepler ún-si̍k-khenn ê tshián-sik ê hok-siā bûn hiòng pak kah hiòng sai khì, it-ti̍t kàu oo-àm ê Marius ún-si̍k-khenn hiah. 2022 nî 12 gue̍h 11 ji̍t, La̍h-hōo-tsō Thài-khong-tsûn tńg-lâi in tau ah. Lo̍h-bué tsit-ê li̍k-sú-sìng ê Artemis 1 hō jīm-bū ê La̍h-hōo-tsō Thài-khong-tsûn sîng-kong tńg-lâi tē-kiû, lak tiàm Tē-kiû piáu-bīn ê Thài-pîng-iûnn, phùn kah kui-sì-kè, kiat-sok i ê jīm-bū.

[English] Orion and the Ocean of Storms

On December 5, 2022, a camera on board the uncrewed Orion spacecraft captured this view as Orion approached its return powered flyby of the Moon. Beyond one of Orion's extended solar arrays lies dark, smooth, terrain along the western edge of the Oceanus Procellarum. Prominent on the lunar nearside Oceanus Procellarum, the Ocean of Storms, is the largest of the Moon's lava-flooded maria. The lunar terminator, shadow line between lunar night and day, runs along the left of this frame. The 41 kilometer diameter crater Marius is top center, with ray crater Kepler peeking in at the edge, just right of the solar array wing. Kepler's bright rays extend to the north and west, reaching the dark-floored Marius. By December 11, 2022 the Orion spacecraft had reached its home world. The historic Artemis 1 mission ended with Orion's successful splashdown in planet Earth's water-flooded Pacific Ocean.

詞彙學習