美國 Kansas 州天頂 ê 陸捲螺

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：A Landspout Tornado over Kansas
• 影像來源 kah 版權：Brad Hannon
• 超空間：APOD 亂數產生器
• 台文翻譯：An-Li Tsai (NSYSU)

[漢羅] 美國 Kansas 州天頂 ê 陸捲螺

捲螺仔風內底敢會閣有一个捲螺仔風？ 一般講來是袂。 OK，按呢若是一个較闊 ê 沙螺仔風 敢會藏一个捲螺仔風 tī 內底？ 無可能，因為 捲螺仔風是 ùi 天頂來--ê，毋過沙螺仔風是 ùi 塗跤 生出來--ê。 這幅圖內底 ê 是 陸捲螺，是一款無四常 ê 捲螺仔風，出現 tī 足猛 ê 雷雨 邊仔。 這張陸捲螺 相片，是一个專門 leh 逐風暴 ê 愛好者，tī 2019 年 6 月 tī 美國 Kansas 州 翕著、認出來--ê。 真正 ê 捲螺仔風 是 tī 中央，外圍彼輾 可能是中央捲螺仔風 擲出來--ê 較大粒 ê 塗粉粒。 到今為止，唯一咱知影會有捲螺仔風 ê 行星是 地球，毋過太陽表面 嘛有 kah 捲螺仔風 類似 ê 活動，而且 沙螺仔風 tī 火星 是定定有。

[POJ] Bí-kok Kansas chiu thiⁿ-téng ê Lio̍k-kńg-lê

Kńg-lê-á-hong lāi-té kám-ē koh-ū chi̍t-ê kńg-lê-á-hong? It-poaⁿ kóng-lâi sī bē. OK, án-ne nā-sī chi̍t-ê khah khoah ê soa-lê-á-hong kám-ē chhàng chi̍t-ê kńg-lê-á-hong tī lāi-té? Bô-khó-lêng, in-ūi kńg-lê-á-hong sī ùi thiⁿ-téng lâi--ê, m̄-koh soa-lê-á-hong sī ùi thô͘-kha seⁿ--chhut-lâi--ê. Chit pak tô͘ lāi-té ê sī lio̍k-kńg-lê, sī chi̍t-khoán bô sù-siông ê kńg-lê-á-hong, chhut-hiān tī chiok mé ê lûi-hō͘ piⁿ-á. Chit-tiuⁿ lio̍k-kńg-lê siòng-phìⁿ, sī chi̍t-ê choan-bûn leh jiok hong-pō ê ài-hóⁿ-chiá, tī 2019 nî 6 goe̍h tī Bí-kok Kansas chiu hip-tio̍h, jīn--chhut-lâi--ê. Chin-chiàⁿ ê kńg-lê-á-hong sī tī tiong-ng, gōa-ûi hit liàn khó-lêng sī tiong-ng kńg-lê-á-hong tàn--chhut-lâi--ê khah tōa-lia̍p ê thô͘-hún-lia̍p. Kàu-taⁿ ûi-chí, ûi-it lán chai-iáⁿ ē ū kńg-lê-á-hong ê kiâⁿ-chheⁿ sī Tē-kiû, m̄-koh Thài-iông piáu-bīn mā ū kah kńg-lê-á-hong lūi-sū ê oa̍h-tāng, jî-chhiáⁿ soa-lê-á-hong tī hóe-chheⁿ sī tiāⁿ-tiāⁿ ū.

[KIP] Bí-kok Kansas tsiu thinn-tíng ê Lio̍k-kńg-lê

Kńg-lê-á-hong lāi-té kám-ē koh-ū tsi̍t-ê kńg-lê-á-hong? It-puann kóng-lâi sī bē. OK, án-ne nā-sī tsi̍t-ê khah khuah ê sua-lê-á-hong kám-ē tshàng tsi̍t-ê kńg-lê-á-hong tī lāi-té? Bô-khó-lîng, in-uī kńg-lê-á-hong sī uì thinn-tíng lâi--ê, m̄-koh sua-lê-á-hong sī uì thôo-kha senn--tshut-lâi--ê. Tsit pak tôo lāi-té ê sī lio̍k-kńg-lê, sī tsi̍t-khuán bô sù-siông ê kńg-lê-á-hong, tshut-hiān tī tsiok mé ê luî-hōo pinn-á. Tsit-tiunn lio̍k-kńg-lê siòng-phìnn, sī tsi̍t-ê tsuan-bûn leh jiok hong-pō ê ài-hónn-tsiá, tī 2019 nî 6 gue̍h tī Bí-kok Kansas tsiu hip-tio̍h, jīn--tshut-lâi--ê. Tsin-tsiànn ê kńg-lê-á-hong sī tī tiong-ng, guā-uî hit liàn khó-lîng sī tiong-ng kńg-lê-á-hong tàn--tshut-lâi--ê khah tuā-lia̍p ê thôo-hún-lia̍p. Kàu-tann uî-tsí, uî-it lán tsai-iánn ē ū kńg-lê-á-hong ê kiânn-tshenn sī Tē-kiû, m̄-koh Thài-iông piáu-bīn mā ū kah kńg-lê-á-hong luī-sū ê ua̍h-tāng, jî-tshiánn sua-lê-á-hong tī hué-tshenn sī tiānn-tiānn ū.

[English] A Landspout Tornado over Kansas

Could there be a tornado inside another tornado? In general, no. OK, but could there be a tornado inside a wider dust devil? No again, for one reason because tornados comes down from the sky, but dust devils rise up from the ground. What is pictured is a landspout, an unusual type of tornado known to occur on the edge of a violent thunderstorm. The featured landspout was imaged and identified in Kansas, USA, in June 2019 by an experienced storm chaser. The real tornado is in the center, and the outer sheath was possibly created by large dust particles thrown out from the central tornado. So far, the only planet known to create tornados is Earth, although tornado-like activity has been found on the Sun and dust devils are common on Mars.

詞彙學習