岩石 kah 天頂三粒星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Three Planets Rock
• 影像來源 kah 版權：Giovanni Passalacqua; 文稿：[Liz Coelho](mailto: Liz.Coelho at pikespeak.edu) (Pikes Peak)
• 台文翻譯：An-Li Tsai (NSYSU)

[漢羅] 岩石 kah 天頂三粒星

天欲光進前，意大利 Sicily 島 上南爿一粒 岩石 ê 天頂，有一个歪歪 ê 山角形 chhāi tī 遐。 組成這个三角形 ê 成員，是地球天頂 上光 ê 4 粒天體 ê 其中 3 粒：木星、金星、kah 月球。 雖罔講，月娘賰薄薄 ê 下月眉，毋過咱會當看著去予 地球反照光 照著 ê 大部份月盤。 這張相片是 2022 年 4 月 27 翕--ê。 中央是金星，倒爿是木星，in 之間 ê 角距離是差 3 度，而且欲行到 合相 ê 位置矣。 金星 kah 木星 ê 合相 逐年攏會發生一擺，會出現 tī 日出進前 ê 東爿，抑是日落了後 ê 西爿。 這張相片 是 地球頂懸 上光 ê 天體，太陽，欲 peh 起來 進前一點鐘左右翕--ê。

[POJ] Giâm-chio̍h kah thiⁿ-téng saⁿ lia̍p chheⁿ

Thiⁿ beh kng chìn-chêng, I-tá-lī Sicily tó siōng lâm-pêng chi̍t-lia̍p giâm-chio̍h ê thiⁿ-téng, ū chi̍t-ê oai-oai ê saⁿ-kak-hêng chhāi tī-hiah. Cho͘-sêng chit-ê saⁿ-kak-hêng ê sêng-oân, sī Tē-kiû thiⁿ-téng siōng kng ê 4 lia̍p thian-thé ê kî-tiong 3 lia̍p: Bo̍k-chheⁿ, Kim-chheⁿ, kah Goe̍h-kiû. Sui-bóng kóng, goe̍h-niû chhun po̍h-po̍h ê ē-goe̍h-bâi, m̄-koh lán ē-tàng khòaⁿ-tio̍h khì hō͘ Tē-kiû hoán-chiò-kng chiò--tio̍h ê tāi-pō͘-hūn goe̍h-pôaⁿ. Chit-tiuⁿ siòng-phìⁿ sī 2022 nî 4 goe̍h 27 hip--ê. Tiong-ng sī Kim-chheⁿ, tò-pêng sī Bo̍k-chheⁿ, in chi-kan ê kak-kū-lī sī chha 3 tō͘, jî-chhiáⁿ beh kiâⁿ kàu ha̍p-siòng ê ūi-tì--ah. Kim-chheⁿ kah Bo̍k-chheⁿ ê ha̍p-siòng ta̍k-nî lóng ē hoat-seng chi̍t-pái, ē chhut-hiān tī ji̍t-chhut chìn-chêng ê tang-pêng, ia̍h-sī ji̍t-lo̍h liáu-āu ê sai-pêng. Chit-tiuⁿ siòng-phìⁿ sī Tē-kiû téng-koân siōng kng ê thian-thé, Thài-iông, beh peh--khí-lâi chìn-chêng chi̍t tiám-cheng chó-iū hip--ê.

[KIP] Giâm-tsio̍h kah thinn-tíng sann lia̍p tshenn

Thinn beh kng tsìn-tsîng, I-tá-lī Sicily tó siōng lâm-pîng tsi̍t-lia̍p giâm-tsio̍h ê thinn-tíng, ū tsi̍t-ê uai-uai ê sann-kak-hîng tshāi tī-hiah. Tsoo-sîng tsit-ê sann-kak-hîng ê sîng-uân, sī Tē-kiû thinn-tíng siōng kng ê 4 lia̍p thian-thé ê kî-tiong 3 lia̍p: Bo̍k-tshenn, Kim-tshenn, kah Gue̍h-kiû. Sui-bóng kóng, gue̍h-niû tshun po̍h-po̍h ê ē-gue̍h-bâi, m̄-koh lán ē-tàng khuànn-tio̍h khì hōo Tē-kiû huán-tsiò-kng tsiò--tio̍h ê tāi-pōo-hūn gue̍h-puânn. Tsit-tiunn siòng-phìnn sī 2022 nî 4 gue̍h 27 hip--ê. Tiong-ng sī Kim-tshenn, tò-pîng sī Bo̍k-tshenn, in tsi-kan ê kak-kū-lī sī tsha 3 tōo, jî-tshiánn beh kiânn kàu ha̍p-siòng ê uī-tì--ah. Kim-tshenn kah Bo̍k-tshenn ê ha̍p-siòng ta̍k-nî lóng ē huat-sing tsi̍t-pái, ē tshut-hiān tī ji̍t-tshut tsìn-tsîng ê tang-pîng, ia̍h-sī ji̍t-lo̍h liáu-āu ê sai-pîng. Tsit-tiunn siòng-phìnn sī Tē-kiû tíng-kuân siōng kng ê thian-thé, Thài-iông, beh peh--khí-lâi tsìn-tsîng tsi̍t tiám-tsing tsó-iū hip--ê.

[English] Three Planets Rock

In the fading darkness before dawn, a tilted triangle appeared to balance atop a rock formation off the southern tip of Sicily. Making up the points of the triangle are three of the four brightest objects visible in Earth’s sky: Jupiter, Venus and the Moon. Though a thin waning crescent, most of the moon’s disk is visible due to earthshine. Captured in this image on 2022 April 27, Venus (center) and Jupiter (left) are roughly three degrees apart -- and were headed toward a close conjunction. Conjunctions of Venus and Jupiter occur about once a year and are visible either in the east before sunrise or in the west after sunset. The featured image was taken about an hour before the arrival of the brightest object in Earth’s sky – the Sun.

詞彙學習