瑞典山頂 ê 膨月

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Gibbous Moon beyond Swedish Mountain
• 影像來源 kah 版權：Göran Strand
• 超空間：APOD 亂數產生器
• 台文翻譯：An-Li Tsai (NSYSU)

[漢羅] 瑞典山頂 ê 膨月

這是膨月。 大部份 地球人 較熟似 ê 月娘，是 伊 規爿去予 太陽 照著 ê 月圓相，kah 伊 邊緣去予太陽照著 ê 月眉相。 是講月球若是有超過一半去予太陽照著，毋過猶袂到規爿面 ê 月相，就叫做 膨月。 雖罔講電視 kah 電影足少看著 膨月，毋過其實伊 tī 夜空是定定出現--ê。 這張相片 是 2018 年 10 月左右 tī 瑞典 Jämtland 翕--ê。 幾若工後，膨月 就會轉做月眉、新月、月眉，落尾閣轉來膨月。 攝影師準備好勢，欲翕這粒媠噹噹 ê 膨月 ê 時陣，煞 意外 翕著飛龍機，就 ùi 月娘面頭前飛過去。

[POJ] Sūi-tián soaⁿ-téng ê Phòng-goe̍h

Che-sī phòng-goe̍h. Tōa-pō͘-hūn Tē-kiû-lâng khah se̍k-sāi ê goe̍h-niû, sī i kui-pêng khì hō͘ Thài-iông chiò-tio̍h ê goe̍h-îⁿ-siòng, kah i pian-iân khì hō͘ Thài-iông chiò-tio̍h ê goe̍h-bâi-sio. Sī-kóng Goe̍h-kiû nā-sī ū chhiau-kòe chi̍t-pòaⁿ khì hō͘ Thài-iông chiò-tio̍h, m̄-koh iáu-bē kàu kui-pêng-bīn ê goe̍h-siòng, to̍h kiò-chò phòng-goe̍h. Sui-bóng kóng tiān-sī kah tiān-iáⁿ chiok chió khòaⁿ-tio̍h phòng-goe̍h, m̄-koh kî-si̍t i tī iā-khong sī tiāⁿ-tiāⁿ chhut-hiān--ê. Chit-tiuⁿ siòng-phìⁿ sī 2018 nî 10 goe̍h chó-iū tī Sūi-tián Jämtland hip--ê. Kúi-nā kang āu, phòng-goe̍h to̍h ē choán-chò goe̍h-bâi, sin-goe̍h, goe̍h-bâi, lo̍h-bóe koh tńg-lâi phòng-goe̍h. Liap-iáⁿ-su chún-pī hó-sè, beh hip chit lia̍p súi-tang-tang ê phòng-goe̍h ê sî-chūn, soah ì-gōa hip-tio̍h poe-lêng-ki, to̍h ùi goe̍h-niû bīn-thâu-chêng poe kòe-khì.

[KIP] Suī-tián suann-tíng ê Phòng-gue̍h

Tse-sī phòng-gue̍h. Tuā-pōo-hūn Tē-kiû-lâng khah si̍k-sāi ê gue̍h-niû, sī i kui-pîng khì hōo Thài-iông tsiò-tio̍h ê gue̍h-înn-siòng, kah i pian-iân khì hōo Thài-iông tsiò-tio̍h ê gue̍h-bâi-sio. Sī-kóng Gue̍h-kiû nā-sī ū tshiau-kuè tsi̍t-puànn khì hōo Thài-iông tsiò-tio̍h, m̄-koh iáu-bē kàu kui-pîng-bīn ê gue̍h-siòng, to̍h kiò-tsò phòng-gue̍h. Sui-bóng kóng tiān-sī kah tiān-iánn tsiok tsió khuànn-tio̍h phòng-gue̍h, m̄-koh kî-si̍t i tī iā-khong sī tiānn-tiānn tshut-hiān--ê. Tsit-tiunn siòng-phìnn sī 2018 nî 10 gue̍h tsó-iū tī Suī-tián Jämtland hip--ê. Kuí-nā kang āu, phòng-gue̍h to̍h ē tsuán-tsò gue̍h-bâi, sin-gue̍h, gue̍h-bâi, lo̍h-bué koh tńg-lâi phòng-gue̍h. Liap-iánn-su tsún-pī hó-sè, beh hip tsit lia̍p suí-tang-tang ê phòng-gue̍h ê sî-tsūn, suah ì-guā hip-tio̍h pue-lîng-ki, to̍h uì gue̍h-niû bīn-thâu-tsîng pue kuè-khì.

[English] Gibbous Moon beyond Swedish Mountain

This is a gibbous Moon. More Earthlings are familiar with a full moon, when the entire face of Luna is lit by the Sun, and a crescent moon, when only a sliver of the Moon's face is lit. When more than half of the Moon is illuminated, though, but still short of full illumination, the phase is called gibbous. Rarely seen in television and movies, gibbous moons are quite common in the actual night sky. The featured image was taken in Jämtland, Sweden near the of 2018 October. That gibbous moon turned, in a few days, into a crescent moon, and then a new moon, then back to a crescent, and a few days past that, back to gibbous. Setting up to capture a picturesque gibbous moonscape, the photographer was quite surprised to find an airplane, surely well in the foreground, appearing to fly past it.

詞彙學習