穩定極光紅弧 kah 銀河

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The SAR Arc and the Milky Way
• 影像來源 kah 版權：Julien Looten
• 台文翻譯：An-Li Tsai (NSYSU)

[漢羅] 穩定極光紅弧 kah 銀河

這張相片是 tī 法國北部 天拄暗 ê 時陣翕–ê。 地平線方向有淡薄仔雲，天頂有一條 闊闊闊、光光光 ê 紅弧，是一个意外 ê 人客。 這是 11 月 5 號 向天頂點方向翕–ê，是一張 ùi 西爿到東爿 ê 拼鬥影像。 暗暗 ê 大氣光帶 是 穩定極光紅弧 (SAR 弧) ê 一个例。 這个真罕得看著 ê 夜空現象 嘛出現 tī 世界各地真罕得出現–ê 足低海拔 ê 所在，而且 較強地磁風暴 出現 ê 時陣嘛有活動力較強 ê 極光現象。 公民科學 kah 衛星 調查 對 穩定極光紅弧 和 in kah 極光反射線 ê 關係 有一寡研究。 若是 uì 比一般極光較懸海拔 ê 所在來看，較深 ê 紅色發射線應該是 地球內部 磁層 電流 ê 強熁燒引起–ê。 Tī 法國北部 ê 夜空，除了穩定極光紅弧以外，地平線 頂懸 ê 雲帶 kah 天頂 ê 銀河弧，是定定出現 ê 人客。

[POJ] Ún-tēng Ke̍k-kng Âng-hô͘ kah Gîn-hô

Chit-tiuⁿ siòng-phìⁿ sī tī Hoat-kok pak-pō͘ thiⁿ tú àm ê sî-chūn hip–ê. Tē-pêng-sòaⁿ hong-hiòng ū tām-po̍h-á hûn, thiⁿ-téng ū chi̍t tiâu khoah-khoah-khoah, kng-kng-kng ê âng-hô͘, sī chi̍t-ê ì-gōa ê lâng-kheh. Che-sī 11 goe̍h 5 hō hiòng thian-téng-tiám hong-hiòng hip–ê,sī chit tiuⁿ ùi sai-pêng kàu tang-pêng ê pheng-tàu iáⁿ-siōng. Àm-àm ê tāi-khì kng-tòa sī Ún-tēng Ke̍k-kng Âng-hô͘ (SAR hô͘) ê chi̍t-ê lē. Chit-ê chin hán-tit khòaⁿ–tio̍h ê iā-khong hiān-siōng mā chhut-hiān tī sè-kài kok-tē chin hán-tit chhut-hiān–ê chok kē hái-poa̍t ê só͘-chāi, jî-chhiáⁿ khah kióng tē chû hong-pō chhut-hiān ê sî-chūn mā ū oa̍h-tōng-le̍k khah kiông ê ke̍k-kng hiān-siōng. Kong-bîn kho-ha̍k kah ūi-chheⁿ tiâu-cha tùi ún-tēng ke̍k-kng âng-hô͘ hām in kah ke̍k-kng hoán-siā-sòaⁿ ê koan-hē ū chi̍t-kóa gián-kiù. Nā-sī ùi pí it-poaⁿ ke̍k-kng khah koân hái-poa̍t ê só͘-chāi lâi-khòaⁿ, khah chhim ê âng-sek hoat-siā-sòaⁿ eng-kai sī Tē-kiû lōe-pō͘ chû-chân tiān-liû ê kiông haⁿh-sio ín-khí–ê. Tī Hoat-kok pak-pō͘ ê iā-khong, tû-liáu Ún-tēng Ke̍k-kng Âng-hô͘ í-gōa, tē-pêng-sòaⁿ téng-koân ê hûn-tòa kah thiⁿ-téng ê Gîn-hô-hô͘, sī tiāⁿ-tiāⁿ chhut-hiān ê lâng-kheh.

[KIP] Ún-tīng Ki̍k-kng Âng-hôo kah Gîn-hô

Tsit-tiunn siòng-phìnn sī tī Huat-kok pak-pōo thinn tú àm ê sî-tsūn hip–ê. Tē-pîng-suànn hong-hiòng ū tām-po̍h-á hûn, thinn-tíng ū tsi̍t tiâu khuah-khuah-khuah, kng-kng-kng ê âng-hôo, sī tsi̍t-ê ì-guā ê lâng-kheh. Tse-sī 11 gue̍h 5 hō hiòng thian-tíng-tiám hong-hiòng hip–ê,sī tsit tiunn uì sai-pîng kàu tang-pîng ê phing-tàu iánn-siōng. Àm-àm ê tāi-khì kng-tuà sī Ún-tīng Ki̍k-kng Âng-hôo (SAR hôo) ê tsi̍t-ê lē. Tsit-ê tsin hán-tit khuànn–tio̍h ê iā-khong hiān-siōng mā tshut-hiān tī sè-kài kok-tē tsin hán-tit tshut-hiān–ê tsok kē hái-pua̍t ê sóo-tsāi, jî-tshiánn khah kióng tē tsû hong-pō tshut-hiān ê sî-tsūn mā ū ua̍h-tōng-li̍k khah kiông ê ki̍k-kng hiān-siōng. Kong-bîn kho-ha̍k kah uī-tshenn tiâu-tsa tuì ún-tīng ki̍k-kng âng-hôo hām in kah ki̍k-kng huán-siā-suànn ê kuan-hē ū tsi̍t-kuá gián-kiù. Nā-sī uì pí it-puann ki̍k-kng khah kuân hái-pua̍t ê sóo-tsāi lâi-khuànn, khah tshim ê âng-sik huat-siā-suànn ing-kai sī Tē-kiû luē-pōo tsû-tsân tiān-liû ê kiông hannh-sio ín-khí–ê. Tī Huat-kok pak-pōo ê iā-khong, tû-liáu Ún-tīng Ki̍k-kng Âng-hôo í-guā, tē-pîng-suànn tíng-kuân ê hûn-tuà kah thinn-tíng ê Gîn-hô-hôo, sī tiānn-tiānn tshut-hiān ê lâng-kheh.

[English] The SAR Arc and the Milky Way

This broad, luminous red arc was a surprising visitor to partly cloudy evening skies over northern France. Captured extending toward the zenith in a west-to-east mosaic of images from November 5, the faint atmospheric ribbon of light is an example of a Stable Auroral Red (SAR) arc. The rare night sky phenomenon was also spotted at unusually low latitudes around world, along with more dynamic auroral displays during an intense geomagnetic storm. SAR arcs and their relation to auroral emission have been explored by citizen science and satellite investigations. From altitudes substantially above the normal auroral glow, the deep red SAR emission is thought to be caused by strong heating due to currents flowing in planet Earth’s inner magnetosphere. Beyond this SAR, the Milky Way arcs above the cloud banks along the horizon, a regular visitor to night skies over northern France.

詞彙學習（漢羅/POJ/KIP/華語/English）

• 【天頂點】thian-téng-tiám/thian-tíng-tiám/天頂/zenith
• 【銀河】Gîn-hô/Gîn-hô/銀河/Milky Way
• 【銀河弧】Gîn-hô-hô͘/Gîn-hô-hôo/銀河弧/Milky Way arc
• 【穩定極光紅弧】Ún-tēng Ke̍k-kng Âng-hô͘/Ún-tīng Ki̍k-kng Âng-hôo/穩定極光紅弧/Stable Auroral Red (SAR) arc
• 【拼鬥影像】pheng-tàu iáⁿ-siōng/phing-tàu iánn-siōng/馬賽克影像/mosaic image
• 【地磁風暴】tē-chû hong-pō/tē-tsû hong-pō/地磁風暴/geomagnetic storm
• 【磁層】chû-chân/tsû-tsân/磁層/magnetosphere
• 【極光】ke̍k-kng/ki̍k-kng/極光/aurora
• 【電流】tiān-liû/tiān-liû/電流/currents
• 【公民科學】kong-bîn kho-ha̍k/kong-bîn kho-ha̍k/公民科學/citizen science
• 【海拔】hái-poa̍t/hái-pua̍t/海拔/altitudes
• 【熁燒】haⁿh-sio/hannh-sio/加熱/heating