挪威天頂 ê 極光生物

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Creature Aurora Over Norway
• 影像來源 kah 版權：Ole C. Salomonsen (Arctic Light Photo)
• 超空間：APOD 亂數產生器
• 台文翻譯：An-Li Tsai (NSYSU)

[漢羅] 挪威天頂 ê 極光生物

這工是萬聖節，天頂看起來敢若有一款生物 tī 遐。 是啥物生物呢？天文攝影師嘛毋知，毋過你會使臆看覓咧。 是講，到底是啥物原因 tī 2013 年造成這款 奇怪現象？這咱知影。是彼年上精彩 ê 極光表演。 這个 壯觀 ê 極光 有足濟 細節 通看。 這張 相片有活潑 ê 青色 kah 茄仔色 極光。 這是高層大氣內底 ê 酸素 kah 窒素 tùi 太空中入來 ê 一大陣 電子 ê 反應。 前景看起來仝款足奇怪 ê 生物，是 挪威 Tromsø ê 白樺 樹。 這款 翕起來足媠 ê 極光，kah 地磁風暴 是定定做伙出現。

[POJ] Ná-ui thiⁿ-téng ê ke̍k-kng seng-bu̍t

Chit kang sī Bān-sèng-cheh, thiⁿ-téng khòaⁿ--khí-lâi káⁿ-nā ū chi̍t-khoán seng-bu̍t tī hiah. Sī siáⁿ-mih seng-bu̍t neh? Thian-bûn liap-iáⁿ-su mā m̄-chai, m̄-koh lí ē-sái ioh khòaⁿ-māi leh. Sī-kóng, tàu-té sī siáⁿ-mih goân-in tī 2013 nî chō-sêng chit-khoán kî-koài hiān-siōng? Che lán chai-iáⁿ. Sī hit nî siōng cheng-chhái ê ke̍k-kng piáu-ián. Chit-ê chòng-koan ê ke̍k-kng ū chiok chē sè-chiat thang khòaⁿ. Chit-tiuⁿ siòng-phìⁿ ū hoa̍t-phoat ê chheⁿ-sek kah kiô-á-sek ke̍k-kng. Che-sī ko-chân tāi-khì lāi-té ê sàng-sò͘ kah chit-sò͘ tùi thài-khong tiong ji̍p-lâi ê chi̍t-tōa-tīn tiān-chú ê hoán-èng. Chiân-kéng khòaⁿ--khí-lâi kāng-khoán chiok kî-koài ê seng-bu̍t, sī Ná-ui Tromsø ê Pe̍h-hôa-chhiū. Chit-khoán hip--khí-lâi chiok súi ê ke̍k-kng, kah tē-chû hong-pō sī tiāⁿ-tiāⁿ chò-hóe chhut-hiān.

[KIP] Ná-ui thinn-tíng ê ki̍k-kng sing-bu̍t

Tsit kang sī Bān-sìng-tseh, thinn-tíng khuànn--khí-lâi kánn-nā ū tsi̍t-khuán sing-bu̍t tī hiah. Sī siánn-mih sing-bu̍t neh? Thian-bûn liap-iánn-su mā m̄-tsai, m̄-koh lí ē-sái ioh khuànn-māi leh. Sī-kóng, tàu-té sī siánn-mih guân-in tī 2013 nî tsō-sîng tsit-khuán kî-kuài hiān-siōng? Tse lán tsai-iánn. Sī hit nî siōng tsing-tshái ê ki̍k-kng piáu-ián. Tsit-ê tsòng-kuan ê ki̍k-kng ū tsiok tsē sè-tsiat thang khuànn. Tsit-tiunn siòng-phìnn ū hua̍t-phuat ê tshenn-sik kah kiô-á-sik ki̍k-kng. Tse-sī ko-tsân tāi-khì lāi-té ê sàng-sòo kah tsit-sòo tuì thài-khong tiong ji̍p-lâi ê tsi̍t-tuā-tīn tiān-tsú ê huán-ìng. Tsiân-kíng khuànn--khí-lâi kāng-khuán tsiok kî-kuài ê sing-bu̍t, sī Ná-ui Tromsø ê Pe̍h-huâ-tshiū. Tsit-khuán hip--khí-lâi tsiok suí ê ki̍k-kng, kah tē-tsû hong-pō sī tiānn-tiānn tsò-hué tshut-hiān.

[English] Creature Aurora Over Norway

It was Halloween and the sky looked like a creature. Exactly which creature, the astrophotographer was unsure (but possibly you can suggest one). Exactly what caused this eerie apparition in 2013 was sure: one of the best auroral displays that year. This spectacular aurora had an unusually high degree of detail. Pictured here, the vivid green and purple auroral colors are caused by high atmospheric oxygen and nitrogen reacting to a burst of incoming electrons. Birch trees in Tromsø, Norway formed an also eerie foreground. Frequently, new photogenic auroras accompany new geomagnetic storms.

詞彙學習