美國猶他州 ê 日環食

Page(/daily/2023/11/20231101.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 美國猶他州 ê 日環食

一部份 ê 日頭 tī 這個月初無去矣,毋過無啥物人咧煩惱。 無去 ê 部份,tī 一寡所在 看著 ê 是連中央就攏無去。 這是因為 月球 tī 伊頭前 kā 閘去,就是咱知影 ê 日環食。 這張相片是日食 系列相片,是月球 tī 天頂行超過 peh 起來 ê 太陽。 前景 ê 山崙是 美國 猶他州 ê 工場山。 Ùi 日頭中央 ê 放射光毋 是真–ê,是 kha-mé-lah ê 光圈繞射現象,這就叫做 太陽星。 月娘是真–ê,毋過有 kā 伊調較光咧,予伊 ê 外形較清楚。 按呢就會當 tī 火環日食 ê 階段,看著月娘 ê 位置 leh 改變。 是講這个 日食系列相片 實在是予人讚嘆,毋過這張相片其實是天文攝影師 leh 練習爾爾。 是按怎講? 因為明年 2024 年 4 月 8 號 北美洲 會出現 日全食,伊向望會當利用這擺機會,tī 日全食 ê 時陣翕著較好 ê 相片。

[POJ] Bí-kok Iû-thaⁿ-chiu ê Ji̍t-khoân-si̍t

Chi̍t-pō͘-hūn ê ji̍t-thâu tī chit kò goe̍h-chhe bô-khì-ah, m̄-koh bô siáⁿ-mih-lâng leh hoân-ló. Bô–khì ê pō͘-hūn, tī chi̍t-kóa só͘-chāi khòaⁿ-tio̍h ê sī liân tiong-ng tō lóng bô–khì. Che-sī in-ūi Goe̍h-kiû tī i thâu-chêng kā cha̍h khì, to̍h-sī lán chai-iáⁿ ê ji̍t-khoân-si̍t. Chit-tiuⁿ siòng-phìⁿ sī ji̍t-si̍t hē-lia̍t siòng-phìⁿ, sī Goe̍h-kiû tī thiⁿ-téng kiâⁿ chhiau-kòe peh–khí-lâi ê Thài-iông. Chiân-kéng ê soaⁿ-lūn sī Bí-kok Iû-thaⁿ-chiu ê Kang-tiûⁿ-soaⁿ. Ùi ji̍t-thâu tiong-ng ê hòng-siā-kng m̄-sī chin–ê, sī kha-mé-lah ê kng-khoan jiàu-siā hiān-siōng, che tō kiò-chò Thài-iâng-chheⁿ. Goe̍h-niû sī chin–ê,m̄-koh ū kā i tiâu khah kng–leh, hō͘ i ê gōa-hêng khah chheng-chhó. Án-ne to̍h ē-tàng tī hóe-khoân ji̍t-si̍t ê kai-tōaⁿ, khòaⁿ-tio̍h Goe̍h-niû ê ūi-tì leh kái-piàn. Sī-kóng chit-ê ji̍t-si̍t hē-lia̍t siòng-phìⁿ si̍t-chāi sī hō͘ lâng chàn-thàn, m̄-koh chit-tiuⁿ siòng-phìⁿ kî-si̍t sī thian-bûn liap-iáⁿ-su leh liān-si̍p niā-niā. Sī án-ná kóng? In-ūi mê-nî 2024 nî 4 goe̍h 8 hō Pak-bí-chiu ē chhut-hiān ji̍t-choân-si̍t, i ǹg-bāng ē-tàng lī-iōng chit pái ki-hōe, tī ji̍t-choân-si̍t ê sî-chūn hip-tio̍h khah-hó ê siòng-phìⁿ.

[KIP] Bí-kok Iû-thann-tsiu ê Ji̍t-khuân-si̍t

Tsi̍t-pōo-hūn ê ji̍t-thâu tī tsit kò gue̍h-tshe bô-khì-ah, m̄-koh bô siánn-mih-lâng leh huân-ló. Bô–khì ê pōo-hūn, tī tsi̍t-kuá sóo-tsāi khuànn-tio̍h ê sī liân tiong-ng tō lóng bô–khì. Tse-sī in-uī Gue̍h-kiû tī i thâu-tsîng kā tsa̍h khì, to̍h-sī lán tsai-iánn ê ji̍t-khuân-si̍t. Tsit-tiunn siòng-phìnn sī ji̍t-si̍t hē-lia̍t siòng-phìnn, sī Gue̍h-kiû tī thinn-tíng kiânn tshiau-kuè peh–khí-lâi ê Thài-iông. Tsiân-kíng ê suann-lūn sī Bí-kok Iû-thann-tsiu ê Kang-tiûnn-suann. Uì ji̍t-thâu tiong-ng ê hòng-siā-kng m̄-sī tsin–ê, sī kha-mé-lah ê kng-khuan jiàu-siā hiān-siōng, tse tō kiò-tsò Thài-iâng-tshenn. Gue̍h-niû sī tsin–ê,m̄-koh ū kā i tiâu khah kng–leh, hōo i ê guā-hîng khah tshing-tshó. Án-ne to̍h ē-tàng tī hué-khuân ji̍t-si̍t ê kai-tuānn, khuànn-tio̍h Gue̍h-niû ê uī-tì leh kái-piàn. Sī-kóng tsit-ê ji̍t-si̍t hē-lia̍t siòng-phìnn si̍t-tsāi sī hōo lâng tsàn-thàn, m̄-koh tsit-tiunn siòng-phìnn kî-si̍t sī thian-bûn liap-iánn-su leh liān-si̍p niā-niā. Sī án-ná kóng? In-uī mê-nî 2024 nî 4 gue̍h 8 hō Pak-bí-tsiu ē tshut-hiān ji̍t-tsuân-si̍t, i ǹg-bāng ē-tàng lī-iōng tsit pái ki-huē, tī ji̍t-tsuân-si̍t ê sî-tsūn hip-tio̍h khah-hó ê siòng-phìnn.

[English] Annular Solar Eclipse over Utah

Part of the Sun disappeared earlier this month, but few people were worried. The missing part, which included the center from some locations, just went behind the Moon in what is known as an annular solar eclipse. Featured here is an eclipse sequence taken as the Moon was overtaking the rising Sun in the sky. The foreground hill is Factory Butte in Utah, USA. The rays flaring out from the Sun are not real – they result from camera aperture diffraction and are known as sunstar. The Moon is real, but it is artificially brightened to enhance its outline – which helps the viewer better visualize the Moon’s changing position during this ring-of-fire eclipse. As stunning as this eclipse sequence is, it was considered just practice by the astrophotographer. The reason? She hopes to use this experience to better photograph the total solar eclipse that will occur over North America on April 8, 2024.

詞彙學習(漢羅/POJ/KIP/華語/English)

  • 【日環食】ji̍t-khoân-si̍t/ji̍t-khuân-si̍t/日環食/annular solar eclipse
  • 【系列】hē-lia̍t/hē-lia̍t/系列/sequence
  • 【工場山】kang-tiûⁿ-soaⁿ/kang-tiûnn-suann/工場山/Factory Butte
  • 【猶他州】Iû-thaⁿ-chiu/Iû-thann-tsiu/猶他州/Utah
  • 【光圈】kng-khoan/kng-khuan/光圈/aperture
  • 【繞射】jiàu-siā/jiàu-siā/繞射/diffraction
  • 【火環日食】hóe-khoân ji̍t-si̍t/hué-khuân ji̍t-si̍t/火環日食/ring-of-fire eclipse
  • 【太陽星】thài-iông-chheⁿ/thài-iông-tshenn/太陽星/sunstar
  • 【日全食】ji̍t-choân-si̍t/ji̍t-tsuân-si̍t/日全食/total solar eclipse

  1. 阮嘛有 Podcast面冊InstagramTwitter,會逐工 kā 你提醒有新 ê 翻譯 kah 錄音。閣有 YouTube 頻道,有當時仔會出新 ê 影片,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:萬聖節 kah 巫師星雲 明仔載 ê 圖:天爐座星系團