仙后座 γ ê 幽靈

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Ghosts of Gamma Cas
• 影像來源 kah 版權：Guillaume Gruntz, Jean-François Bax
• 台文翻譯：An-Li Tsai (NSYSU)

[漢羅] 仙后座 γ ê 幽靈

仙后座 γ 是北半球秋天暗暝足光 ê 一粒星。 伊是這張望遠鏡影像內底上光 ê 恆星，就 tī 仙后座方向。 倒爿頂懸 ê IC 59 kah IC 63 是氣體 kah 塗粉組成 ê 幽靈星際雲，kah 仙后座 γ 做伙出現 tī 這个空間。 彼寡雲 其實毋是幽靈，就 chhāi tī 差不多 tī 600 光年遠 ê 所在。 受著 足燒足光 ê 仙后座 γ 高能輻射 ê 影響，in 去予侵蝕去，沓沓仔 leh 消失。 仙后座 γ 實際上是 kah 這个星雲 差 3、4 光年遠。 IC 63 kah 仙后座 γ 小可仔相倚，主色 ê 紅色 H-alpha 發射光，是水素原子去予恆星 ê 紫外光輻射了後離子化，重新 kah 電子複合 發--出 ê 光。 IC 59 是較遠 ê 恆星，有較少 ê H-alpha 發射線，毋過有較濟 反射恆星塗粉 發出 ê 特別藍光。 這个宇宙舞台 ê 大細超過 1 度，照估算 ê 仙后座 γ kah 伊附近天體 ê 距離來看，這差不多是 10 光年大。

[POJ] Sian-hiō-chō γ ê Iu-lêng

Sian-hiō-chō γ sī pak-pòaⁿ-kiû chhiu-thiⁿ àm-mê chiok kng ê chi̍t-lia̍p chheⁿ. I sī chit-tiuⁿ bōng-oán-kiàⁿ iáⁿ-siōng lāi-té siōng kng ê hêng-chheⁿ, to̍h tī Sian-hiō-chō hong-hiòng. Tò-pêng téng-koân ê IC 59 kah IC 63 sī khì-thé kah thô͘-hún cho͘-sêng ê iu-lêng seng-chè-hûn, kah Sian-hiō-chō γ chò-hóe chhut-hiān tī chit-ê khong-kan. Hit-kóa hûn kî-si̍t m̄-sī iu-lêng, to̍h chhāi tī chha-put-to 600 kng-nî hn̄g ê só͘-chāi. Siū-tio̍h chiok sio chiok kng ê Sian-hiō-chō γ ko-lêng hok-siā ê éng-hióng, in khì hō͘ chhim-sit khì, tau̍h-tau̍h-á leh siau-sit. Sian-hiō-chō γ si̍t-chè-siōng sī kah chit-ê chheⁿ hûn chha 3,4 kng-nî hn̄g. IC 63 kah Sian-hiō-chō γ sió-khóa-á sio-óa, chú-sek ê âng-sek H-alpha hoat-siā-kng, sī chúi-sò͘ goân-chú khì hō͘ hêng-chheⁿ ê chí-gōa-kng hok-siā liáu-āu lī-chú-hòa, tiông-sin kah tiān-chú ho̍k-ha̍p hoat--chhut ê kng. IC 59 sī khah hn̄g ê hêng-chheⁿ, ū khah chió ê H alpha hoat-siā sòaⁿ,m̄-koh ū khah-chè hoán-siā hêng-chheⁿ thô͘-hún hoat-chhut ê te̍k-pia̍t nâ-kng. Chit-ê ú-tiū bú-tâi ê tōa-sè chhiau-kòe 1 tō͘, chiàu kó͘-sǹg ê Sian-hiō-chō γ kah i hù-kīn thian-thé ê kū-lî lâi-khòaⁿ, che chha-put-to sī 10 kng-nî tōa.

[KIP] Sian-hiō-tsō γ ê Iu-lîng

Sian-hiō-tsō γ sī pak-puànn-kiû tshiu-thinn àm-mê tsiok kng ê tsi̍t-lia̍p tshenn. I sī tsit-tiunn bōng-uán-kiànn iánn-siōng lāi-té siōng kng ê hîng-tshenn, to̍h tī Sian-hiō-tsō hong-hiòng. Tò-pîng tíng-kuân ê IC 59 kah IC 63 sī khì-thé kah thôo-hún tsoo-sîng ê iu-lîng sing-tsè-hûn, kah Sian-hiō-tsō γ tsò-hué tshut-hiān tī tsit-ê khong-kan. Hit-kuá hûn kî-si̍t m̄-sī iu-lîng, to̍h tshāi tī tsha-put-to 600 kng-nî hn̄g ê sóo-tsāi. Siū-tio̍h tsiok sio tsiok kng ê Sian-hiō-tsō γ ko-lîng hok-siā ê íng-hióng, in khì hōo tshim-sit khì, ta̍uh-ta̍uh-á leh siau-sit. Sian-hiō-tsō γ si̍t-tsè-siōng sī kah tsit-ê tshenn hûn tsha 3,4 kng-nî hn̄g. IC 63 kah Sian-hiō-tsō γ sió-khuá-á sio-uá, tsú-sik ê âng-sik H-alpha huat-siā-kng, sī tsuí-sòo guân-tsú khì hōo hîng-tshenn ê tsí-guā-kng hok-siā liáu-āu lī-tsú-huà, tiông-sin kah tiān-tsú ho̍k-ha̍p huat--tshut ê kng. IC 59 sī khah hn̄g ê hîng-tshenn, ū khah tsió ê H alpha huat-siā suànn,m̄-koh ū khah-tsè huán-siā hîng-tshenn thôo-hún huat-tshut ê ti̍k-pia̍t nâ-kng. Tsit-ê ú-tiū bú-tâi ê tuā-sè tshiau-kuè 1 tōo, tsiàu kóo-sǹg ê Sian-hiō-tsō γ kah i hù-kīn thian-thé ê kū-lî lâi-khuànn, tse tsha-put-to sī 10 kng-nî tuā.

[English] The Ghosts of Gamma Cas

Gamma Cassiopeiae shines high in northern autumn evening skies. It's the brightest spiky star in this telescopic field of view toward the constellation Cassiopeia. Gamma Cas shares the ethereal-looking scene with ghostly interstellar clouds of gas and dust, IC 59 (top left) and IC 63. About 600 light-years distant, the clouds aren't actually ghosts. They are slowly disappearing though, eroding under the influence of energetic radiation from hot and luminous gamma Cas. Gamma Cas is physically located only 3 to 4 light-years from the nebulae. Slightly closer to gamma Cas, IC 63 is dominated by red H-alpha light emitted as hydrogen atoms ionized by the star's ultraviolet radiation recombine with electrons. Farther from the star, IC 59 shows proportionally less H-alpha emission but more of the characteristic blue tint of dust reflected star light. The cosmic stage spans over 1 degree or 10 light-years at the estimated distance of gamma Cas and friends.

詞彙學習