60 秒就無去：日落 ê 青爍現象

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Gone in 60 Seconds: A Green Flash Sunset
• 影片來源 kah 版權：Tengyu Cai
• 台文翻譯：An-Li Tsai (NSYSU)

[漢羅] 60 秒就無去：日落 ê 青爍現象

60 秒以內，這粒欲落去 ê 日頭就會變做青色--ê。 實際上，日頭 頭頂毋但會出現青光，閣會出現波湧，而且是出現 tī 規粒日頭 ê 邊緣。 日頭本身是無改變，這兩款 效應 攏是因為看 tùi 地球大氣 ê 高溫 kah 低溫層造成--ê。 這款特別 ê 色光就是 青爍，這是因為大氣層毋但會改變背景影像，嘛會 kā 色光色散到無仝方向，就親像 稜鏡 分光仝款。 這支影片是這個月初 tī 美國 Hawaii 海岸翕--ê。 影片有 60 秒，你 看到上尾 欲煞進前，日頭 頂懸有一部份家己停 tī 太空中，毋但變做 青色，嘛變做 藍色。 了後日頭就隨勼去無去矣，愛等到明仔載才會出現。

[POJ] 60 bió to̍h bô--khì: Ji̍t-lo̍h ê Chheⁿ-sih hiān-siōng

60 bió í-lāi, chit lia̍p beh lo̍h-khì ê ji̍t-thâu to̍h ē piàn-chò chheⁿ-sek--ê. Si̍t-chè-siōng, ji̍t-thâu thâu-téng m̄-nā ē chhut-hiān chheⁿ-kng, koh ē chhut-hiān pho-éng, jî-chhiáⁿ sī chhut-hiān tī kui-lia̍p ji̍t-thâu ê pian-iân. Ji̍t-thâu pún-sin sī-bô kái-piàn, chit nn̄g khoán hāu-èng lóng sī in-ūi khòaⁿ tùi Tē-kiû tāi-khì ê ko-un kah kē-un chân chō-sêng--ê. Chit-khoán te̍k-pia̍t ê sek-kng to̍h-sī chheⁿ-sih, che-sī in-ūi tāi-khì-chân m̄-nā ē kái-piàn pōe-kéng iáⁿ-siōng, mā ē kā sek-kng sek-sòaⁿ kàu bô-kâng hong-hiòng, to̍h chhin-chhiūⁿ lêng-kiàⁿ pun-kng kāng-khoán. Chit-ki iáⁿ-phìⁿ sī chit kò goe̍h-chhe tī Bí-kok Hawaii hái-hōaⁿ hip--ê. Iáⁿ-phìⁿ ū 60 bió, lí khòaⁿ kàu siōng-bóe beh soah chìn-chêng, ji̍t-thâu téng-koân ū chi̍t-pō͘-hūn ka-kī thêng tī thài-khong-tiong, m̄-nā piàn-chò chheⁿ-sek, mā piàn-chò nâ-sek. Liáu-āu ji̍t-thâu to̍h sûi kiu--khì bô--khì--ah, ài tán-kàu bîn-á-chài chiah-ē chhut-hiān.

[KIP] 60 bió to̍h bô--khì: Ji̍t-lo̍h ê Tshenn-sih hiān-siōng

60 bió í-lāi, tsit lia̍p beh lo̍h-khì ê ji̍t-thâu to̍h ē piàn-tsò tshenn-sik--ê. Si̍t-tsè-siōng, ji̍t-thâu thâu-tíng m̄-nā ē tshut-hiān tshenn-kng, koh ē tshut-hiān pho-íng, jî-tshiánn sī tshut-hiān tī kui-lia̍p ji̍t-thâu ê pian-iân. Ji̍t-thâu pún-sin sī-bô kái-piàn, tsit nn̄g khuán hāu-ìng lóng sī in-uī khuànn tuì Tē-kiû tāi-khì ê ko-un kah kē-un tsân tsō-sîng--ê. Tsit-khuán ti̍k-pia̍t ê sik-kng to̍h-sī tshenn-sih, tse-sī in-uī tāi-khì-tsân m̄-nā ē kái-piàn puē-kíng iánn-siōng, mā ē kā sik-kng sik-suànn kàu bô-kâng hong-hiòng, to̍h tshin-tshiūnn lîng-kiànn pun-kng kāng-khuán. Tsit-ki iánn-phìnn sī tsit kò gue̍h-tshe tī Bí-kok Hawaii hái-huānn hip--ê. Iánn-phìnn ū 60 bió, lí khuànn kàu siōng-bué beh suah tsìn-tsîng, ji̍t-thâu tíng-kuân ū tsi̍t-pōo-hūn ka-kī thîng tī thài-khong-tiong, m̄-nā piàn-tsò tshenn-sik, mā piàn-tsò nâ-sik. Liáu-āu ji̍t-thâu to̍h suî kiu--khì bô--khì--ah, ài tán-kàu bîn-á-tsài tsiah-ē tshut-hiān.

[English] Gone in 60 Seconds: A Green Flash Sunset

In 60 seconds, this setting Sun will turn green. Actually, the top of the Sun already appears not only green, but wavey -- along with all of its edges. The Sun itself is unchanged -- both effects are caused by looking along hot and cold layers in Earth's atmosphere. The unusual color is known as a green flash and occurs because these atmospheric layers not only shift background images but disperse colors into slightly different directions, like a prism. The featured video was captured earlier this month off the coast of Hawaii, USA. After waiting those 60 seconds, at the video's end, the upper part of the Sun seems to hover alone in space, while turning not only green, but blue. Then suddenly, the Sun appears to shrink to nothing -- only to return tomorrow.

詞彙學習