半月

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Quarter Moons
• 影像來源 kah 版權：Marcella Giulia Pace
• 國際活動：觀測月娘 ê 暗暝
• 台文翻譯：An-Li Tsai (NSYSU)

[漢羅] 半月

Ùi 初一行到十五 ê 半路，就是行到 頂半月 ê 月相。 這是月球一個月 踅地球一輾 ê 四分一。 頭一个 四分一，有半粒月娘看會著，這是 日光 kā 照予光--ê 彼半爿。 月球 ê 下半月就是 ùi 十五 行到 初一 ê 半路，日光 kā 月盤另外彼半爿照予光。 毋管是頂半月 抑是 下半月 ê 月相，kā 月球分做暗暝 kah 日時 ê 晨昏線，就 tī 中央 kā 月娘分做兩爿。 月球晨昏線附近 ê 隕石坑 kah 山，會因為有較長 ê 烏影，煞變甲足清楚。 所以半月 ê 月相是一个觀測月球足好 ê 時間點。 Kā 你提醒一下，2022 年 所有 ê 半月 月相 kah in ê 日期，攏 tī 這張望遠鏡影像內底排甲好勢好勢。 是講 ，你下暗會當看著月娘 ê 頂半月。

[POJ] Pòaⁿ-goe̍h

Ùi chhe-it kiâⁿ kàu cha̍p-gō͘ ê pòaⁿ-lō͘, to̍h-sī kiâⁿ kàu téng-pòaⁿ-goe̍h ê goe̍h-siòng. Che-sī goe̍h-kiû chi̍t kò goe̍h se̍h Tē-kiû chi̍t liàn ê sì-hun-it. Thâu-chi̍t-ê sì-hun-it, ū pòaⁿ lia̍p goe̍h-niû khòaⁿ-ē-tio̍h, che-sī ji̍t-kng kā chiò hō͘ kng--ê hit pòaⁿ-pêng. Goe̍h-kiû ê ē-pòaⁿ-goe̍h to̍h-sī ùi cha̍p-ngó͘ kiâⁿ kàu chho͘-it ê pòaⁿ-lō͘, ji̍t-kng kā goe̍h-pôaⁿ lēng-gōa hit pòaⁿ-pêng chiò hō͘ kng. M̄-koán sī téng-pòaⁿ-goe̍h ia̍h-sī ē-pòaⁿ-goe̍h ê goe̍h-siòng, kā Goe̍h-kiû pun-chò àm-mê kah ji̍t--sî ê sîn-hun-sòaⁿ, to̍h tī tiong-ng kā goe̍h-niû pun-chò nn̄g-pêng. Goe̍h-kiû sîn-hun-sòaⁿ hù-kīn ê ún-se̍k-kheⁿ kah soaⁿ, ē in-ūi ū khah tn̂g ê o͘-iáⁿ, soah piàn-kah chiok chheng-chhó. Só͘-í pòaⁿ-goe̍h ê goe̍h-siòng sī chi̍t-ê koan-chhek Goe̍h-kiû chiok hó ê sî-kan-tiám. Kā lí thê-chhéⁿ chi̍t-ē, 2022 nî só͘-ū ê pòaⁿ-goe̍h goe̍h-siòng kah in ê ji̍t-kî, lóng tī chit-tiuⁿ bōng-oán-kiàⁿ iáⁿ-siōng lāi-té pâi kah hó-sè-hó-sè. Sī-kóng,lí e-àm ē-tàng khòaⁿ-tio̍h goe̍h-niû ê téng-pòaⁿ-goe̍h.

[KIP] Puànn-gue̍h

Uì tshe-it kiânn kàu tsa̍p-gōo ê puànn-lōo, to̍h-sī kiânn kàu tíng-puànn-gue̍h ê gue̍h-siòng. Tse-sī gue̍h-kiû tsi̍t kò gue̍h se̍h Tē-kiû tsi̍t liàn ê sì-hun-it. Thâu-tsi̍t-ê sì-hun-it, ū puànn lia̍p gue̍h-niû khuànn-ē-tio̍h, tse-sī ji̍t-kng kā tsiò hōo kng--ê hit puànn-pîng. Gue̍h-kiû ê ē-puànn-gue̍h to̍h-sī uì tsa̍p-ngóo kiânn kàu tshoo-it ê puànn-lōo, ji̍t-kng kā gue̍h-puânn līng-guā hit puànn-pîng tsiò hōo kng. M̄-kuán sī tíng-puànn-gue̍h ia̍h-sī ē-puànn-gue̍h ê gue̍h-siòng, kā Gue̍h-kiû pun-tsò àm-mê kah ji̍t--sî ê sîn-hun-suànn, to̍h tī tiong-ng kā gue̍h-niû pun-tsò nn̄g-pîng. Gue̍h-kiû sîn-hun-suànn hù-kīn ê ún-si̍k-khenn kah suann, ē in-uī ū khah tn̂g ê oo-iánn, suah piàn-kah tsiok tshing-tshó. Sóo-í puànn-gue̍h ê gue̍h-siòng sī tsi̍t-ê kuan-tshik Gue̍h-kiû tsiok hó ê sî-kan-tiám. Kā lí thê-tshénn tsi̍t-ē, 2022 nî sóo-ū ê puànn-gue̍h gue̍h-siòng kah in ê ji̍t-kî, lóng tī tsit-tiunn bōng-uán-kiànn iánn-siōng lāi-té pâi kah hó-sè-hó-sè. Sī-kóng,lí e-àm ē-tàng khuànn-tio̍h gue̍h-niû ê tíng-puànn-gue̍h.

[English] Quarter Moons

Half way between New Moon and Full Moon is the Moon's first quarter phase. That's a quarter of the way around its moonthly orbit. At the first quarter phase, half the Moon's visible side is illuminated by sunlight. For the Moon's third quarter phase, half way between Full Moon and New Moon, sunlight illuminates the other half of the visible lunar disk. At both first and third quarter phases, the terminator, or shadow line separating the lunar night and day, runs down the middle. Near the terminator, long shadows bring lunar craters and mountains in to sharp relief, making the quarter phases a good time to observe the Moon. But in case you missed some, all the quarter phases of the Moon and their calendar dates during 2022 can be found in this well-planned array of telephoto images. Of course, you can observe a first quarter Moon tonight.

詞彙學習