日環食手指

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Eclipse Rings
• 影像來源 kah 版權：Jerry Zhang (倒爿), Baolong Chen (攝影師) & Amber Zhang (正爿)
• 相簿：投稿到 APOD ê 日食相片
• 台文翻譯：An-Li Tsai (NSYSU)

[漢羅] 日環食手指

伊攏知影，除了彼个問題。 伊真清楚駛車到 in ê 目的 Oregon 州 ê Abert 湖，會看著完整 ê 日 環食。 伊知影後一擺欲 tī 美國 看著 火環日食，愛閣等 16 冬以上，所以欲翕這張相片是一个足罕得有 ê 機會。 伊 tùi 這个翕相 ê 計畫真了解：伊 kah in 男朋友會是這張日食相片 ê 剪影，有當時仔做伙翕，有當時仔分開翕。 伊知影 日環食 干焦出現幾若分鐘爾爾，伊嘛 開幾若點鐘 ê 時間 leh 鬥相共。 伊嘛看著 in 朋友 tī 400 公尺遠 ê 山跤 leh chhāi kha-mé-lah。 伊毋知 ê 是，伊會去予問彼个問題。 毋過伊知影伊 ê 答案是：「我願意」。

[POJ] Ji̍t-khoân-si̍t Chhiú-chí

I lóng chai-iáⁿ, tû-liáu hit-ê būn-tê. I chin chheng-chhó sái-chhia kàu in ê bo̍k-tek Oregon chiu ê Abert ô͘, ē khòaⁿ-tio̍h oân-chéng ê ji̍t-khoân-si̍t. I chai-iáⁿ āu chi̍t-pái beh tī Bí-kok khòaⁿ-tio̍h hóe-khoân ji̍t-si̍t, ài koh tán 16 tang í-siōng, só͘-í beh hip chit-tiuⁿ siòng-phìⁿ sī chi̍t-ê chiok hán-tit ū ê ki-hōe. I tùi chit-ê hip-siòng ê kè-ōe chin liáu-kái: I kah in lâm-pêng-iú ē sì chit tiuⁿ ji̍t-si̍t siòng-phìⁿ ê chián-iáⁿ, ū-tang-sî-á chò-hóe hip, ū-tang-sî-á hun-khui hip. I chai-iáⁿ ji̍t-khoân-si̍t kan-na chhut-hiān kúi-nā hun-cheng niā-niā, i mā khai kúi-nā tiám-cheng ê sî-kan leh tàu-saⁿ-kāng. I mā khòaⁿ-tio̍h in pêng-iú tī 400 kong-chhioh hn̄g ê soaⁿ-kha leh chhāi kha-mé-lah. I m̄-chai ê sī, i ē khì hō͘ mn̄g hit-ê būn-tê. M̄-koh i chai-iáⁿ i ê tap-àn sī:“Góa goān-ì”.

[KIP] Ji̍t-khuân-si̍t Tshiú-tsí

I lóng tsai-iánn, tû-liáu hit-ê būn-tê. I tsin tshing-tshó sái-tshia kàu in ê bo̍k-tik Oregon tsiu ê Abert ôo, ē khuànn-tio̍h uân-tsíng ê ji̍t-khuân-si̍t. I tsai-iánn āu tsi̍t-pái beh tī Bí-kok khuànn-tio̍h hué-khuân ji̍t-si̍t, ài koh tán 16 tang í-siōng, sóo-í beh hip tsit-tiunn siòng-phìnn sī tsi̍t-ê tsiok hán-tit ū ê ki-huē. I tuì tsit-ê hip-siòng ê kè-uē tsin liáu-kái: I kah in lâm-pîng-iú ē sì tsit tiunn ji̍t-si̍t siòng-phìnn ê tsián-iánn, ū-tang-sî-á tsò-hué hip, ū-tang-sî-á hun-khui hip. I tsai-iánn ji̍t-khuân-si̍t kan-na tshut-hiān kuí-nā hun-tsing niā-niā, i mā khai kuí-nā tiám-tsing ê sî-kan leh tàu-sann-kāng. I mā khuànn-tio̍h in pîng-iú tī 400 kong-tshioh hn̄g ê suann-kha leh tshāi kha-mé-lah. I m̄-tsai ê sī, i ē khì hōo mn̄g hit-ê būn-tê. M̄-koh i tsai-iánn i ê tap-àn sī:“Guá guān-ì”.

[English] Eclipse Rings

She knew everything but the question. She was well aware that there would be a complete annular eclipse of the Sun visible from their driving destination: Lake Abert in Oregon. She knew that the next ring-of-fire eclipse would occur in the USA only in 16 more years, making this a rare photographic opportunity. She was comfortable with the plan: that she and her boyfriend would appear in front of the eclipse in silhouette, sometimes alone, and sometimes together. She knew that the annular phase of this eclipse would last only a few minutes and she helped in the many hours of planning. She could see their friend who set up the camera about 400 meters away at the bottom of a ridge. What she didn’t know was the question she would be asked. But she did know the answer: “yes”.

詞彙學習（漢羅/POJ/KIP/華語/English）

• 【日環食】ji̍t-khoân-si̍t/ji̍t-khuân-si̍t/日環食/annular eclipse of the Sun
• 【火環日食】hóe-khoân ji̍t-si̍t/hué-khuân ji̍t-si̍t/火環日食/ring-of-fire eclipse
• 【日食】ji̍t-si̍t/ji̍t-si̍t/日食/solar eclipse
• 【手指】chhiú-chí/tshiú-tsí/戒指/ring