一欉日食樹仔

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：An Eclipse Tree
• 影像來源 kah 版權：Shawn Wyre
• 相簿：投稿到 APOD ê 日食相片
• 台文翻譯：An-Li Tsai (NSYSU)

[漢羅] 一欉日食樹仔

是哩！毋知恁兜 ê 樹仔敢會變做這形？ 你若是注意看這張相片 ê 塗跤，就會發現有足濟日食影像，這是 昨昏日食 透過樹仔做出來 ê 影像。 樹葉仔縫就親像是 針孔 透鏡，每一空攏會做出 偏食 ê 日頭影像，投影 tī 另外一个方向。 這張相片是 tī 美國 德州 Burleson 翕–ê。 昨昏 tī 美洲 ê 人攏有 看著 日偏食，這个現象就是月娘 ùi 日頭面頭前行過。 Tī 地球 狹狹 ê 日食帶 下底 ê 人，攏會當看著 日環食，嘛會使 kā 叫做 火環日食。 這个時陣，月娘完全 去予日頭包 tī 內底，日光 ùi 月球外緣 射出來。 咱閣轉來 上開始 彼个問題，恁兜 ê 樹仔毋但會當 變做這形，而且逐擺拄著日食 ê 時陣，攏會變做這形。 明年 4 月 8 號，北美洲 會當看著 日全食。

[POJ] Chi̍t châng Ji̍t-si̍t Chhiū-á

Sī lih! M̄-chai lín-tau ê chhiū-á kám-ē piàn-chò chit hêng? Lí nā-sī chù-ì khòaⁿ chit-tiuⁿ siòng-phìⁿ ê thô͘-kha, to̍h ē hoat-hiān ū chiok chē ji̍t-si̍t iáⁿ-siōng, che-sī cha-hng ji̍t-si̍t thàu-kòe chhiū-á chò-chhut-lâi ê iáⁿ-siōng. Chhiū-hio̍h-á-phāng tō chhin-chhiūⁿ sī chiam-kháng thàu-kiàⁿ, múi chi̍t khang lóng ē chò-chhut phian-si̍t ê ji̍t-thâu iáⁿ-siōng, tâu-iáⁿ tī lēng-gōa chi̍t-ê hong-hiòng. Chit-tiuⁿ siòng-phìⁿ sī tī Bí-kok Tek-chiu Burleson hip–ê. Cha-hng tī Bí-chiu ê lâng lóng-ū khòaⁿ-tio̍h ji̍t-phian-si̍t, chit-ê hiān-siōng to̍h sī goe̍h-niû ùi ji̍t-thâu bīn-thâu-chêng kiâⁿ-kòe. Tī Tē-kiû e̍h-e̍h ê ji̍t-si̍t-tòa ē-té ê lâng, lóng ē-tàng khòaⁿ-tio̍h ji̍t khoân-si̍t, mā ē-sái kā kiò-chò hóe-khoân ji̍t-si̍t. Chit-ê sî-chūn, goe̍h-niû oân-choân khì hō͘ ji̍t-thâu pau tī lāi-té, ji̍t-kng ùi Goe̍h-kiû gōa-iân siā–chhut-lâi. Lán koh tńg-lâi siōng khai-sí hit-ê būn-tê, lín-tau ê chhiū-á m̄-nā ē-tàng piàn-chò chit hêng, jî-chhiáⁿ ta̍k-pái tú-tio̍h ji̍t-si̍t ê sî-chūn, lóng ē piàn-chò chit hêng. Môa-nî 4 goe̍h 8 hō, Pak-bí-chiu ē-tàng khòaⁿ-tio̍h ji̍t-choân-si̍t.

[KIP] Tsi̍t tsâng Ji̍t-si̍t Tshiū-á

Sī lih! M̄-tsai lín-tau ê tshiū-á kám-ē piàn-tsò tsit hîng? Lí nā-sī tsù-ì khuànn tsit-tiunn siòng-phìnn ê thôo-kha, to̍h ē huat-hiān ū tsiok tsē ji̍t-si̍t iánn-siōng, tse-sī tsa-hng ji̍t-si̍t thàu-kuè tshiū-á tsò-tshut-lâi ê iánn-siōng. Tshiū-hio̍h-á-phāng tō tshin-tshiūnn sī tsiam-kháng thàu-kiànn, muí tsi̍t khang lóng ē tsò-tshut phian-si̍t ê ji̍t-thâu iánn-siōng, tâu-iánn tī līng-guā tsi̍t-ê hong-hiòng. Tsit-tiunn siòng-phìnn sī tī Bí-kok Tik-tsiu Burleson hip–ê. Tsa-hng tī Bí-tsiu ê lâng lóng-ū khuànn-tio̍h ji̍t-phian-si̍t, tsit-ê hiān-siōng to̍h sī gue̍h-niû uì ji̍t-thâu bīn-thâu-tsîng kiânn-kuè. Tī Tē-kiû e̍h-e̍h ê ji̍t-si̍t-tuà ē-té ê lâng, lóng ē-tàng khuànn-tio̍h ji̍t khuân-si̍t, mā ē-sái kā kiò-tsò hué-khuân ji̍t-si̍t. Tsit-ê sî-tsūn, gue̍h-niû uân-tsuân khì hōo ji̍t-thâu pau tī lāi-té, ji̍t-kng uì Gue̍h-kiû guā-iân siā–tshut-lâi. Lán koh tńg-lâi siōng khai-sí hit-ê būn-tê, lín-tau ê tshiū-á m̄-nā ē-tàng piàn-tsò tsit hîng, jî-tshiánn ta̍k-pái tú-tio̍h ji̍t-si̍t ê sî-tsūn, lóng ē piàn-tsò tsit hîng. Muâ-nî 4 gue̍h 8 hō, Pak-bí-tsiu ē-tàng khuànn-tio̍h ji̍t-tsuân-si̍t.

[English] An Eclipse Tree

Yes, but can your tree do this? If you look closely at the ground in the featured image, you will see many images of yesterday’s solar eclipse – created by a tree. Gaps between tree leaves act like pinhole lenses and each create a small image of the partially eclipsed Sun visible in the other direction. The image was taken in Burleson, Texas, USA. Yesterday, people across the Americas were treated to a partial eclipse of the Sun, when the Moon moves in front of part of the Sun. People in a narrow band of Earth were treated to an annular eclipse, also called a ring-of-fire eclipse, when the Moon becomes completely engulfed by the Sun and sunlight streams around all of the Moon’s edges. In answer to the lede question, your tree not only can do this, but will do it every time that a visible solar eclipse passes overhead. Next April 8, a deeper, total solar eclipse will move across North America.

詞彙學習（漢羅/POJ/KIP/華語/English）

• 【針孔透鏡】chiam-kháng thàu-kiàⁿ/tsiam-kháng thàu-kiànn/針孔透鏡/pinhole lenses
• 【食日】si̍t-ji̍t/si̍t-ji̍t/食日/eclipsed Sun
• 【日偏食】ji̍t-phian-si̍t/ji̍t-phian-si̍t/日偏食/partial eclipse of the Sun
• 【日全食】ji̍t-choân-si̍t/ji̍t-tsuân-si̍t/日全食/total solar eclipse
• 【日環食】ji̍t-khoân-si̍t/ji̍t-khuân-si̍t/日環食/annular eclipse of the Sun
• 【火環日食】hóe-khoân ji̍t-si̍t/hué-khuân ji̍t-si̍t/火環日食/ring-of-fire eclipse