變形 ê 日出帶食

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：A Distorted Sunrise Eclipse
• 影像來源 kah 版權：Elias Chasiotis
• APOD ê 小編欲 kā 你講：10 月 12 暗時 6 點 tī 美國 Houghton, Michigan 欲做 ê 代誌
• 台文翻譯：An-Li Tsai (NSYSU)

[漢羅] 變形 ê 日出帶食

是哩！毋知你敢捌看過這款日出？ 2019 年 日偏食這工 ê 日出，日頭 tī 遮先拄著厚雲，了後干焦是分做兩塊 peh--起來。 Kha-mé-lah sàng 講，這个景色是伊這世人拄過 上使人讚嘆 ê 日出。 這个 去予大氣紅化 ê 太陽，伊頂懸附近 ê 烏色圓盤 是 月球，毋閣下跤彼个尖尖 ê 烏影嘛是。 這是因為 地球大氣 內底有一層空氣 ê 溫度實在是傷懸矣，to̍h 親像是一粒 大型 ê 鏡頭，才會產生 第二个影像。 Tùi 一般 ê 日出 抑是 日落來講，這款較罕得看著 ê 大氣光學 現象 to̍h 叫做 Etruscan 花矸效應。 這張相片 是 2019 年 12 月 tī 卡達 ê Al Wakrah 翕 ê。 Tī 地球 東爿狹細範圍內底 ê 一寡觀星者，會當看著 完整 ê 金環日食。 Tī 遐，月球完全去予背景 ê 太陽箍 tī 內底，to̍h 親像是一輾 火箍仔。 Tùi 有萬全準備 ê 觀星者來講，後一擺 ê 日食，嘛是日環食，會 tī 這禮拜六 出現。

[POJ] Piàn-hêng ê Ji̍t-chhut-tài-si̍t

Sī--lih! M̄-chai lí kám bat khòaⁿ-kàu chit-khoán ji̍t-chhut? 2019 nî ji̍t-phian-si̍t chit-kang ê ji̍t-chhut, ji̍t-thâu tī chiah seng tú-tio̍h kāu-hûn, liáu-āu kan-na sī pun-chò nn̄g-tè peh--khí-lâi. Kha-mé-lah sàng kóng, chit-ê kéng-sek sī i chit-sì-lâng tú-kòe siōng sù-lâng-chàn-thàn ê ji̍t-chhut. Chit-ê khì hō͘ tāi-khì âng-hòa ê thài-iông, i téng-koân hū-kīn ê o͘-sek îⁿ-pôaⁿ sī goe̍h-kiû, m̄-koh ē-kha hit-ê chiam-chiam ê o͘-iáⁿ mā-sī. Che sī in-ūi Tē-kiû tāi-khì lāi-té ū chi̍t chân khong-khì ê un-tō͘ si̍t-chāi sī siuⁿ koân--ah, to̍h chhiⁿ-chhiūⁿ sī chi̍t-lia̍p tōa-hêng ê kiàⁿ-thâu, chiah ē sán-seng tē-jī ê iáⁿ-siōng. Tùi it-poaⁿ ê ji̍t-chhut iah-sī ji̍t-lo̍h lâi-kóng, chit-khoán khah hán-tit khòaⁿ-tio̍h ê tāi-khì kng-ha̍k hiān-siōng to̍h kiò-chò Etruscan hoe-kan-hāu-èng. Chit-tiuⁿ siòng-phìⁿ sī jī-khòng-i̍t-kiú nî cha̍p-jī goe̍h tī Khah-ta̍t ê Al Wakrah hip--ê. Tī Tē-kiû tang-pêng e̍h-sè hoān-ûi lāi-té ê chi̍t-kóa koan-seng-chiá, ē-tàng khòaⁿ-tio̍h oân-chéng ê Kim-khoân-ji̍t-si̍t. Tī hiah, goe̍h-kiû oân-choân khì hō͘ pōe-kéng ê Thài-iông kho͘ tī lāi-té, to̍h chhiⁿ-chhiūⁿ sī chi̍t-liàn hóe-kho͘-á. Tùi ū bān-choân chún-pī ê koan-seng-chiá lâi-kóng, āu-chi̍t-pái ê ji̍t-si̍t, mā-sī Kim-khoân ji̍t-si̍t, ē tī chit lé-pài la̍k chhut-hiān.

[KIP] Piàn-hîng ê Ji̍t-tshut-tài-si̍t

Sī--lih! M̄-tsai lí kám bat khuànn-kàu tsit-khuán ji̍t-tshut? 2019 nî ji̍t-phian-si̍t tsit-kang ê ji̍t-tshut, ji̍t-thâu tī tsiah sing tú-tio̍h kāu-hûn, liáu-āu kan-na sī pun-tsò nn̄g-tè peh--khí-lâi. Kha-mé-lah sàng kóng, tsit-ê kíng-sik sī i tsit-sì-lâng tú-kuè siōng sù-lâng-tsàn-thàn ê ji̍t-tshut. Tsit-ê khì hōo tāi-khì âng-huà ê thài-iông, i tíng-kuân hū-kīn ê oo-sik înn-puânn sī gue̍h-kiû, m̄-koh ē-kha hit-ê tsiam-tsiam ê oo-iánn mā-sī. Tse sī in-uī Tē-kiû tāi-khì lāi-té ū tsi̍t tsân khong-khì ê un-tōo si̍t-tsāi sī siunn kuân--ah, to̍h tshinn-tshiūnn sī tsi̍t-lia̍p tuā-hîng ê kiànn-thâu, tsiah ē sán-sing tē-jī ê iánn-siōng. Tuì it-puann ê ji̍t-tshut iah-sī ji̍t-lo̍h lâi-kóng, tsit-khuán khah hán-tit khuànn-tio̍h ê tāi-khì kng-ha̍k hiān-siōng to̍h kiò-tsò Etruscan hue-kan-hāu-ìng. Tsit-tiunn siòng-phìnn sī jī-khòng-i̍t-kiú nî tsa̍p-jī gue̍h tī Khah-ta̍t ê Al Wakrah hip--ê. Tī Tē-kiû tang-pîng e̍h-sè huān-uî lāi-té ê tsi̍t-kuá kuan-sing-tsiá, ē-tàng khuànn-tio̍h uân-tsíng ê Kim-khuân-ji̍t-si̍t. Tī hiah, gue̍h-kiû uân-tsuân khì hōo puē-kíng ê Thài-iông khoo tī lāi-té, to̍h tshinn-tshiūnn sī tsi̍t-liàn hué-khoo-á. Tuì ū bān-tsuân tsún-pī ê kuan-sing-tsiá lâi-kóng, āu-tsi̍t-pái ê ji̍t-si̍t, mā-sī Kim-khuân ji̍t-si̍t, ē tī tsit lé-pài la̍k tshut-hiān.

[English] A Distorted Sunrise Eclipse

Yes, but have you ever seen a sunrise like this? Here, after initial cloudiness, the Sun appeared to rise in two pieces and during a partial eclipse in 2019, causing the photographer to describe it as the most stunning sunrise of his life. The dark circle near the top of the atmospherically-reddened Sun is the Moon -- but so is the dark peak just below it. This is because along the way, the Earth's atmosphere had a layer of unusually warm air over the sea which acted like a gigantic lens and created a second image. For a normal sunrise or sunset, this rare phenomenon of atmospheric optics is known as the Etruscan vase effect. The featured picture was captured in December 2019 from Al Wakrah, Qatar. Some observers in a narrow band of Earth to the east were able to see a full annular solar eclipse -- where the Moon appears completely surrounded by the background Sun in a ring of fire. The next solar eclipse, also an annular eclipse for well-placed observers, will occur this coming Saturday.

詞彙學習