懸解析度 ê 紅色精靈

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Sprite Lightning in High Definition
• 影像來源 kah 版權：Nicolas Escurat
• 台文翻譯：An-Li Tsai (NSYSU)

[漢羅] 懸解析度 ê 紅色精靈

有當時仔爍爁會出現 tī 欲倚太空 ê 所在。 紅色精靈爍爁 就是這款 爍爁。 伊是 25 冬前才 tī 地球 去 hŏng 翕著，開始研究--ê。 其實毋管是佗一款 爍爁 ê 起源，攏是科學家有興趣 ê 研究主題。 像 紅色精靈爍爁 到底是按怎來--ê？科學家嘛一直想欲知影。 研究結果表示講，等產生較強 ê 正電 雲對地爍爁 了後，就會生出 紅色精靈。 伊拄開始 ê 時陣是 100 公尺大 ê 離子氣體球，tī 80 公里懸 ê 所在，用 10 葩 ê 光速 射落來。 隨綴 leh 出現 規陣衝懸 ê 離子球。 這張 解析度特別懸 ê 相片是 一大陣紅色精靈。 這張影像是影片 ê 孤張影格，長度才 1/25 秒爾爾。 影片是 3 禮拜前 tī 法國 Dordogne 省 ê Castelnaud 城堡 頂懸翕--ê。 紅色精靈是一目𥍉就無去矣！後一格影格就看袂著矣！

[POJ] Koân kái-sek-tō͘ ê Âng-sek-cheng-lêng

Ū-tang-sî-á sih-nah ē chhut-hiān tī beh óa thài-khong ê só͘-chāi. Âng-sek-cheng-lêng sih-nah to̍h-sī chit-khoán sih-nah. I sī 25 tang chêng chiah tī Tē-kiû khì hőng hip-tio̍h, khai-sí gián-kiù--ê. Kî-si̍t m̄-koán sī toh chi̍t-khoán sih-nah ê khí-goân, lóng sī kho-ha̍k-ka ū hèng-chhù ê gián-kiù chú-tê. Chhiūⁿ âng-sek-cheng-lêng sih-nah tàu-té sī án-chóaⁿ lâi--ê? Kho-ha̍k-ka mā it-ti̍t siūⁿ-beh chai-iáⁿ. Gián-kiù kiat-kó piáu-sī kóng, tán sán-seng khah kiông ê chiàⁿ-tiān hûn-tùi-tē sih-nah liáu-āu, to̍h ē seⁿ-chhut âng-sek-cheng-lêng. I tú-khai-sí ê sî-chūn sī 100 kong-chhioh tōa ê lī-chú khì-thé-kiû, tī 80 kong-lí koân ê só͘-chāi, iōng 10 pha ê kng-sok siā--lo̍h-lâi. Sûi tòe leh chhut-hiān kui-tīn chhèng-koân ê lī-chú-kiû. Chit-tiuⁿ kái-sek-tō͘ te̍k-pia̍t koân ê siòng-phìⁿ sī chi̍t-tōa-tīn âng-sek-cheng-lêng. Chit-tiuⁿ iáⁿ-siōng sī iáⁿ-phìⁿ ê ko͘-tiuⁿ iáⁿ-keh, tn̂g-tō͘ chiah 1/25 bió niā-niā. Iáⁿ-phìⁿ sī 3 lé-pài chêng tī Hoat-kok Dordogne séng ê Castelnaud siâⁿ-pó téng-koân hip--ê. Âng-sek-cheng-lêng sī chi̍t-ba̍k-nih tō bô-khì-ah! Āu chi̍t keh iáⁿ-keh tō khòaⁿ bē tio̍h--ah!

[KIP] Kuân kái-sik-tōo ê Âng-sik-tsing-lîng

Ū-tang-sî-á sih-nah ē tshut-hiān tī beh uá thài-khong ê sóo-tsāi. Âng-sik-tsing-lîng sih-nah to̍h-sī tsit-khuán sih-nah. I sī 25 tang tsîng tsiah tī Tē-kiû khì hőng hip-tio̍h, khai-sí gián-kiù--ê. Kî-si̍t m̄-kuán sī toh tsi̍t-khuán sih-nah ê khí-guân, lóng sī kho-ha̍k-ka ū hìng-tshù ê gián-kiù tsú-tê. Tshiūnn âng-sik-tsing-lîng sih-nah tàu-té sī án-tsuánn lâi--ê? Kho-ha̍k-ka mā it-ti̍t siūnn-beh tsai-iánn. Gián-kiù kiat-kó piáu-sī kóng, tán sán-sing khah kiông ê tsiànn-tiān hûn-tuì-tē sih-nah liáu-āu, to̍h ē senn-tshut âng-sik-tsing-lîng. I tú-khai-sí ê sî-tsūn sī 100 kong-tshioh tuā ê lī-tsú khì-thé-kiû, tī 80 kong-lí kuân ê sóo-tsāi, iōng 10 pha ê kng-sok siā--lo̍h-lâi. Suî tuè leh tshut-hiān kui-tīn tshìng-kuân ê lī-tsú-kiû. Tsit-tiunn kái-sik-tōo ti̍k-pia̍t kuân ê siòng-phìnn sī tsi̍t-tuā-tīn âng-sik-tsing-lîng. Tsit-tiunn iánn-siōng sī iánn-phìnn ê koo-tiunn iánn-keh, tn̂g-tōo tsiah 1/25 bió niā-niā. Iánn-phìnn sī 3 lé-pài tsîng tī Huat-kok Dordogne síng ê Castelnaud siânn-pó tíng-kuân hip--ê. Âng-sik-tsing-lîng sī tsi̍t-ba̍k-nih tō bô-khì-ah! Āu tsi̍t keh iánn-keh tō khuànn bē tio̍h--ah!

[English] Sprite Lightning in High Definition

Sometimes lightning occurs out near space. One such lightning type is red sprite lightning, which has only been photographed and studied on Earth over the past 25 years. The origins of all types of lightning remain topics for research, and scientists are still trying to figure out why red sprite lightning occurs at all. Research has shown that following a powerful positive cloud-to-ground lightning strike, red sprites may start as 100-meter balls of ionized air that shoot down from about 80-km high at 10 percent the speed of light. They are quickly followed by a group of upward streaking ionized balls. Featured here is an extraordinarily high-resolution image of a group of red sprites. This image is a single frame lasting only 1/25th of a second from a video taken above Castelnaud Castle in Dordogne, France, about three weeks ago. The sprites quickly vanished -- no sprites were visible even on the very next video frame.

詞彙學習