火環日食 ê 日出

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：A Ring of Fire Sunrise Solar Eclipse
• 影片來源：Colin Legg & Geoff Sims; 音樂：Peter Nanasi
• 宇宙旅行：APOD 亂數產生器
• 台文翻譯：An-Li Tsai (NSYSU)

[漢羅] 火環日食 ê 日出

雲後壁 ùi 地平線 peh 起來 ê 物件是啥物？ 是日頭啦！ 是講，大部份 ê 日出袂 親像按呢，因為大部份 ê 日出無包括月娘。 毋過 tī 2013 年 5 月 10 號透早，澳洲 西部 peh 起來 ê 日頭 kah 咱地球之間閣有一粒月娘。 這个時陣，若是 無人 kā 咱講，咱會足歹理解這到底是發生啥物代誌。 發生 日環食 ê 時陣，月球 kah 咱 地球 ê 距離傷遠矣，所以無法度 kā 規粒太陽閘牢。 閘袂牢 ê 日光，就 ùi 月球外沿迵過來，上濟會留一輾 火環 ê 形體 tī 遐。 因為地平線頂懸 ê 地球大氣 ê 反射率較懸，所以這張 縮時攝影影片 翕著 ê 日出 kah 月出 看起來就較扁。 影片繼續放送，日頭嘛繼續 peh 起來，毋過太陽 kah 月球煞開始分–開。 欲看著後一擺 ê 日環食，毋免等 3 禮拜。 10 月 14 拜六這工天氣若是袂䆀，咱就會當 tī 迒過 北美洲 kah 南美洲 狹狹 ê 全食帶內底，看著 一輾 火環。

[POJ] Hóe-khoân Ji̍t-si̍t ê Ji̍t-chhut

Hûn āu-piah ùi tē-pêng-sòaⁿ peh-khí-lâi ê mi̍h-kiāⁿ sī siáⁿ-mih? Sī ji̍t-thâu–lah! Sī-kóng, tōa-pō͘-hūn ê ji̍t-chhut bē chhin-chhiūⁿ án-ne, in-ūi tōa-pō͘-hūn ê ji̍t-chhut bô pau-koat goe̍h-niû. M̄-koh tī 2013 nî 5 goe̍h 10 hō thàu-chá, Ò-chiu se-pō͘ peh–khí-lâi ê ji̍t-thâu kah lán Tē-kiû chi-kan koh-ū chi̍t-lia̍p Goe̍h-niû. Chit-ê sî-chūn, nā-sī bô-lâng kā lán kóng, lán ē chiok pháiⁿ lí-kái che tàu-té sī hoat-seng siáⁿ-mih tāi-chì. Hoat-seng ji̍t-khoân-si̍t ê sî-chūn, goe̍h-kiû kah lán Tē-kiû ê kū-lī siuⁿ hn̄g–ah, só͘-í bô-hoat-tō͘ kā kui-lia̍p thài-iông cha̍h-tiâu. Cha̍h bē-tiâu ê ji̍t-kng, to̍h ùi Goe̍h-kiû gōa-iân thàng–kòe-lâi, siōng-chē ē lâu chi̍t liàn hóe-khoân ê hêng-thé tī hiah. In-ūi tē-pêng-sòaⁿ téng-koân ê Tē-kiû tāi-khì ê hoán-siā-lu̍t khah koân, só͘-í chit-tiuⁿ sok-sî-liap-iáⁿ iáⁿ-phìⁿ hip-tio̍h ê ji̍t-chhut kah goe̍h-chhut khòaⁿ–khí-lâi tō khah píⁿ. Iáⁿ-phìⁿ kè-sio̍k hòng-sàng, ji̍t-thâu mā kè-sio̍k peh–khí-lâi, m̄-koh thài-iông kah goe̍h-kiû soah khai-sí hun–khui. Beh khòaⁿ-tio̍h āu chi̍t-pái ê ji̍t-khoân-si̍t, m̄-bián tán 3 lé-pài. 10 goe̍h 14 pài-la̍k chit kang thiⁿ-khì nā-sī bē-bái, lán to̍h ē-tàng tī hāⁿ-kòe Pak-bí-chiu kah Lâm-bí-chiu e̍h-e̍h ê choân-si̍t tòa lāi-té, khòaⁿ-tio̍h chi̍t liàn hóe-khoân.

[KIP] Hué-khuân Ji̍t-si̍t ê Ji̍t-tshut

Hûn āu-piah uì tē-pîng-suànn peh-khí-lâi ê mi̍h-kiānn sī siánn-mih? Sī ji̍t-thâu–lah! Sī-kóng, tuā-pōo-hūn ê ji̍t-tshut bē tshin-tshiūnn án-ne, in-uī tuā-pōo-hūn ê ji̍t-tshut bô pau-kuat gue̍h-niû. M̄-koh tī 2013 nî 5 gue̍h 10 hō thàu-tsá, Ò-tsiu se-pōo peh–khí-lâi ê ji̍t-thâu kah lán Tē-kiû tsi-kan koh-ū tsi̍t-lia̍p Gue̍h-niû. Tsit-ê sî-tsūn, nā-sī bô-lâng kā lán kóng, lán ē tsiok pháinn lí-kái tse tàu-té sī huat-sing siánn-mih tāi-tsì. Huat-sing ji̍t-khuân-si̍t ê sî-tsūn, gue̍h-kiû kah lán Tē-kiû ê kū-lī siunn hn̄g–ah, sóo-í bô-huat-tōo kā kui-lia̍p thài-iông tsa̍h-tiâu. Tsa̍h bē-tiâu ê ji̍t-kng, to̍h uì Gue̍h-kiû guā-iân thàng–kuè-lâi, siōng-tsē ē lâu tsi̍t liàn hué-khuân ê hîng-thé tī hiah. In-uī tē-pîng-suànn tíng-kuân ê Tē-kiû tāi-khì ê huán-siā-lu̍t khah kuân, sóo-í tsit-tiunn sok-sî-liap-iánn iánn-phìnn hip-tio̍h ê ji̍t-tshut kah gue̍h-tshut khuànn–khí-lâi tō khah pínn. Iánn-phìnn kè-sio̍k hòng-sàng, ji̍t-thâu mā kè-sio̍k peh–khí-lâi, m̄-koh thài-iông kah gue̍h-kiû suah khai-sí hun–khui. Beh khuànn-tio̍h āu tsi̍t-pái ê ji̍t-khuân-si̍t, m̄-bián tán 3 lé-pài. 10 gue̍h 14 pài-la̍k tsit kang thinn-khì nā-sī bē-bái, lán to̍h ē-tàng tī hānn-kuè Pak-bí-tsiu kah Lâm-bí-tsiu e̍h-e̍h ê tsuân-si̍t tuà lāi-té, khuànn-tio̍h tsi̍t liàn hué-khuân.

[English] A Ring of Fire Sunrise Solar Eclipse

What’s rising above the horizon behind those clouds? It’s the Sun. Most sunrises don’t look like this, though, because most sunrises don’t include the Moon. In the early morning of 2013 May 10, however, from Western Australia, the Moon was between the Earth and the rising Sun. At times, it would be hard for the uninformed to understand what was happening. In an annular eclipse, the Moon is too far from the Earth to block the entire Sun, and at most leaves a ring of fire where sunlight pours out around every edge of the Moon. The featured time-lapse video also recorded the eclipse through the high refraction of the Earth’s atmosphere just above the horizon, making the unusual rising Sun and Moon appear also flattened. As the video continues, the Sun continues to rise, while the Sun and Moon begin to separate. The next annular solar eclipse will occur in less than three weeks. On Saturday, October 14, a ring of fire will be visible through clear skies from a thin swath crossing both North and South America.

詞彙學習（漢羅/POJ/KIP/華語/English）

• 【火環日食】hóe-khoân ji̍t-si̍t/hué-khuân ji̍t-si̍t/火環日食/ring of fire solar eclipse
• 【日環食】ji̍t-khoân-si̍t/ji̍t-khuân-si̍t/日環食/annular eclipse
• 【縮時攝影】sok-sî-liap-iáⁿ/sok-sî-liap-iánn/縮時攝影/time-lapse
• 【地平線】tē-pêng-sòaⁿ/tē-pîng-suànn/地平線/horizon
• 【大氣】tāi-khì/tāi-khì/大氣/atmosphere