宇宙 ê 倒影

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Cosmos in Reflection
• 影像來源 kah 版權：Jeff Dai (TWAN)
• 台文翻譯：An-Li Tsai (NSYSU)

[漢羅] 宇宙 ê 倒影

日時 tī 中國 甘肅省 敦煌市 附近 戈壁沙漠 西爿 100 兆 watt ê 熔鹽太陽能發電廠內底，有超過 1 萬 2000 面大塊鏡 leh 反射日光。 逐塊鏡攏 leh 逐咱 ê 日頭，就親像日頭花仝款。 In 做伙合作變做一面足大塊 ê 鏡，固定 kā 日光反射去發電站 ê 中央塔。 毋過 暗暝 ê 時陣，這寡鏡就攏袂振動。 In 反射 銀河內底 濟甲算袂清 ê 遠方恆星、星團、星雲，kah 銀河後壁 ê 天體。 這幅 科幻 夜景是 9 月 15 彼工 tī 大型鏡面陣列邊仔，用 固定 tī 三跤馬頂懸 ê kha-mé-lah 翕--ê。 這張 kha-mé-lah ê 數位感光 組合影像，有翕著 天星 tī 夜空 ê 仝心弧軌跡，kah 恆星軌跡 ê 超現實倒影。

[POJ] Ú-tiū ê Tò-iáⁿ

Ji̍t-sî tī Tiong-kok Kam-siok séng Tun-hông chhī hù-kīn Ko-piah soa-bo̍k sai-pêng 100 tiāu watt ê iông-iâm thài-iông-lêng hoat-tiān-chhiúⁿ lāi-té, ū chhiau-kòe 1 bān 2000 bīn tōa-tè kiàⁿ leh hoán-siā ji̍t-kng. Ta̍k tè kiàⁿ lóng leh jiok lán ê ji̍t-thâu, to̍h chhin-chhiūⁿ ji̍t-thâu-hoe kāng-khoán. In chò-hóe ha̍p-chok piàn-chò chi̍t-bīn chiok tōa tè ê kiàⁿ, kò͘-tēng kā ji̍t-kng hoán-siā khì hoat-tiān-chām ê tiong-ng-thah. M̄-koh àm-mê ê sî-chūn, chit kóa kiàⁿ to̍h lóng bē tín-tāng. In hoán-siā Gîn-hô lāi-té chē kah sǹg bē chheng ê oán-hong hêng-chhiⁿ, seng-thoân, seng-hûn, kah Gîn-hô āu-piah ê thian-thé. Chit pak kho-hoàn iā-kéng sī 9 goe̍h 15 hit-kang tī tōa-hêng kiàⁿ-bīn tīn-lia̍t piⁿ-á, iōng kò͘-tēng tī saⁿ-kha-bé téng-koân ê kha-mé-lah hip--ê. Chit-tiuⁿ kha-mé-lah ê sò͘-ūi kám-kng cho͘-ha̍p iáⁿ-siōng, ū hip-tio̍h thiⁿ-chheⁿ tī iā-khong ê kāng-sim-hô͘ khúi-jiah, kah hêng-chhiⁿ khúi-jiah ê chhiau-hiān-si̍t tò-iáⁿ.

[KIP] Ú-tiū ê Tò-iánn

Ji̍t-sî tī Tiong-kok Kam-siok síng Tun-hông tshī hù-kīn Ko-piah sua-bo̍k sai-pîng 100 tiāu watt ê iông-iâm thài-iông-lîng huat-tiān-tshiúnn lāi-té, ū tshiau-kuè 1 bān 2000 bīn tuā-tè kiànn leh huán-siā ji̍t-kng. Ta̍k tè kiànn lóng leh jiok lán ê ji̍t-thâu, to̍h tshin-tshiūnn ji̍t-thâu-hue kāng-khuán. In tsò-hué ha̍p-tsok piàn-tsò tsi̍t-bīn tsiok tuā tè ê kiànn, kòo-tīng kā ji̍t-kng huán-siā khì huat-tiān-tsām ê tiong-ng-thah. M̄-koh àm-mê ê sî-tsūn, tsit kuá kiànn to̍h lóng bē tín-tāng. In huán-siā Gîn-hô lāi-té tsē kah sǹg bē tshing ê uán-hong hîng-tshinn, sing-thuân, sing-hûn, kah Gîn-hô āu-piah ê thian-thé. Tsit pak kho-huàn iā-kíng sī 9 gue̍h 15 hit-kang tī tuā-hîng kiànn-bīn tīn-lia̍t pinn-á, iōng kòo-tīng tī sann-kha-bé tíng-kuân ê kha-mé-lah hip--ê. Tsit-tiunn kha-mé-lah ê sòo-uī kám-kng tsoo-ha̍p iánn-siōng, ū hip-tio̍h thinn-tshenn tī iā-khong ê kāng-sim-hôo khuí-jiah, kah hîng-tshinn khuí-jiah ê tshiau-hiān-si̍t tò-iánn.

[English] Cosmos in Reflection

During the day, over 12,000 large mirrors reflect sunlight at the 100-megawatt, molten-salt, solar thermal power plant at the western edge of the Gobi desert near Dunhuang, Gansu Province, China. Individual mirror panels turn to track the sun like sunflowers. They conspire to act as a single super mirror reflecting the sunlight toward a fixed position, the power station's central tower. During the night the mirrors stand motionless though. They reflect the light of the countless distant stars, clusters and nebulae of the Milky Way and beyond. This sci-fi night skyscape was created with a camera fixed to a tripod near the edge of the giant mirror matrix on September 15. The camera's combined sequence of digital exposures captures concentric arcs of celestial star trails through the night with star trails in surreal mirrored reflection.

詞彙學習