NGC 7331 kah 伊後壁 ê 天體

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：NGC 7331 and Beyond
• 影像來源 kah 版權：Ian Gorenstein
• 台文翻譯：An-Li Tsai (NSYSU)

[漢羅] NGC 7331 kah 伊後壁 ê 天體

大閣媠 ê 捲螺仔星系 NGC 7331，定定 hŏng 講伊 kah 咱 銀河系 是足成--ê。 NGC 7331 就 tī 北天 飛馬座 方向 差不多 5000 萬光年遠 ê 所在。 伊真早就 hŏng 認為是一个捲螺仔星雲，嘛是一个足光 ê 星系。 毋過伊煞無去予收 tī Charles Messier tī 18 世紀編 ê 足有名 ê 目錄內底。 是講這个星系盤 tī 咱 ê 視線方向看起來是 坦倒--ê，所以利用望遠鏡長時間感光 ê 影像，看起來就感覺足有層次--ê。 這款效應 tī 這張清楚 ê 影像 內底是閣較明顯，因為 tī 這个島宇宙後壁，猶有幾若个星系 tī 遐。 上顯目 ê 背景星系 ê 視寸尺 差不多是 NGC 7331 ê 1/10，表示講 in ê 距離嘛差不多有 10 倍遠。 In kah NGC 7331 tī 天頂排 kah 遮爾密，只是拄仔好爾爾。 這組引人注目 ê 星系就 tī 銀河盤頂懸，in 嘛叫做 鹿舐星系群。

[POJ] NGC 7331 kah I āu-piah ê Thian-thé

Tōa koh súi ê kńg-lê-á seng-hē NGC 7331, tiāⁿ-tiāⁿ hőng kóng i kah lán Gîn-hô-hē sī chiok sêng--ê. NGC 7331 to̍h tī pak-thian Hui-má-chō hong-hiòng chha-put-to 5000 bān kng-nî hn̄g ê só͘-chāi. I chin chá to̍h hőng jīn-ûi sī chi̍t-ê kńg-lê-á seng-hûn, mā-sī chi̍t-ê chiok kng ê seng-hē. M̄-koh i soah bô-khì hō͘ siu tī Charles Messier tī 18 sè-kí pian ê chok ū-miâ ê bo̍k-lio̍k lāi-té. Sī-kóng chit-ê seng-hē-pôaⁿ tī lán ê sī-sòaⁿ hong-hiòng khòaⁿ--khí-lâi sī thán-tó--ê, só͘-í lī-iōng bōng-oán-kiàⁿ tn̂g sî-kan kám-kng ê iáⁿ-siōng, khòaⁿ--khí-lâi to̍h kám-kak chiok ū chân-chhù--ê. Chit-khoán hāu-èng tī chit-tiuⁿ chheng-chhó ê iáⁿ-siōng lāi-té sī koh-khah bêng-hián, in-ūi tī chit-ê tó-ú-tiū āu-piah, iáu-ū kúi-nā ê seng-hē tī-hiah. Siōng hiáⁿ-ba̍k ê pōe-kéng seng-hē ê sī-chhùn-chhioh chha-put-to sī NGC 7331 ê 1/10, piáu-sī kóng in ê kū-lī mā chha-put-to ū 10 pōe hn̄g. In kah NGC 7331 tī thiⁿ-téng pâi kah chiah-nī ba̍t, chí-sī tú-á-hó niā-niā. Chit cho͘ ín-lâng-chù-bo̍k ê seng-hē to̍h tī gîn-hô-pôaⁿ téng-koân, in mā kiò-chò Lo̍k-chīⁿ Seng-hē-kûn.

[KIP] NGC 7331 kah I āu-piah ê Thian-thé

Tuā koh suí ê kńg-lê-á sing-hē NGC 7331, tiānn-tiānn hőng kóng i kah lán Gîn-hô-hē sī tsiok sîng--ê. NGC 7331 to̍h tī pak-thian Hui-má-tsō hong-hiòng tsha-put-to 5000 bān kng-nî hn̄g ê sóo-tsāi. I tsin tsá to̍h hőng jīn-uî sī tsi̍t-ê kńg-lê-á sing-hûn, mā-sī tsi̍t-ê tsiok kng ê sing-hē. M̄-koh i suah bô-khì hōo siu tī Charles Messier tī 18 sè-kí pian ê tsok ū-miâ ê bo̍k-lio̍k lāi-té. Sī-kóng tsit-ê sing-hē-puânn tī lán ê sī-suànn hong-hiòng khuànn--khí-lâi sī thán-tó--ê, sóo-í lī-iōng bōng-uán-kiànn tn̂g sî-kan kám-kng ê iánn-siōng, khuànn--khí-lâi to̍h kám-kak tsiok ū tsân-tshù--ê. Tsit-khuán hāu-ìng tī tsit-tiunn tshing-tshó ê iánn-siōng lāi-té sī koh-khah bîng-hián, in-uī tī tsit-ê tó-ú-tiū āu-piah, iáu-ū kuí-nā ê sing-hē tī-hiah. Siōng hiánn-ba̍k ê puē-kíng sing-hē ê sī-tshùn-tshioh tsha-put-to sī NGC 7331 ê 1/10, piáu-sī kóng in ê kū-lī mā tsha-put-to ū 10 puē hn̄g. In kah NGC 7331 tī thinn-tíng pâi kah tsiah-nī ba̍t, tsí-sī tú-á-hó niā-niā. Tsit tsoo ín-lâng-tsù-bo̍k ê sing-hē to̍h tī gîn-hô-puânn tíng-kuân, in mā kiò-tsò Lo̍k-tsīnn Sing-hē-kûn.

[English] NGC 7331 and Beyond

Big, beautiful spiral galaxy NGC 7331 is often touted as an analog to our own Milky Way. About 50 million light-years distant in the northern constellation Pegasus, NGC 7331 was recognized early on as a spiral nebula and is actually one of the brighter galaxies not included in Charles Messier's famous 18th century catalog. Since the galaxy's disk is inclined to our line-of-sight, long telescopic exposures often result in images that evokes a strong sense of depth. The effect is further enhanced in this sharp image by galaxies that lie beyond the gorgeous island universe. The most prominent background galaxies are about one tenth the apparent size of NGC 7331 and so lie roughly ten times farther away. Their close alignment on the sky with NGC 7331 occurs just by chance. Lingering above the plane of the Milky Way, this striking visual grouping of galaxies is known to some as the Deer Lick Group.

詞彙學習