美麗 ê Nishimura 彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Beautiful Comet Nishimura
• 影像來源 kah 版權：Petr Horálek / Institute of Physics in Opava
• 台文翻譯：An-Li Tsai (NSYSU)

[漢羅] 美麗 ê Nishimura 彗星

這張相片就算是無彗星 tī 遐，嘛是足媠–ê。 Tī 這張 日出 相片內底，頂懸是優雅 ê 深藍色，閣有小可仔發白光 ê 恆星，地平線附近是 hŏng 感覺爽快 ê 黃咖啡色。 前景是 Slovakia 共和國 西部 ê 青色山崙，較遠 ê 是 Zadňa hura 山 kah Veľká hora 山，kah 沿路一寡小鎮。 正爿 ê 金星 實在是 傷過媠，因為有大氣踅 tī 伊邊仔，成做一輾彩色 ê 大氣華。 毋過閣較吸引人–ê，猶是 彗星。 這張組合相片 倒爿彼粒，是昨昏早 天欲光進前翕–ê Nishimura 彗星。 最近全球透早攏看會著 足光 ê 彗鬚 kah 長長 ê 離子 尾溜，予足濟透早翕 ê 全景相片攏變甲足媠–ê。 明仔載，彗星 C/2023 P1 (Nishimura 彗星) 會經過伊 kah 地球上倚彼點。 後擺欲閣行遮爾倚，是愛閣等 434 年矣。

[POJ] Bí-lē ê Nishimura Hūi-chheⁿ

Chit-tiuⁿ siòng-phìⁿ tō-sǹg sī bô hūi-chheⁿ tī hiah, mā-sī chiok súi–ê. Tī chit-tiuⁿ ji̍t-chhut siòng-phìⁿ lāi-té, téng-koân sī iu-ngá ê chhim-nâ-sek, koh-ū sió-khóa-á hoat pe̍h-kng ê hêng-chheⁿ, tē-pêng-sòaⁿ hù-kīn sī hőng kám-kak sóng-khoài ê ng ka-pi-sek. Chiân-kéng sī Slovakia kiōng-hô-kok se-pō͘ ê chheⁿ-sek soaⁿ-lūn, khah hn̄g ê sī Zadňa hura soaⁿ kah Veľká hora soaⁿ, kah iân-lō͘ chi̍t-kóa sió-tìn. Chiàⁿ-pêng ê Kim-chheⁿ si̍t-chāi sī siuⁿ-kòe súi, in-ūi ū tāi-khì se̍h tī i piⁿ-á, chiâⁿ-chò chi̍t liàn chhái-sek ê tāi-khì-hôa. M̄-koh koh-khah khip-ín lâng–ê, iáu-sī hūi-chheⁿ. Chit-tiuⁿ cho͘-ha̍p siòng-phìⁿ tò-pêng hit lia̍p, sī cha-hng chái thiⁿ beh kng chìn-chêng hip–ê Nishimura Hūi-chheⁿ. Chòe-kīn choân-kiû thàu-chá lóng khòaⁿ-ē-tio̍h chiok kng ê hūi-chhiu kah tn̂g-tn̂g ê lī-chú bóe-liu, hō͘ chiok chē thàu-chá hip–ê choân-kéng siòng-phìⁿ lóng piàn-kah chiok súi–ê. Miâ-á-chài, Hūi-chheⁿ C/2023 P1 (Nishimura Hūi-chheⁿ) ē keng-kòe i kah Tē-kiû siōng óa hit tiám. Āu-pái beh koh kiâⁿ chiah-nī óa, sī ài koh tán 434 nî–ah.

[KIP] Bí-lē ê Nishimura Huī-tshenn

Tsit-tiunn siòng-phìnn tō-sǹg sī bô huī-tshenn tī hiah, mā-sī tsiok suí–ê. Tī tsit-tiunn ji̍t-tshut siòng-phìnn lāi-té, tíng-kuân sī iu-ngá ê tshim-nâ-sik, koh-ū sió-khuá-á huat pe̍h-kng ê hîng-tshenn, tē-pîng-suànn hù-kīn sī hőng kám-kak sóng-khuài ê ng ka-pi-sik. Tsiân-kíng sī Slovakia kiōng-hô-kok se-pōo ê tshenn-sik suann-lūn, khah hn̄g ê sī Zadňa hura suann kah Veľká hora suann, kah iân-lōo tsi̍t-kuá sió-tìn. Tsiànn-pîng ê Kim-tshenn si̍t-tsāi sī siunn-kuè suí, in-uī ū tāi-khì se̍h tī i pinn-á, tsiânn-tsò tsi̍t liàn tshái-sik ê tāi-khì-huâ. M̄-koh koh-khah khip-ín lâng–ê, iáu-sī huī-tshenn. Tsit-tiunn tsoo-ha̍p siòng-phìnn tò-pîng hit lia̍p, sī tsa-hng tsái thinn beh kng tsìn-tsîng hip–ê Nishimura Huī-tshenn. Tsuè-kīn tsuân-kiû thàu-tsá lóng khuànn-ē-tio̍h tsiok kng ê huī-tshiu kah tn̂g-tn̂g ê lī-tsú bué-liu, hōo tsiok tsē thàu-tsá hip–ê tsuân-kíng siòng-phìnn lóng piàn-kah tsiok suí–ê. Miâ-á-tsài, Huī-tshenn C/2023 P1 (Nishimura Huī-tshenn) ē king-kuè i kah Tē-kiû siōng uá hit tiám. Āu-pái beh koh kiânn tsiah-nī uá, sī ài koh tán 434 nî–ah.

[English] Beautiful Comet Nishimura

This scene would be beautiful even without the comet. By itself, the sunrise sky is an elegant deep blue on high, with faint white stars peeking through, while near the horizon is a pleasing tan. By itself, the foreground hills of eastern Slovakia are appealingly green, with the Zadňa hura and Veľká hora hills in the distance, and with the lights of small towns along the way. Venus, by itself on the right, appears unusually exquisite, surrounded by a colorful atmospheric corona. But what attracts the eye most is the comet. On the left, in this composite image taken just before dawn yesterday morning, is Comet Nishimura. On recent mornings around the globe, its bright coma and long ion tail make many a morning panoramic photo unusually beautiful. Tomorrow, C/2023 P1 (Nishimura) will pass its nearest to the Earth for about the next 434 years.

詞彙學習（漢羅/POJ/KIP/華語/English）

• 【Nishimura 彗星】Nishimura Hūi-chheⁿ/Nishimura Huī-tshenn/西村彗星/Comet Nishimura
• 【彗星 C/2023 P1】Hūi-chheⁿ C jī-khòng-jī-sam P-one/Huī-tshenn C jī-khòng-jī-sam P-one/ 彗星 C/2023 P1 /Comet C/2023 P1
• 【大氣華】tāi-khì-hôa/tāi-khì-huâ/大氣華/atmospheric corona
• 【全景相片】choân-kéng siòng-phìⁿ/tsuân-kíng siòng-phìnn/全景相片/panoramic photo
• 【金星】Kim-chheⁿ/Kim-tshenn/金星/Venus
• 【彗鬚】hūi-chhiu/huī-tshiu/彗髮/coma
• 【離子尾溜】lī-chú bóe-liu/lī-tsú bué-liu/離子尾/ion tail